អតីតនាយករដ្ឋមន្ត្រីថៃ លោកស្រី យីង ឡាក់ ស៊ីណាវា៉ត្រា កាលពីថ្ងៃទី១៩ ឧសភា អះអាងពីភាពស្លូតត្រង់ពុំបានធ្វើអ្វីខុសរបស់លោកស្រី ពេលបើកសវនាការកាត់ទោសលោកស្រី ចំណែកបងប្រុស លោក ថាក់ ស៊ីន ជាមនុស្សដែលរបបយោធាថៃកំពុងកាន់អំណាចស្អប់យា៉ងខ្លាំងបំផុតនោះ អំពាវនាវឱ្យគោរពច្បាប់ ។
បាតុករជាច្រើនសិបនាក់ដែលលើកគ្នាមកជួយគាំទ្រលោកស្រីនៅមុខតុលាការកំពូលពេលបើកសវនាការ បាននាំគ្នាស្រែកថា «យីងឡាក់ខំតស៊ូឡើង» ។ បាតុកម្មប្រជាជននេះហាក់ដូចជាការផ្គើនមួយចំពោះរបបយោធាដែលកាន់អំណាចក្នុងប្រទេសថៃ ខណៈដែលការប្រមូលផ្តុំមនុស្សសម្រាប់ទិសដៅនយោបាយនៅតែហាមឃាត់រួចការបោះឆ្នោតត្រូវពន្យារពេលគ្មានកាលកំណត់ ។
លោកស្រី យីង ឡាក់ ថ្លែងនៅមុខតុលាការថា ខ្ញុំគ្មានប្រព្រឹត្តអ្វីខុសទេ ហើយខ្ញុំសង្ឃឹមថា តុុលាការនឹងផ្តល់យុត្តិធម៌ដល់រូបខ្ញុំ ។ លោកស្រីអះអាងថា លោកស្រីពុំបានធ្វើខុសចំពោះការចោទប្រកាន់ពីបទធ្វេសប្រហែសក្នុងកម្មវិធីជួយប្រជាកសិករ ដែលចំណាយប្រាក់ច្រើនហើយគេចោទថា មានអំពើពុករលួយក្នុងកម្មវិធីនោះ ។
លោកស្រី យីង ឡាក់ និយាយថា លោកស្រីពុំរត់ភៀសខ្លួនចេញពីប្រទេសដើម្បីគេចពីតុលាការដូចករណីបងប្រុស លោក ថាក់ ស៊ីន ស៊ីណាវា៉ត្រា ដែលជ្រើសរើសយកការរស់នៅនិរទេសក្រៅស្រុក គេចពីទោសជាប់គុកច្រើនឆ្នាំពីបទពុករលួយ ក្រោយរដ្ឋប្រហារទម្លាក់រូបលោកកាលពីឆ្នាំ២០០៦ ។
ពេលដែលប្អូនស្រីលោកខិតខំប្រកាសនៅមុខតុលាការពីភាពស្លូតត្រង់ ពុំប្រព្រឹត្តអ្វីខុស លោក ថាក់ ស៊ីន នៅទីក្រុងសេអូ៊ល បានធ្វើការកត់សម្គាល់មួយលើភាពចាំបាច់នៃឯករាជ្យភាពរបស់តុលាការដោយលោកចៀសវាងមិននិយាយយោងដល់វាសនារបស់ប្អូនស្រីលោកឡើយ ។
ក្នុងវេទិការបស់អ្នកវិនិយោគនៅ ក្រុងសេអ៊ូល លោក ថាក់ ស៊ីន ថ្លែងថា គន្លឹះនៃអភិបាលកិច្ចល្អ និងលទ្ធិប្រជាធិបតេយ្យ គឺត្រូវស្វែងរកតុល្យភាពមួយរវាងអំណាចតុលាការ អំណាចសភា និងនីតិប្រតិបត្តិ ។ គេត្រូវគោរពច្បាប់ ដែលនោះជាចំណុចសំខាន់បំផុតសម្រាប់ភាពជឿជាក់របស់ប្រទេសនីមួយៗ ។ ក្នុងប្រទេសនីមួយៗតែងមានជានិច្ចនូវសង្គម២ គឺសង្គមពួកអ្នកមាន និងសង្គមពួកអ្នកក្រ ។ សង្គមពួកអ្នកមាន មានកាលានុវត្តភាពនានាតែសង្គម ពួកអ្នកក្រមានកាលានុវត្តភាពតិចតួចបំផុត ។ លោកបន្តថា យើងត្រូវលុបបំបាត់ចោលភាពក្រីក្រ ពិសេសក្នុងបណ្តាប្រទេសកំពុងមានសេដ្ឋកិច្ចហក់ឡើងដើម្បីឱ្យប្រជាជនជ្រើសរើសអ្នកនយោបាយល្អៗ ហើយថែរក្សាលទ្ធិប្រជាធិបតេយ្យល្អមួយ ។
អ្នកវិភាគជាច្រើនយល់ឃើញថា សវនាការកាត់ទោសប្រឆាំងលោកស្រី យីង ឡាក់ គឺជាអន្លូងចុងក្រោយសំពងលើគ្រួសារស៊ីណាវា៉ត្រា ដែលមានឥទ្ធិពលលើឆាកនយោបាយថៃខ្លាំង ចាប់តាំងពី១៥ឆ្នាំមកហើយប្រឈមមុខនឹងពួកអាមាត្យអភិរក្សនិយម និងពួករាជានិយមជ្រុល ដូចជាកងទ័ពដែលកំពុងកាន់អំណាចសព្វថ្ងៃ ។
ទោះបីយា៉ងណា ពួកអ្នកវិភាគទាំងនោះនិយាយថា ចាប់លោកស្រី យីង ឡាក់ ដាក់គុក នឹងគ្រាន់តែជាការបង្កើនកំហឹងរបស់ពួកអាវក្រហម ដែលជាចលនាប្រជាជនស្និទ្ធលោក ថាក់ ស៊ីន ដ៏ខ្លាំងមួយ ដែលចាប់តាំងពីក្រោយរដ្ឋប្រហារមកនៅតែគោរពតាមការណែនាំរបស់បណ្តាមេដឹកនាំ កុំឱ្យនាំគ្នាធ្វើបាតុកម្ម ហើយរក្សាភាពស្ងប់ស្ងាត់ ។
ក្រោយសវនាការលើកនេះ ដែលមានរយៈពេលខ្លី សវនាការនាពេលខាងមុខគ្រោងធ្វើនាថ្ងៃទី២១ កក្កដា ហើយក្នុងដំណាក់កាលនេះ លោកស្រី យីង ឡាក់ នៅ តែមានសេរីភាព ក្រោយពីដាក់ប្រាក់ធានា៣០លានបាត តែលោកស្រីនៅតែត្រូវហាមឃាត់មិនឱ្យធ្វើដំណើរទៅក្រៅប្រទេស ៕
ចែករំលែកព័តមាននេះ