ខេត្តមណ្ឌលគិរី ៖ ក្រុងសែនមនោរម្យ គឺជាបេះដូងនៃខេត្តមណ្ឌលគិរី និងក៏ជាមជ្ឈមណ្ឌលទេសចរណ៍ដ៏សម្បូរបែបមួយក្នុងព្រះរាជាណាចក្រកម្ពុជា តែការប្រើប្រាស់ទឹកនៅទីក្រុងដ៏ស្រស់ស្អាតនេះ
ខេត្តមណ្ឌលគិរី ៖ ក្រុងសែនមនោរម្យ គឺជាបេះដូងនៃខេត្តមណ្ឌលគិរី និងក៏ជាមជ្ឈមណ្ឌលទេសចរណ៍ដ៏សម្បូរបែបមួយក្នុងព្រះរាជាណាចក្រកម្ពុជា តែការប្រើប្រាស់ទឹកនៅទីក្រុងដ៏ស្រស់ស្អាតនេះ គឺនៅមិនទាន់មានប្រភពស្តង់ដារនៅឡើយ។
ប្រភពទឹកដែលប្រជាពលរដ្ឋរស់នៅក្រុងសែនមនោរម្យកំពុងប្រើប្រាស់នាពេលសព្វថ្ងៃ បានមកពីអណ្តូងជីក អណ្តូងខួង ទឹកអូរ នឹងទឹកបឹង…ខណៈប្រភពទឹកទាំងនេះត្រូវបានមន្ត្រីជំនាញរាយការណ៍ថា ជាទឹកដែលមិនមានគុណភាព ហើយការប្រើប្រាស់អាចនឹងប៉ះពាល់ដល់សុខភាព។
លោកឡុង វិបុល អភិបាលក្រុងសែនមនោរម្យបានឲ្យដឹងថា បច្ចុប្បន្ននេះក្រុងសែនមនោរម្យមានប្រជាពលរដ្ឋរស់នៅចំនួន១២.៩៥៩នាក់ ស្មើនឹង២.៩០១គ្រួសារ ហើយភាគច្រើនពួកគាត់ប្រើប្រាស់ទឹកដែលមានប្រភពពីអណ្តូងខួង(ប្រជាជនរស់នៅតំបន់ប្រជុំជនផ្សារ) ខ្លះអណ្តូងជីក(តាមភូមិ) នឹងខ្លះទៀតប្រើទឹកអូរ ត្រពាំង(ភាគច្រើនជាបងប្អូនជនជាតិដើមភាគតិច) ។
លោកបន្តថា ប្រភពទឹកដែលប្រជាពលរដ្ឋប្រើប្រាស់សព្វថ្ងៃ គឺនៅមិនមានសុវត្ថិភាពចំពោះសុខភាពទេ ដូច្នេះហើយទើបបានជាក្រុមការងារទាំងថ្នាក់ជាតិ និងថ្នាក់ខេត្តបានយកចិត្តទុកដាក់ស្នើសុំឲ្យរាជរដ្ឋាភិបាលជួយពិនិត្យមើល និងអនុវត្តន៍គម្រោងទឹកស្អាតនៅក្រុងទេសចរណ៍នេះ។
កាលពីដើមឆ្នាំ២០១៥កន្លងទៅ ប្រព័ន្ធទឹកស្អាតកំពុងត្រូវបានសាងសង់ និងអាចដាក់ឲ្យប្រើប្រាស់នៅដើមឆ្នាំ២០១៦ខាងមុខនេះ ដោយទទួលបានហិរញ្ញប្បទានឥតសំណងរបស់រាជរដ្ឋាភិបាលជប៉ុនប្រមាណជាទឹកប្រាក់២.១៤២.០០០ដុល្លារអាមេរិក (ពីរលានមួយរយសែសិបពីរពាន់ដុល្លារអាមេរិក)។
ទោះយ៉ាងណាក៏ដោយលោកអភិបាលក្រុងបានបញ្ជាក់ថា ប្រជាពលរដ្ឋត្រឹម៧០%ប៉ុណ្ណោះដែលអាចប្រើប្រាស់នូវគម្រោងទឹកស្អាតខាងលើនេះនៅដំណាក់កាលទីមួយ។ ចំពោះការតភ្ជាប់នឹងតម្លៃសេវានានាត្រូវបានលោក ឯក សុនចាន់ រដ្ឋលេខាធិការក្រសួងឧស្សាហកម្ម និងសិប្បកម្ម បានមានប្រសាសន៍ថា សូមឲ្យប្រជាពលរដ្ឋត្រូវដាក់ពាក្យ និងបំពេញឯកសារមួយចំនួននៅមន្ទីរឧស្សាហកម្មចាប់ពីខែធ្នូ ២០១៥តទៅ។
លោកបន្តថា ចំពោះថ្លៃទឹកដែលលក់ជូនប្រជាពលរដ្ឋក្នុងតម្លៃ២.០០០រៀលក្នុងមួយម៉ែត្រគូប ចំណែកអ្នកប្រើប្រាស់ទឹកអស់ ១០ម៉ែត្រគូបចុះក្នុង១ខែ តម្លៃ១.៨០០រៀល រីឯអ្នកប្រើប្រាស់ទឹកអស់ ១០ម៉ែត្រគូបឡើងក្នុង១ខែ តម្លៃ២.០០០រៀល។ ដោយឡែកថ្លៃភ្ជាប់បណ្តាញប្រើប្រាស់ទៅកាន់ផ្ទះរបស់ពួកគាត់តម្លៃធម្មតា ២៩២.៤០០រៀល។ លោកបានធានាថា គុណភាពទឹកពិតជាមានសុវត្ថិភាពសម្រាប់យកទៅប្រើប្រាស់ ដោយធ្វើការពិសោធន៍តាមបច្ចេកវិទ្យាជប៉ុន ដែលមិនធ្វើឲ្យប៉ះពាល់ដល់សុខភាពអ្នកប្រើប្រាស់ឡើយ៕
ចែករំលែកព័តមាននេះ