រាជធានីភ្នំពេញ ៖ ដោយសារតែជីវភាពខ្វះខាតលោកគ្រូបង្រៀនម្នាក់ឆ្លៀតពេលទំនេរពេលយប់យកម៉ូតូកញ្ចាស់រត់ម៉ូតូឌុបបែរជាត្រូវជនសង្ស័យមួយក្រុមវាយប្លន់យកទូរស័ព្ទអាយហ្វូនហ្វរមួយគ្រឿងទៅបាត់។
រាជធានីភ្នំពេញ ៖ ដោយសារតែជីវភាពខ្វះខាតលោកគ្រូបង្រៀនម្នាក់ឆ្លៀតពេលទំនេរពេលយប់យកម៉ូតូកញ្ចាស់រត់ម៉ូតូឌុបបែរជាត្រូវជនសង្ស័យមួយក្រុមវាយប្លន់យកទូរស័ព្ទអាយហ្វូនហ្វរមួយគ្រឿងទៅបាត់។ហេតុការណ៍នេះបានកើតឡើងកាលពីវេលាម៉ោង០១ និង៥នាទីរំលងអាធ្រាត្រ ឈានចូលថ្ងៃទី២២ ឧសភា ចំណុចមុខធានាគារអេស៊ីលីដា តាមបណ្ដោយផ្លូវលេខ២៨៩ សង្កាត់បឹងកក់ទី១ ខណ្ឌទួលគោក ។
បើតាមសម្តីរបស់ជនរងគ្រោះឈ្មោះ ខៀវ ចាន់ថា ភេទប្រុស អាយុ២៩ឆ្នាំ មុខរបរធ្វើគ្រូបង្រៀនសហប្រតិបត្តិការអន្ដរជាតិ ស្នាក់នៅភូមិស្លែងរលើង សង្កាត់ទឹកថ្លា ខណ្ឌទួលគោក មានស្រុកកំណើតនៅភូមិតាកុក ឃុំត្រពាំងស្ដៅ ស្រុករមាសហែក ខេត្តស្វាយរៀង ។
ជនរងគ្រោះបានរៀបរាប់ឲ្យដឹងថា មុនពេលកើតហេតុរូបគាត់បានដឹកម៉ូយជាស្ត្រីម្នាក់ចេញពីផ្សារអូឬស្សីទៅផ្សារសាំហាន់ ស្ថិតក្នុងភូមិទួលសង្កែ សង្កាត់ទួលសង្កែ ខណ្ឌឬស្សីកែវ ។ លុះពេលត្រឡប់មកវិញដោយជិះម៉ូតូគុបជ្រុងសេ៥០ ពណ៌ទឹកសមុទ្រ អត់ស្លាកលេខ កញ្ចាស់មួយគ្រឿង ក្នុងទិសដៅពីកើតទៅលិច ពេលមកដល់ចំណុចកើតហេតុស្រាប់តែមានជនសង្ស័យមួយក្រុមមានគ្នា៤នាក់ដើរមកព្រួតគ្នាវាយទៅលើរូបគាត់បណ្តាលឲ្យបាក់ធ្មេញអស់២ ហើយប្លន់យកទូរស័ព្ទអាយហ្វូនហ្វរ ពណ៌ស មួយគ្រឿងទៅបាត់ដោយសុវត្ថិភាព ។
ក្រោយពេលកើតហេតុជនរងគ្រោះបានរាយការណ៍ទៅសមត្ថកិច្ចនៅក្បែរកន្លែងកើតហេតុ តែហាក់ដូចជាមិនអើពើ ទើបរូបគាត់បើកម៉ូតូតាមបណ្ដោយផ្លូវលេខ២៨៩ ទិសដៅកើតទៅលិចត្រឡប់ទៅផ្ទះវិញ ដោយមិនបានទៅដាក់ពាក្យបណ្តឹងទេ ដោយលោកបានលើកឡើងថា ដោយសារតែជីវភាពខ្វះខាតខំប្រឹងឆ្លៀតពេលរត់ម៉ូតូឌុបពេលយប់មិនហ៊ានយកម៉ូតូថ្មីមករត់ទេសុខចិត្តយកម៉ូតូកញ្ចាស់មកជិះចោរមិនប្លន់យកម៉ូតូទេ បែរជាប្លន់យកទូរស័ព្ទដៃទៅវិញ៕
ចែករំលែកព័តមាននេះ