សហរដ្ឋអាមេរិក ៖ ពលរដ្ឋអាមេរិកជាង៩០លាននាក់បោះឆ្នោតប្រធានាធិបតីរួចហើយ មុនពេលកំណត់ ដែលនោះជាចំនួនដ៏ខ្ពស់បំផុតពុំធ្លាប់មានពីមុនមក ចំពោះការបោះឆ្នោតមុនបែបនេះ។
ខណៈការបោះឆ្នោតនោះត្រូវប្រព្រឹត្តទៅនាថ្ងៃទី៣វិច្ឆិកា ការបោះឆ្នោតមុនកាលកំណត់ដ៏ច្រើនបែបនេះ តំណាងឲ្យប្រមាណជាង៦៥%នៃចំនួនអ្នកបោះឆ្នោតសរុប ក្នុងពេលបោះឆ្នោតប្រធានាធិបតីអាមេរិកកាលពីឆ្នាំ២០១៦។
ការទៅបោះឆ្នោតច្រើនមុនកាលកំណត់បែបនេះ បណ្ដាលមកពីការជម្រុញរបស់បេក្ខជនទាំង២រូប លោកដូណាល់ត្រាំនិងលោកចូបៃដេននិងដោយសារការភ័យខ្លាច ចំពោះការឆ្លងរាលដាលខ្លាំងបំផុតនៃវីរុស COVID-19 ក្នុងប្រទេសមហាអំណាចនោះ ដែលកំពុងតែមានសភាពកាន់តែខ្លាំងក្លា។
ក្នុងរដ្ឋភាគច្រើនបណ្ដាអ្នកបោះឆ្នោតមានលទ្ធភាពទៅបោះឆ្នោតមុនពេលកំណត់ អាចទៅបោះដោយផ្ទាល់ឬបោះតាមប្រៃសណី។
យោងតាមការស្ទាបស្ទង់មតិចុងក្រោយថា បណ្ដាអ្នកចង់បោះឆ្នោតឲ្យលោកបៃដេននៅតែនាំមុខដល់៥១% ទល់នឹង៤៣% សម្រាប់លោកត្រាំក្នុងកម្រិតជាតិ តែលទ្ធផលនៅមិនច្បាស់ក្នុងរដ្ឋជាច្រើន ដែលអាចធ្វើឲ្យលទ្ធផលចុងក្រោយនៃការបោះឆ្នោតនោះក្រឡាប់ចក្រ។
ម្យ៉ាងទៀតតាមអ្នកឯកទេសម្នាក់ថា លោកដូណាល់ត្រាំចង់ឲ្យតុលាការកំពូលអាមេរិក ជាអ្នកផ្ដល់សុពលភាពដល់ជ័យជម្នះ របស់លោក ក្នុងបណ្ដារដ្ឋដែលលទ្ធផលនឹងមានបញ្ហាតវ៉ា ខណៈក្នុងតុលាការនោះ លោកមានប្រៀបស្រាប់ ក្រោយពីលោកបានតែងតាំងចៅក្រមថ្មីម្នាក់ ជាអ្នកអភិរក្សនិយម សម្រាប់ជំនួសចៅក្រមដែលទទួលមរណភាពមក។
អ្នកឯកទេសរូបនោះ លោកស្រីMARIE -CECILE NAVESនាយិកាខាងការស្រាវជ្រាវរបស់វិទ្យាស្ថានទំនាក់ទំនងអន្តរជាតិនិងយុទ្ធសាស្ត្រ អះអាងនាថ្ងៃទី១វិច្ឆិកាថា ប្រសិនបើលោកត្រាំមានចៅក្រម៣រូប ក្នុងតុលាការកំពូល ដើម្បីផ្ដល់សុពលភាពចំពោះអ្វីដែលលោកចង់បាន នោះលោកអាចក្រឡុកចំពោះការបោះឆ្នោយនោះ នៅតាមរដ្ឋខ្លះពិសេសក្នុងបណ្ដារដ្ឋគន្លឹះ បើលទ្ធផលមានការប្រកៀកប្រកិតគ្នាខ្លាំង។ ទោះបីយ៉ាងណាលោកស្រីថា បណ្ដាចៅក្រមប្រកាន់ជំហរឯករាជ្យ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ