ខេត្តប៉ៃលិន ៖ កសិករម្នាក់បានដាំដំណាំពោតក្រហម១ហិកតា និងដាំដំឡូងមីចំនួន១០ហិកតា នៅលើដីចម្ការរបស់ខ្លួន ស្ថិតក្នុងភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន លុះភ្លៀងធ្លាក់ជោកជាំអស់រយ:ពេលជាច្រើនថ្ងៃជាប់ៗ គ្នា បណ្តាលឱ្យទទួលរងការរលួយខូចខាតទាំងអស់ ដោយនៅសល់តែដំណាំពោតក្រហមក៏នាំគ្នាប្រមូលផលលក់ ដើម្បីបានប្រាក់សម្រាប់ផ្គត់ផ្គង់ជីវភាពប្រចាំថ្ងៃ ។
បើតាមប្រភពព័ត៌មានពីស្ត្រីម្នាក់ ឈ្មោះ មុំ អាយុ៤០ឆ្នាំ ជាម្ចាស់ចម្ការពោត និងដំឡូងមីខាងលើ បានរៀបរាប់ឱ្យភ្នាក់ងារសារព័ត៌មានកោះសន្តិភាពដឹង កាលពីរសៀលថ្ងៃទី០៣ ខែវិច្ឆិកា ឆ្នាំ២០២០ថា ៖ នៅចុងឆ្នាំនេះ ពួកគាត់ពិតជាយំមិនចេញ ហើយក៏ដេកមិនលក់បក់មិនល្ហើយនោះទេ ដោយសារតែមេឃភ្លៀងធ្លាក់រាល់ថ្ងៃជាប់ៗគ្នា អស់រយ:ពេលជាយូរ កាលពីថ្មីៗកន្លងទៅ បណ្តាលឱ្យជាំ ទឹកក្នុងចម្ការ រលួយមើមខូចខាតដំណាំដំឡូងមី របស់ខ្លួនគ្មានសល់ សូម្បីតែបន្តិចនោះឡើយ ។
គាត់បន្តទៀតថា ឆ្នាំនេះគាត់ពិតជាមានការខាតបង់អស់ច្រើន ដោយសារចំណាយថវិកាទិញដើមដំឡូងមី យកទៅដាំនៅលើដី១០ហិកតា និងទិញពូជគ្រាប់ពោតក្រោម ដាំនៅលើដី១ហិកតា ដោយសង្ឃឹមថា នៅពេលប្រមូលផល អាចនឹងលក់បានប្រាក់ខ្លះៗ សម្រាប់យកទៅសងជំពាក់គេ ហើយសល់សម្រាប់ផ្គត់ផ្គង់ជីវភាពប្រចាំថ្ងៃ ។ ប៉ុន្តែដោយសារគ្រោះធម្មជាតិភ្លៀងខ្លាំងធ្វើឱ្យគាត់អស់សង្ឃឹមយ៉ាងខ្លាំង ហើយមើលទៅមិនអាចរកថវិកាសងជំពាក់គេរួចរាល់នោះឡើយ ។
គាត់បញ្ជាក់ថា នៅក្នុងចម្ការពោតនេះ គឺមិនទទួលផលបាន១០ភាគរយនោះឡើយ ព្រោះភ្លៀងខ្លាំងពេកធ្វើឱ្យផ្លែពោតខ្លះដុះពន្លកនៅក្នុងផ្លែ ហើយខ្លះទៀតមានការដួលហូរតាមទឹកខូចខាតអស់មួយចំនួនដែរ ។
ចំណែកកម្មករ ឈ្មោះ សេន ភ័ណ្ឌ ភេទស្រី អាយុ៤៧ឆ្នាំ និងឈ្មោះ អ៊ិន ចិត្រា អាយុ៣៣ឆ្នាំ រស់ក្រុងប៉ៃលិន បានឱ្យដឹងដែរថា ការស៊ីឈ្មួលប្រមូលផលផ្លែពោត គឺម្ចាស់ចម្ការគិតឱ្យក្នុង១ការ៉ុង តម្លៃ៧០០០រៀល ដោយក្នុង១ថ្ងៃ ពួកគាត់អាចកាច់ស្នៀតពោតបានប្រហែលជាង១០ការ៉ុង ។
ប្រភពបន្តទៀតថា ដំណាំពោតក្រហម នៅឆ្នាំ២០២០នេះ មិនសូវទទួលផលច្រើនដូចឆ្នាំមុននោះទេ ដោយសារតែពេលពោតកំពុងតែចេញផ្កា និងដាក់ស្នៀត គឺមានភ្លៀងធ្លាក់ខ្លាំងរាល់ថ្ងៃពេកធ្វើឱ្យស្កក លុះពេលពោតទុំមេឃនៅតែភ្លៀង បណ្តាលឱ្យគ្រាប់ពោតដុះពន្លកនៅក្នុងផ្លែតែម្តង ។
ចំណែកកសិករផ្សេងៗទៀត រស់នៅក្នុងខេត្តប៉ៃលិន ជាច្រើននាក់បានត្អូញត្អែរដូចៗ គ្នាថា ពួកគាត់ពិតជាមានការលំបាកយ៉ាងខ្លាំងនៅចុងឆ្នាំ២០២០នេះ ដោយសារតែចម្ការរបស់ខ្លួនរលួយមើមដំឡូងអស់ ។
ចំណែកកន្លែងខ្លះ ត្រូវបង្ខំចិត្តប្រមូលផល ទាំងមើមដំឡូង មិនទាន់គ្រប់អាយុ ហើយក៏លំបាកដឹកយកទៅលក់ ខណ:ទីផ្សារពោតក្រហម១ គីឡូក្រាមឈ្មួញទិញ ៤.៥បាត(ប្រាក់ថៃ) រីឯដំឡូងមី ១គីឡូក្រាម ឈ្មួញទិញ ១.៥បាត ដែលមានការធ្លាក់ចុះជាងឆ្នាំមុនបន្តិច ៕
ចែករំលែកព័តមាននេះ