រាជធានីភ្នំពេញ ៖ ចំណងអាពាហ៍ពិពាហ៍រយៈពេលជាង១៤ឆ្នាំរវាងលោកយ៉ែម សំអូន និងអ្នកនាងយ៉ាន លីដា កាន់តែបង្ហាញច្បាស់ពីការបែកបាក់មិនអាចផ្សារភ្ជាប់វិញបាន បន្ទាប់ពីអ្នកនាងយ៉ាន លីនដា
រាជធានីភ្នំពេញ ៖ ចំណងអាពាហ៍ពិពាហ៍រយៈពេលជាង១៤ឆ្នាំរវាងលោកយ៉ែម សំអូន និងអ្នកនាងយ៉ាន លីដា កាន់តែបង្ហាញច្បាស់ពីការបែកបាក់មិនអាចផ្សារភ្ជាប់វិញបាន បន្ទាប់ពីអ្នកនាងយ៉ាន លីនដា បដិសេធមិនទទួលយកការសូមអភ័យទោសពីលោកយ៉ែម សំអូន ។
អ្នកនាងយ៉ាន លីនដា បានឆ្លើយតប ភ្លាមៗ បន្ទាប់ពីលោកយ៉ែម សំអូន ថ្លែងសូមទោសតាមហ្វេសប៊ុក ។ អ្នកនាងយ៉ាន លីនដា ចាត់ទុកសាររបស់លោកយ៉ែម សំអូន គឺគ្រាន់តែជាលេសបិទបាំងអំពើអាក្រក់របស់លោកពីភ្នែកមហាជនប៉ុណ្ណោះ ខណៈមហាជនមិនបានដឹងពីភាពឈឺចាប់របស់នាងឡើយ ។
អ្នកនាងយ៉ាន លីនដា សរសេរសារបកស្រាយ និងឆ្លើយតបការសូមទោសពីលោក យ៉ែម សំអូន លើទំព័រហ្វេសប៊ុករបស់ខ្លួនថា «នៅក្នុងការឆ្លើយតបទៅនឹងសំណេរដែលរ៉ាយរ៉ាប់សេចក្តីសូមអភ័យទោសរបស់អ្នក ខ្ញុំសូមអធិប្បាយប្រកបដោយការសម្រេចចិត្តច្បាស់លាស់មួយសម្រាប់គោលការណ៍ជីវិតរបស់ខ្ញុំដែលតែងតែស្រែកទាមទារឱ្យខ្ញុំត្រូវតែធ្វើ។ មនុស្សស្រីដូចខ្ញុំ គិតៗទៅគឺពូកែទ្រាំហួសហេតុពេកហើយ មកដល់ថ្ងៃនេះទើបខ្ញុំដឹងច្បាស់ថា ហេតុអីខ្ញុំធ្វើបាបខ្លួនម្ល៉េះ ? ដូច្នេះស្រីម្នាក់នេះឈប់ទ្រាំទៀតហើយ ខ្ញុំលែងមានកម្លាំងសម្រាប់ទ្រទម្ងន់ទុក្ខ និងការឈឺចាប់ទៀតហើយ ទើបខ្ញុំត្រូវឱ្យតម្លៃៃខ្លួនឯងជាលើកចុងក្រោយដោយការដើរចេញប្រសើរជាងរង់ចាំគេដោះលែង ហើយនៅតែទ្រាំឱ្យគេទន្ទ្រានចិត្តរាល់ថ្ងៃ តើរស់ក្នុងជីវិតបែបនេះ សុភមង្គលស្ថិតនៅត្រង់ណា ? តើចាំឱ្យគេជាអ្នកទាត់ខ្ញុំចោលឬ ? តើនៅពេលនោះតម្លៃជាមនុស្ស ជាស្ត្រី ស្ថិតនៅត្រង់ណា? វាច្បាស់ណាស់ហើយ ខ្ញុំប្រាកដថាមហាជនទូទៅពិតជាបានមើលឃើញយ៉ាងច្បាស់សំណេរសូមអភ័យទោសរបស់គាត់នោះ ក៏ព្រោះតែគាត់បានដឹងថា ការភូតកុហក និងលេសរបស់គាត់មិនទទួលបានជោគជ័យ ការលាងខ្លួនរបស់គាត់ពីមហាជនលាងមិនជ្រះ នៅតែជាប់ក្លិនជាមនុស្សអាក្រក់ ហិង្សា កាចសាហាវ ចុះក្រែងប្រកែកថាខ្លួនមិនបានធ្វើទេ ជាឧបទ្ទវហេតុ ? ប្រកែកដាច់ខាតថាជាការយល់ច្រឡំ ខ្លួនមិនបានធ្វើ ? ចុះបើដឹងខ្លួនខុសទទួលថាធ្វើ ម៉េចពីដំបូងប្រកែកម៉េះ្ល ? ពេលដឹងថា ខ្លួនឯងមិនទទួលជោគជ័យក៏មកទទួលកំហុសទាមទារយកការអាណិត? ចុះខ្ញុំឈឺចាប់ទាំងកាយ ទាំងចិត្តពេញមួយជីវិត ហើយនរណាទៅដែលគួរឱ្យអាណិត តែខ្ញុំដឹងថា អ្នកគ្មានក្តីអាណិតសម្រាប់ខ្ញុំទេ ព្រោះបើមិនដូច្នោះទេ អ្នកក៏លើកដៃប្រើកម្លាំងបាយមកលើខ្ញុំជាស្រីទន់ខ្សោយមិនបានដែរ តើនរណាខ្លះទៅដែលដឹងថាមនុស្សមាត់ផ្អែមពីសម្បកក្រៅដូចអ្នក តែធាតុពិតវាបែបហ្នឹង សម្រាប់ខ្ញុំជាង១០ឆ្នាំមកនេះ ខ្ញុំស្គាល់ច្បាស់ហើយ ស្គាល់រហូតស្បថសុំស្មាលា ព្រោះខ្ញុំស្គាល់ច្បាស់ខ្លាំងពេក ។
គាត់និយាយថា គាត់ស្រឡាញ់ខ្ញុំ ប៉ុន្តែអស់រយៈពេល១៤ឆ្នាំមកហើយ គាត់គួរតែឱ្យតម្លៃខ្ញុំ ព្រោះខ្ញុំជាប្រពន្ធម្នាក់ដែលមិនដែលដេកផ្ទះចាំតែហ៊ឺហា ចាយលុយប្តីទេ ខ្ញុំប្រឹងធ្វើការទាំងឈឺទាំងជា ពេលខ្លះស្ទើរតែវារទៅធ្វើការ តើគាត់ដែលមានកូនចិត្តអាណិតខ្ញុំខ្លះទេ! ចម្លើយគឺ គ្មានៗសោះតែម្តង អ្វីដែលគាត់ផ្តល់ឱ្យខ្ញុំ គឺមានតែការរំលោភបំពានដោយពាក្យសម្តី ផ្លូវចិត្ត អារម្មណ៍ និងរាងកាយ តាមចរិតធម្មជាតិរបស់គាត់ប៉ុណ្ណោះ ហើយក៏គ្មានថ្ងៃគាត់កែដែរ ខ្ញុំសឹងតែភ្នាល់ដាក់ជីវិត ។
អំពើរបស់គាត់ គឺមិនអាចលើកលែងបានទេ? មកដល់ពេលនេះគាត់បានប្តេជ្ញាចិត្តសូមអភ័យទោស ដើម្បីបង្ហាញឱ្យមហាជនបានឃើញ តែគាត់គ្រាន់តែធ្វើឱ្យមហាជនមើល ចុះខ្ញុំនិងគ្រួសារខ្ញុំ ? បើសិនជាខ្ញុំផ្តល់ឱ្យម្តងហើយម្តងទៀតគាត់នឹងមានមោទនភាពជាមួយការអភ័យទោសរបស់ខ្ញុំម្តងហើយម្តងទៀតដូចគ្នា ហើយក៏ច្បាស់១០០% ថានឹងមានរឿងនេះម្តងហើយម្តងទៀត រហូតដល់មានថ្ងៃមួយធ្វើទាល់តែខ្ញុំស្លាប់ ហើយក៏និយាយថាសូមទោសគ្មានចេតនាទេ គ្មានចេតនារហូតអីុចឹងទៅ ? តើមានមនុស្សប៉ុន្មាននាក់ដែលធ្វើរឿងអចេតនារាប់មិនអស់យ៉ាងនេះហើយរឿងគ្រប់យ៉ាងដែលបានកើតឡើងសុទ្ធតែខ្លួនគាត់ជាអ្នកប្រព្រឹត្ត ហើយបានគ្រោងទុកជាមុន ដល់ពេលខ្ញុំចាប់បាននៅតែប្រកែកថាទេ មិនដែលចេះទទួលកំហុស ។
គាត់បានសរសេរថា គាត់ស្រឡាញ់កូនស្រីណាស់ តើស្រឡាញ់របៀបណាទៅ ? ធាតុពិតគាត់មិនបានទៅជួបកូនដោយស្ម័គ្រចិត្តនោះទេ ហ្នឹងឬជាក្តីស្រឡាញ់របស់ឪពុកចំពោះកូន? ជំនួសមកវិញគាត់ posts សារជាធាសាធារណៈ ដោយប្រាប់សាធារណជនអំពីរបៀបដែលគាត់មិនអាចជួបកូន គឺដោយសារតែការធ្វើការងារ តែទំនេរគាត់ទៅដើរលេងបាន ! ហ្នឹងហើយលោកឪពុកដែលស្រឡាញ់កូន ។
លោកនិយាយថា លោកគឺជាមនុស្សម្នាក់ដែលបានសាងនូវកំហុស ប៉ុន្តែរហូតមកដល់ថ្ងៃនេះ វិនាទីនេះ គាត់នៅតែជាមនុស្សកុហកដដែល ហើយបានបន្តការនិយាយកុហកនិងរៀបចំលាងខ្លួនឯង និពន្ធរឿងខ្លួនឯង ដឹកនាំរឿងខ្លួនឯង ហើយសម្តែងដោយខ្លួនឯងឱ្យមនុស្សគ្រប់គ្នានៅជុំវិញខ្លួនគិតថាគឺរូបគាត់ទេទើបជាជនរងគ្រោះពិតប្រាកដ ។
គាត់និយាយអំពីអតីតកាលរបស់ខ្ញុំដែលមិនស្គាល់អ្វីបន្តិចសោះពីសិល្បៈ ហើយគាត់គឺជាបុរសម្នាក់ដែលដឹកដៃខ្ញុំដើររហូតមកដល់ពេលនេះ សួរថាបើខ្ញុំគ្មានសមត្ថភាពគ្រប់យ៉ាងអាចទៅរួចទេ ? គាត់បានចោទខ្ញុំថា ខ្ញុំមិនស្មោះត្រង់ ប៉ុន្តែអ្នកដែលមិនស្មោះត្រង់នោះគឺជាគាត់ទៅវិញទេ ហើយការណ៍ពិតវាបានបង្ហាញច្បាស់ទៅហើយថាអ្វីដែលគាត់ត្រូវការនោះគឺមិនមែនខ្ញុំដែលជាប្រពន្ធនោះទេ ហើយក៏មិនមែនមនុស្សស្រីណាផ្សេងដែរ គឺគាត់ត្រូវការ«ប្រុស»។
គាត់បានស្បថដាក់ជីវិតរបស់គាត់ថា គាត់ មិនបានធ្វើអីុចឹង ។ ខ្ញុំចាប់បានហើយក៏នៅតែប្រកែក ហើយទៅជាមកលាបពណ៌ឱ្យមហាជនគិតថា ប្រហែលមកពីខ្ញុំក្បត់ប្តីទើបប្តីតាមទាន ់ហើយប្រើអំពើហិង្សា តើនរណាជាអ្នកតាមទាន់នរណា? តើគាត់នៅមានចិត្តស្រឡាញ់ខ្ញុំស្អីទៀត គ្រប់យ៉ាងគ្រាន់តែជាការកុហក បំភ័ន្តភ្នែក ព្រោះនៅពីក្រោយខ្នងរបស់ខ្ញុំគាត់បានទាក់ទងបុរសជាច្រើន ។
ខ្ញុំមានពេលវែងបំផុតសម្រាប់សាងសុភមង្គលរវាងម្តាយនិងកូនរបស់ខ្ញុំ នោះក៏ព្រោះតែវាជាសុភមង្គលមួយដែលបានពីក្តីស្រឡាញ់ពិតប្រាកដ រវាងម្តាយនិងកូន ហើយខ្ញុំត្រូវតែបង្ហាញមុខមាត់ពិតរបស់គាត់ទៅកាន់ពិភពលោក ដោយសារតែខ្ញុំមិនចង់ឱ្យកូនស្រីជាទីស្រឡាញ់របស់ខ្ញុំ ត្រូវគេប្រមាថពេបជ្រាយដោយភាពអាម៉ាស់ និងការរងទុក្ខវេទនា ឈឺចាប់ ផ្ដេសផ្ដាស មួយនេះដែលខ្ញុំបានស៊ូទ្រាំពីគាត់ ។ ប៉ុន្តែនៅក្នុងការប៉ុនប៉ងរបស់គាត់ដើម្បីជួយសង្គ្រោះខ្លួន ឬ គឺជាការត្រៀមខ្លួនជាស្រេចដូចដែលធ្លាប់បានកុហកប្រជាជនកម្ពុជាក្នុងការកេងចំណេញយកការអាណិតអាសូរពីមហាជន ។ ការសម្តែងជាសាធារណៈរបស់គាត់គឺជាការសម្តែងខុសពីចរិតពិតរបស់គាត់ទាំងស្រុង ។ បងប្អូនជនរួមជាតិជាទីគោរព ស្រឡាញ់របស់ ខ្ញុំៗមិនអនុញ្ញាតឱ្យកេរ្តិ៍ឈ្មោះ កិត្តិយស និងជីវិតរបស់ខ្ញុំមកប្រឡាក់ និងក្តោបក្តាប់ ឃុំឃាំងជាន់ឈ្លីដូចទាសករ ដោយបុរសដ៏អាក្រក់នេះទៀតទេ ។ ខ្ញុំត្រូវបានក្លាយជាជនរងគ្រោះមួយរូបអស់រយៈពេល១៤ឆ្នាំ ។ ខ្ញុំខិតខំអត់ធ្មត់ សង្កត់ចិត្តនៅស្ងៀម ទ្រាំបៀមទុក្ខអស់រយៈពេល១៤ឆ្នាំ ។ ខ្ញុំសង្ឃឹមថា រយៈពេល១៤ឆ្នាំ បុរសម្នាក់នេះនឹងផ្លាស់ប្តូរចរិតរបស់គេ ហើយខិតខំឱ្យជីវិតប្តីប្រពន្ធមានការណ៍ប្រសើរទៅមុខ ពិសេសគឺដើម្បីកូន ។ ប៉ុន្តែឥឡូវនេះខ្ញុំដឹងថា អ្វីដែលគាត់យកចិត្ដទុកដាក់បំផុតនោះ គឺចំពោះតែខ្លួនគាត់ផ្ទាល់ប៉ុណ្ណោះ ។ គ្រប់យ៉ាងដែលខ្ញុំនិយាយគឺជាការណ៍ពិតទាំងអស់ ហើយប្រសិនបើមានអ្នកជឿតាមសម្តីកុហករបស់គាត់ក៏ជឿចុះ ។
សម្រាប់ខ្ញុំមិនមានជម្រើសផ្សេងទេ គឺមានតែការដើរចេញប៉ុណ្ណោះ ទើបអាចចេញផុតពីក្រញាំដ៏កាចសាហាវមួយនេះបាន ។ ដើម្បីបង្ហាញពីការកុហករបស់ប្រុសម្នាក់នេះ ខ្ញុំត្រូវតែលាតត្រដាងនូវការពិតទាំងអស់ ហើយក៏ដើម្បីការពារកិត្តិយសរបស់ខ្ញុំជាស្រីផងដែរ ។ សូមចាំថា ខ្ញុំដើរចេញព្រោះការប្រមាថ ជាន់ឈី្ល ធ្វើបាបពីអ្នក រួមទាំងការកុហកបោកប្រាស់ និងការផិតក្បត់ ។ គាត់បានស្បថដាក់ជីវិតរបស់គាត់ថា គាត់បានប្តេជ្ញាចិត្តដោយស្មោះត្រង់ជាមួយនឹងខ្ញុំដោយការមិនមានស្នេហាជាមួយបុរស ប៉ុន្តែទីបំផុតគាត់នៅតែមិនអាចធ្វើបាន នៅតែមិនអាចក្បត់អារម្មណ៍ពិត និងចំណូលចិត្តពិតរបស់គាត់បាន តើនៅតែប្រកែកធ្វើអី បើខ្ញុំចាប់បានអស់ទៅហើយៗ ក៏មិនមែនលើកទីមួយ ឬម្នាក់ដែរ អ្នកធ្វើហេតុអ្វីមិនហ៊ានទទួល ?
ខ្ញុំពិតជាសោកស្តាយដោយការសូមទោសនេះគឺជាការសូមទោសដោយមិនស្មោះត្រង់។ គាត់នៅតែព្យាយាមបញ្ជាក់ថា វាជារឿងចៃដន្យមួយទាំងការប្រើហិង្សាមកលើរូបរាងកាយរបស់ខ្ញុំ ។ ពេលដឹងរឿងពិតទាំងអស់ ខ្ញុំឈឺចាប់ណាស់ តែកូនស្រីរបស់ខ្ញុំបានប្រាប់ខ្ញុំថា ម៉ាក់ត្រូវរឹងមាំ ក្រោកឈរឡើង ហើយដើរទៅមុខ កូនជាអ្នកដឹកដៃម៉ាក់ ។ ពេលនេះខ្ញុំគោរពតាមការសម្រេចចិត្តរបស់ខ្ញុំ ចង់ផ្លាស់ប្តូរជាមួយនឹងជីវិតរបស់ខ្ញុំដោយសន្តិវិធីចាប់ពីពេលនេះទៅ ។ គ្រប់រឿងទាំងអស់ដែលនាងខ្ញុំបានបំភ្លឺពេលនេះគឺជាការណ៍ពិតទាំងស្រុង ហើយក៏គ្មានថ្ងៃដែលនាងខ្ញុំយកជីវិតរបស់ខ្លួនឯងមកឱ្យបុរសម្នាក់នេះជាន់ឈ្លីជាថ្មីម្តងទៀតដែរ ៕
ចែករំលែកព័តមាននេះ