រដ្ឋាភិបាលថៃនឹងលក់អង្ករ2លានតោនក្នុងអំឡុងពេល2ខែ
បាងកក ៖ បណ្តាញព័ត៌មានថៃផ្សាយថា រដ្ឋាភិបាលកំពុងត្រៀមបញ្ចេញអង្ករ ប្រមាណជា២លានតោនក្នុងរយៈពេល២ខែ ក្រោយ ដើម្បីបង្រួមផលប៉ះពាល់ឲ្យកាន់តែតិចលើការបង្កបង្កើនផលស្រូវថ្មី
បាងកក ៖ បណ្តាញព័ត៌មានថៃផ្សាយថា រដ្ឋាភិបាលកំពុងត្រៀមបញ្ចេញអង្ករ ប្រមាណជា២លានតោនក្នុងរយៈពេល២ខែ ក្រោយ ដើម្បីបង្រួមផលប៉ះពាល់ឲ្យកាន់តែតិចលើការបង្កបង្កើនផលស្រូវថ្មី ស្របតាមធាតុអាកាសខែនេះ ។ នេះបើតាមលោកស្រីChutima Bunyapraphasara លេខាធិការអចិន្ត្រៃយ៍នៃក្រសួងពាណិជ្ជកម្មបានបង្ហើបឲ្យដឹងបន្ទាប់កិច្ចប្រជុំនៃគណៈកម្មាធិការរៀបចំគោលនយោបាយ និងគ្រប់គ្រងអង្ករកាលពីថ្ងៃចន្ទ ដែលបានពិភាក្សាលើការបញ្ចេញអង្ករក្នុងស្តុករបស់រដ្ឋាភិបាលចំនួន១៦លានតោន ។
បរិមាណ៥លានតោនគឺជាប្រភេទអង្ករគុណខ្ពស់ ចំណែក២លានតោន រដ្ឋាភិបាលបានលក់រួចមកហើយ រីឯ២លានតោនទៀតនឹងត្រូវបានលក់ក្នុងរយៈពេល២ខែ ។ ជាមួយគ្នានោះដែរ អង្ករចំនួន១០លានតោននៅក្នុងស្តុកគឺជាប្រភេទគុណភាពទាបឬធុនអន់។ ជាងនេះទៅទៀត ក្រសួងនឹងចាត់ឲ្យមានអ្នកពិនិត្យមើលមួយចំណែកនៃអង្ករនេះដើម្បីកំណត់ថា តើវាអាចប្រើប្រាស់ជាអាហារសម្រាប់មនុស្សនិងសត្វឬយ៉ាងណា ។ ប្រសិនជាមិនអាចទទួលទានបានទេ អង្ករមួយភាគនេះនឹងត្រូវលក់ទៅឲ្យបណ្តារោងចក្រផលិតអេតាណុល និងអាល់កុលជាដើម ។
ម្យ៉ាងទៀត ក្រសួងរំពឹងថា នឹងទទួលបានប្រមាណជា២០០ពាន់លានបាតឬ៦ពាន់លានដុល្លារពីការលក់អង្ករក្នុងស្តុកទាំងអស់១៦លានតោននេះ ។
ទោះជាយ៉ាងណា រដ្ឋាភិបាលអាចលក់អង្ករបាន៣,៤លានតោន គិតចាប់ពីដើមឆ្នាំនេះ។ ក្រសួងរំពឹងថា នឹងលក់បានក្នុងតម្លៃចន្លោះពី២៤៥,៧៨ដុល្លារ-២៥៤,៧៧ដុល្លារក្នុងមួយតោន ៕
ចែករំលែកព័តមាននេះ