ប្រទេសនីការ៉ាហ្គា-ហុងឌូរ៉ាស ៖ ព្យុះសង្ឃរាឈ្មោះ ETA ដែលបោកបក់មកលើឆ្នេរសមុទ្រការ៉ាអ៊ីបនៃតំបន់អាមេរិកកណ្ដាលជាមួយកម្លាំងខ្យល់ដល់ទៅ២៣០គីឡូម៉ែត្រក្នុង១ម៉ោង កាលពីថ្ងៃទី៣ វិច្ឆិកា បណ្ដាលឲ្យមានជនរងគ្រោះដំបូងម្នាក់នៅហុងឌូរ៉ាស គឺក្មេងស្រីជំទង់អាយុ១៣ឆ្នាំម្នាក់ ដោយសារការបាក់ផ្ទះសង្កត់ ។ ហើយនៅនីការ៉ាហ្គា ក៏មានមនុស្សបាត់បង់ជីវិតចំនួន២នាក់ ខណៈពេលដែលពួកគេធ្វើការក្នុងអណ្ដូងរ៉ែមួយ ។
ក្រោយមកព្យុះនោះ បានចុះថមថយកម្លាំង ពីព្យុះសង្ឃរាកម្រិតទី៤ មកជាព្យុះសង្ឃរាកម្រិតទី២វិញ ជាមួយកម្លាំងខ្យល់១៧៦គីឡូម៉ែត្រក្នុង១ម៉ោង ដោយបោកបក់សំដៅតំបន់មួយ ហៅតំបន់ត្រីកោណរ៉ែជាតំបន់មានអណ្ដូងរ៉ែមាស នាភាគឦសាននីការ៉ាហ្គា ។
ព្យុះនេះបោកបក់ដល់ទីនោះនាព្រឹកថ្ងៃទី៤ វិច្ឆិកា ក្នុងឋានៈជាព្យុះសង្ឃរាប្រភេទទី១ជាមួយកម្លាំងខ្យល់១២០គីឡូម៉ែត្រក្នុង១ម៉ោង មុនពេលប្រែក្លាយជាព្យុះត្រូពីកាល់ នៅភាគខាងជើងនីការ៉ាហ្គា បន្ទាប់មកបោកបក់ទៅកាន់ហុងឌូរ៉ាសក្នុងឋានៈជាវិសម្ពាធត្រូពីកាល់ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ