រាជធានីភ្នំពេញ ៖ ដើម្បីចូលរួមផ្សព្វផ្សាយការយល់ដឹងនៃជំងឺមហារីកសុដន់ដែលតែងតែរៀបចំឡើងជារាងរាល់ឆ្នាំ ក្រុមហ៊ុនធានារ៉ាប់រងអាយុជីវិត AIA ប្រចាំនៅកម្ពុជា ចាប់ផ្តើមបើកយុទ្ធនាការផ្សព្វផ្សាយការយល់ដឹង និងការការពារខ្លួនពីជំងឺមហារីកសុដន់ទទួលយកការពិនិត្យទាន់ពេលវេលា (Fit for Hope 2020) នៅក្នុងខែតុលានេះក្នុង គោលបំណងដើម្បីបង្កើនការយល់ដឹងអោយកាន់តែទូលំទូលាយពីជំងឺមហារីកសុដន់និងប្រមូលថវិកាសម្រាប់ជួយគាំទ្រមន្ទីរពេទ្យព្រះសីហនុមណ្ខលនៃក្តីសង្ឃឹមដែលជួយព្យាបាលអ្នកជំងឺមហារីកសុដន់ និងផ្តល់ការពិនិត្យដោយឥតគិតថ្លៃ ជាពិសេសលើកកម្ពស់ការយល់ដឹងអំពីបញ្ហាដ៏ធ្ងន់ធ្ងរនេះទៅដល់ប្រជាជនកម្ពុជាទាំងស្ត្រី និងបុរស។
ក្រោមចក្ខុវិស័យដ៏មុតមាំរបស់ខ្លួនក្នុងការជួយប្រជាជនកម្ពុជាឲ្យមានសុខភាពល្អ និងជិវិតកាន់តែប្រសើរ ក្រុមហ៊ុនធានារ៉ាប់រងអាយុជីវិត AIA ប្រចាំនៅកម្ពុជា បន្តសហការជាមួយមន្ទីរពេទ្យព្រះសីហនុមណ្ខលនៃក្តីសង្ឃឹម (Center of HOPE) ក្នុងការប្រយុទ្ធប្រឆាំងនឹងជំងឺមហារីកសុដន់។ ថវិកាដែលប្រមូលបាននៅក្នុងយុទ្ធនាការនេះនឹងត្រូវប្រគល់ជូនជាផ្លូវការជូនមន្ទីរពេទ្យនៅពេលបញ្ចប់យុទ្ធនាការផ្សព្វផ្សាយក្នុងខែធ្នូ ២០២០។
នៅឆ្នាំនេះក្រុមហ៊ុនធានារ៉ាប់រងអាយុជីវិត AIA នឹងបង្កើនការយល់ដឹងអំពីយុទ្ធនាការដោយការផលិត និងដាក់ផ្សាយនូវវីដេអូអប់រំភាគដើម្បីជួយអប់រំដល់សាធារណជនពីជំងឺមហារីកសុដន់នេះ។ កម្មវិធីនេះនឹងត្រូវបានគាំទ្រដោយកម្មវិធីហ្វេសប៊ុកដែលនឹងបង្ហាញនៅលើដើមឈើនិម្មិតរូប តាមរយៈការចូលរួមគាំទ្ររបស់អ្នកនៅក្នុងយុទ្ធនាការនេះដោយការបន្ថែមបូពណ៌ផ្កាឈូកដោយគ្រាន់តែចូលលេង និងចែករំលែកដល់មិត្តភ័ក្តិរបស់អ្នកឲ្យបានដឹង និងចូលរួមជាមួយនៅលើប្រព័ន្ធផ្សព្វផ្សាយសង្គមហ្វេសប៊ុកនេះ។
ក្នុងឆ្នាំ 2018 យុទ្ធនាការផ្សព្វផ្សាយការយល់ដឹងអំពីជំងឺមហារីកសុដន់ទទួលបានការគាំទ្ររាប់ម៉ឺននាក់ ដោយការរៀបចំសកម្មភាពផ្សព្វផ្សាយជាច្រើនដូចជា ផ្សព្វផ្សាយសម្រាប់បុគ្គលិក និងសហការី តារាល្បីៗ ប្រព័ន្ធផ្សព្វផ្សាយ និងអ្នកមានឥទ្ធិពល រៀបចំសិក្ខាសាលាដល់និស្សិតនៅតាមសាកលវិទ្យាល័យ និងសកម្មភាពផ្សព្វផ្សាយនៅតាមទីផ្សារ ហើយផ្តល់ការពិនិត្យជំងឺមហារីកសុដន់ដោយឥតគិតថ្លៃរហូតដល់ 1300នាក់ ការដើរព្យុហយាត្រា «Pink Walk» ដែលមានអ្នកចូលរួម 2000នាក់ និងជួបជុំនៅកោះពេជ្រ រួមជាមួយវគ្គបណ្តុះបណ្តាល Zumba ដែលមានអ្នកចូលរួមប្រមាណ 800នាក់។ កម្មវិធីជាបន្តបន្ទាប់ត្រូវបានបញ្ចប់ជាមួយនឹងការប្រគំតន្ត្រីមួយដ៏ធំដែលមិនអាចបំភ្លេចបាន រួមជាមួយការផ្ញើសារលើកទឹកចិត្តដល់អ្នកគ្រប់គ្នាឲ្យរស់នៅចេះបង្ការខ្លួន និងចៀសឆ្ងាយពីជំងឺមហារីកសុដន់ ដែលមានការចូលរួមពីតារាល្បីៗប្រចាំប្រទេសកម្ពុជា និងអ្នកគាំទ្រប្រមាណ 20,000 នាក់។
អ្នកទាំងអស់គ្នាអាចចូលរួមដោយបរិច្ចាគដល់មូលនិធិនៃយុទ្ធនាការផ្សព្វផ្សាយការយល់ដឹងនៃកាការពារខ្លូនពីជំងឺមហារីកសុដន់ សម្រាប់ឆ្នាំ 2020 ដែលនឹងត្រូវប្រគល់ជូនមន្ទីរពេទ្យ HOPE នៅពេលបញ្ចប់យុទ្ធនាការ។ ផ្តើមចេញពីខ្លួនអ្នក សូមទៅទទួលយកការពិនិត្យ និងចែករំលែកការយល់ដឹងនេះដោយចាប់ផ្តើមនិយាយពីជំងឺមហារីកសុដន់ទៅកាន់មិត្តភិក្តិ និងក្រុមគ្រួសារ។ ការចូលរួមបរិច្ចាគប្រាក់ 5ដុល្លារ របស់អ្នកនឹងទទួលបានជាអាវយឺតដ៏ស្រស់ស្អាតមួយ ដើម្បីជាការថ្លែងអំណរគុណនូវទឹកចិត្តថ្លៃថ្លារបស់អ្នកដោយអ្នកអាចផ្ញើប្រាក់បរិច្ចាគរបស់អ្នក មកកាន់មូលនិធិនៃយុទ្ធនាការផ្សព្វផ្សាយការយល់ដឹងនៃការការពារខ្លួនពីជំងឺមហារីកសុដន់ជាផ្លូវការ តាមរយៈគណនីធនាគារ ABA 001052306 បន្ទាប់មកអ្នកចុច screenshot នូវប្រតិបត្តិការផ្ញើប្រាក់បរិច្ចាគរបស់អ្នក រួចផ្ញើសារមកកាន់ Facebook Messenger នៃ Facebook Page របស់ AIA Cambodia ដើម្បីបញ្ជាក់ជាការស្រេច។ ក្រុមការងារ AIA នឹងទាក់ទងលោកអ្នកវិញដើម្បីប្រគល់ជូនអាវយឺតដ៏ស្រស់ស្អាតជូនអ្នកនៅគ្រប់ខេត្តក្រុងទូទាំងប្រទេស។ ប្រសិនបើលោកអ្នកនៅមានចម្ងល់ ឬសាកសួរព័ត៌មានបន្ថែម សូមទូរស័ព្ទមកកាន់លេខ 098 980 757 ។ យើងខ្ញុំមានមោទនភាពបំផុតចំពោះលោកអ្នកដែលអាចចូលរួមបរិច្ចាគថវិកាច្រើនៗលើសពី 5ដុល្លារ តាមលទ្ធភាពបរិច្ចាគរបស់អ្នក។ ថវិកាទាំងអស់នឹងជួយគាំទ្រដល់មូលនិធិនៃយុទ្ធនាការ ដែលនឹងជួយដល់ស្ត្រីខ្មែរដែលត្រូវជំនួយដើម្បីទទួលបានការពិនិត្យ និងការព្យាបាលជំងឺមហារីកសុដន់នេះទាន់ពេលវេលា។
អំពីជំងឺមហារីកសុដន់
ជំងឺមហារីកសុដន់ គឺជាបុព្វហេតុដ៏គ្រោះថ្នាក់បំផុតនៃការស្លាប់ទាក់ទងនឹងជំងឺមហារីក ក្នុងចំណោមស្ត្រីនៅទូទាំងពិភពលោកដែលក្នុងនោះប្រទេសកំពុងអភិវឌ្ឍន៍មានអត្រាស្លាប់ខ្ពស់បំផុត។ ជារៀងរាល់ឆ្នាំ ជំងឺមហារីកសុដន់ត្រូវបានគេធ្វើរោគវិនិច្ឆ័យឃើញថ្មីៗនេះកើតមានលើស្ត្រីជាង 1.1 លាននាក់ ហើយករណីទាំងនេះគឺស្មើនឹងជាង 10% នៃករណីជំងឺមហារីកថ្មីទាំងអស់។ ជាមួយនឹងការស្លាប់ជាង 410,000 នាក់ ជារៀងរាល់ឆ្នាំ ជំងឺនេះមានចំនួនច្រើនជាង 1.6% នៃការស្លាប់របស់ស្ត្រីទាំងអស់នៅទូទាំងពិភពលោក។ ជំងឺមហារីកសុដន់ គឺជាបញ្ហាសុខភាពសាធារណៈបន្ទាន់មួយនៅក្នុងប្រទេសដែលមានសេដ្ឋកិច្ចខ្ពស់ និងកំពុងក្លាយជាបញ្ហាបន្ទាន់នៅក្នុងប្រទេសដែលមានសេដ្ឋកិច្ចទាប ហើយអត្រានៃកំណើននេះបានកើនឡើងរហូតដល់ 5%ក្នុងមួយឆ្នាំ។
ទោះបីជាវិស័យវិទ្យាសាស្ត្រសុខាភិបាលមានការរីកចម្រើន ប៉ុន្តែពិភពលោក ក៏នៅតែប្រឈមមុខធនធានដែលមានសមត្ថភាពក្នុងការកំណត់រោគសញ្ញាណដំបូង ពិនិត្យរោគវិនិច្ឆ័យ និងការព្យាបាលជំងឺឲ្យទាន់ពេលវេលា ។ ការកំណត់រោគសញ្ញាណដំបូងនៃជំងឺមហារីកសុដន់ ពិតជាជួយធ្វើឲ្យដំណើរការពិនិត្យព្យាបាលទទួលបានលទ្ធផលល្អប្រសើរ និងជួយដល់អ្នកជំងឺទាន់ពេលវេលា ប៉ុន្តែ តម្រូវឲ្យមានការអប់រំយល់ដឹងជាសាធារណៈដើម្បីជំរុញឲ្យមានការចូលរួមយ៉ាងសកម្មពីអ្នកជំងឺក្នុងការធ្វើរោគវិនិច្ឆ័យ និងការព្យាបាល ៕
ចែករំលែកព័តមាននេះ