ខេត្តក្រចេះ ៖ នគរបាលព្រហ្មទណ្ឌសម្រេចបញ្ជូនបុរសម្នាក់ដែលអះអាងថា ជាយោធាទៅតុលាការ លើករណីប្រើប្រាស់ និងកាន់កាប់អាវុធខុសច្បាប់ បន្ទាប់ពីឃាត់ខ្លួនកាលពីវេលាយប់ថ្ងៃទី២០ ឧសភា ស្ថិតនៅក្នុងស្រុកឆ្លូង ក្រោយពីបុរសរូបនេះ បានយកកាំភ្លើងខ្លីទៅភ្ជង់អ្នកធ្វើដំណើរ នៅពេលបើកបរជែងគ្នាឆ្លងស្ពាន ។
ជនរូបនេះ និងវត្ថុតាងកាំភ្លើងK59 មួយដើម គ្រាប់១បង់ និងរថយន្តLexus XR 300 ពណ៌ខ្មៅ មួយគ្រឿងទៀត ត្រូវបាននគរបាលចាត់បញ្ជូនខ្លួនទៅសាលាដំបូងខេត្តកាលពីព្រឹកថ្ងៃទី២១ ឧសភា បន្ទាប់ពីមានការឃាត់ខ្លួន និងធ្វើការសាកសួររួចមក ។
នគរបាលបានបញ្ជាក់អត្តសញ្ញាណថា ជនរូបនេះឈ្មោះសួន សុភ័ន្ត អាយុ៣៤ឆ្នាំ មានទីលំនៅរាជធានីភ្នំពេញ និងបានអះអាងថា ជាមន្ត្រីយោធាកងយោធពលខេមរភូមិន្ទ នៅយោធភូមិភាគពិសេស ។
តាមការឱ្យដឹងពីនគរបាលព្រហ្មទណ្ឌបានឲ្យដឹងថា កាលពីវេលាយប់ថ្ងៃទី២០ ឧសភា ជនរូបនេះបានជិះរថយន្តចេញពីទីប្រជុំជនខេត្ត ហើយនៅពេលឆ្លងស្ពានពាមទេ ស្ថិតក្នុងសង្កាត់ រការកណ្តាល ក្រុងក្រចេះ ក៏មានរថយន្តអ្នកធ្វើដំណើរបានបើកជែងដណ្តើមឡើងស្ពានដែលមានលក្ខណៈតូចចង្អៀត ។ បន្ទាប់មក ជននេះបានដកកាំភ្លើងភ្ជង់គំរាមអ្នកអ្នកដំណើរ ដែលបើករថយន្តឆ្លងស្ពានដែលជែងជាមួយរថយន្តរបស់គេ ។
អធិការនគរបាលស្រុកឆ្លូង លោកវរសេនីយ៍ត្រី ឌួង សុទ្ធី បានឱ្យដឹងថា បន្ទាប់ពីទទួលបានព័ត៌មានប្តឹងរាយការណ៍ ក្រោមការចង្អុលបង្ហាញលើនីតិវិធីពីសំណាក់លោកឧត្តមសេនីយ៍កម្លាំងនគរបាល បានធ្វើការចាប់ឃាត់ជនរូបនេះបានភ្លាមៗ នៅក្នុងស្រុកឆ្លូង ។ បន្ទាប់ពីមានការចាប់ឃាត់ខ្លួនរួចមក សមត្ថកិច្ចនគរបាលដឹកនាំដោយលោកហាក់ ហ៊ាន់ ព្រះរាជអាជ្ញាររងអមសាលាដំបូងខេត្តកាលពីព្រឹកថ្ងៃទី២១ ឧសភា បានចុះឆែកឆេរលើរថយន្តLuxes របស់ជនសង្ស័យពិនិត្យមើលសារជាថ្មីម្តងទៀត ក្រែងមានលាក់ទុកនូវបទល្មើសណាមួយផ្សេងទៀត ក្រៅពីមានកាំភ្លើងមួយដើមនេះ ៕
ចែករំលែកព័តមាននេះ