ខេត្តស្វាយរៀង ៖ កម្មករផ្សារដែកធ្វើដំបូលផ្ទះម្នាក់លើកដែកប៉ះខ្សែកាបបង្គោលភ្លើងអគ្គីសនីតាមថ្នល់ បណ្តាលឱ្យឆ្លងចរន្តឆក់ធ្លាក់ពីលើដំបូលផ្ទះមានកំពស់៤ម៉ែត្ររបួសធ្ងន់ធ្ងរសន្លប់ស្តូកស្តឹងបង្កឲ្យមានការភ្ញាក់ផ្អើលទាំងព្រឹក។
បើតាមសមត្ថកិច្ចនគបាលប៉ុស្តិ៍រដ្ឋបាលឃុំកណ្តៀងរាយបានឲ្យដឹងថា ករណីខាងលើនេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៨ ខែតុលា ឆ្នាំ២០២០ ស្ថិតនៅភូមិក្បាលថ្នល់ ឃុំកណ្តៀងរាយ ស្រុកស្វាយទាប។
ជនរងគ្រោះឈ្មោះម៉ាប់ ភេទប្រុស អាយុ៣១ឆ្នាំ រស់នៅភូមិដើមពោធិ៍ ឃុំស្វាយតាយានស្រុកកំពង់រោទ៍ ខេត្តស្វាយរៀង ។
តាមប្រភពខាងលើបានបន្តទៀតថា មុនពេលកើតហេតុ ជនរងគ្រោះមកធ្វើកម្មករសំណង់នៅផ្ទះរបស់ឈ្មោះមុំ សារៀម ភេទស្រី អាយុ៦៩ឆ្នាំ នៅភូមិក្បាលថ្នល់ ឃុំកណ្តៀងរាយ ស្រុកស្វាយ ខណៈជាងកំពុងផ្សារដំបូលផ្ទះក៏បានឲ្យជនរងគ្រោះលើកដែកហុចបន្តឲ្យជាងផ្សារដំបូល ស្រាប់តែជនរងគ្រោះលើកដែកទៅប៉ះខ្សែកាបបង្គោលភ្លើងតាមបណ្តោយផ្លូវជាតិលេខ១ បណ្តាលឲ្យឆក់ធ្លាក់ពីលើដំបូលផ្ទះមកដីរងរបួសធ្ងន់សន្លប់តែម្តង។
តាមប្រភពខាងលើបានបន្តទៀតថា បន្ទាប់មក ប្រជាពលរដ្ឋនិងក្រុមកម្មករបានលើកជនរងគ្រោះយកទៅកប់ដីខ្សាច់ និងចាក់ទឹកដើម្បីជួយសង្គ្រោះបឋម ចំណែកចាស់ទុំអុជធូបស្តោះផ្លុំ ហៅព្រលឹង និងលើករាសីផងដែរ ។
ពេលកើតហេតុភ្លាមក៏បានដឹងដល់សមត្ថកិច្ចហៅរថយន្តសាមុយរបស់មន្ទីរពេទ្យបង្អែកជីភូដឹកជនរងគ្រោះយកទៅទៅសង្គ្រោះនៅមន្ទីរពេទ្យបង្អែកជីភូក្តុងបាវិត។
ពាក់ព័ន្ធនឹងករណីខាងលើ សមត្ថកិច្ចសន្និដ្ឋានថា មូលហេតុគឺជនរងគ្រោះលើកដែកខ្វះការប្រុងប្រយត្ន័ រួមផ្សំនឹងការសាងសង់ផ្ទះកៀកបង្គោលភ្លើងផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ