ខេត្តព្រះសីហនុ ៖ ពិតជាថ្លើមពាសមេឃមែន ហើយបានលួចចាក់ដីចូលក្នុងដែននេសាទបឹងកង្កែប ស្ថិតក្នុងភូមិអុង ឃុំរាមស្រុកព្រៃនប់ ខេត្តព្រះសីហនុ ដែលកំពុងត្រូវបានអាជ្ញាធរធ្វើការស្រាវជ្រាវ ដើម្បីដោះស្រាយតាមផ្លូវច្បាប់ បន្ទាប់ពីអាជ្ញាធរបានពិនិត្យឃើញថា ក្នុងដីដែននេសាទបឹងកង្កែប ត្រូវបានជនមិនស្គាល់អត្តសញ្ញាណ បានលួចចាក់ដីចូលក្នុងផ្ទៃបឹងទំហំប្រមាណជាជាង៣០ម៉ែត្រ៤ជ្រុង ។
លោកព្រំ ប៊ុន្នី នាយករងរដ្ឋបាលស្រុកព្រៃនប់ បានឱ្យដឹងថា ទោះបីជាក្រុមការងារចម្រុះចុះទៅដល់ទីតាំង ហើយមិនបានឃើញគ្រឿងចក្រកំពុងធ្វើសកម្មភាពកាយចាក់ចូលបឹងក៏ដោយ តែតាមការណែនាំពីលោក គួច ចំរើន អភិបាលខេត្តព្រះសីហនុ ត្រូវបន្តស្រាវជ្រាវ រកជនដែលពាក់ព័ន្ធមកធ្វើការតាមផ្លូវច្បាប់។
លោកនាយករងរដ្ឋបាលស្រុកព្រៃនប់ បន្តថា ហើយជំហានដំបូង ត្រូវស្រាវជ្រាវរកគ្រឿងចក្រ និងឈានទៅរកជននៅពីក្រោយខ្នង ដែលបានបញ្ជាក្នុងការចាក់ដីចូលបឹងធម្មជាតិនេះ ។
លោក ព្រំ ប៊ុន្នី បានបន្តថា គិតត្រឹមល្ងាចថ្ងៃទី២ ខែវិច្ឆិកានេះ ម្ចាស់គ្រឿងចក្រ ដែលបានចាក់ដីចូលបឹងកង្កែបនេះ ត្រូវបានស្រាវជ្រាវស្គាល់មុខហើយ ដែលមានឈ្មោះ សាន រ៉ង់ឌី ហៅឌី ភេទប្រុស អាយុ៣០ឆ្នាំ ទីលំនៅបច្ចុប្បន្នក្នុងភូមិគៀនឃ្លាំង សង្កាត់ជ្រោយចង្វារ រាជធានីភ្នំពេញ ។
ហើយបើតាមចម្លើយរបស់ឈ្មោះឌី រូបនេះ បានឆ្លើយក្នុងកំណត់ហេតុឱ្យដឹងថា ឈ្មោះមាន អាយុ៣៨ឆ្នាំ ជាអ្នករស់នៅភូមិអុង បានជួលខ្លួនឱ្យមកឈូសឆាយ ដោយបានប្រាប់ថា មានលិខិតអនុញ្ញាតត្រឹមត្រូវ ដោយខ្លួនជាអ្នកចំងាយ ហើយចំណូលថ្មីពុំបានដឹងទីតាំងដីនោះខុសច្បាប់ ក៏សម្រេចឈូសឆាយទៅ ។ ដីដែលបានចាក់នេះ ត្រូវបានអាជ្ញាធរឱ្យគ្រឿងចក្រកាយយកដីចេញទាំងអស់ ។
អ្នករំលោភយកបែបនេះ ច្រើនតែបានរួចខ្លួន ។ ចាំមើលទៀត បើគ្មានទោសទេ ថ្ងៃក្រោយកើតមានទៀត ធ្វើឱ្យសង្គមរវល់តែអាចម៌ឯង ។
គួររំលឹកថា ៖ ទីតាំងលួចចាក់ដីចូលបឹងប្រវត្តិសាស្ត្រមួយកន្លែងត្រូវរដ្ឋបាលបញ្ជាឱ្យកាយដីចេញវិញ ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ