ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន បានអភិវឌ្ឍព្រះរាជាណាចក្រកម្ពុជានាសតវត្សទី២១ ដោយកែប្រែមុខមាត់យ៉ាងស្រស់ផូរផង់ចេញពីចំណុចសូន្យនាឆ្នាំ១៩៧៩ រហូតបច្ចុប្បន្នដែលមានការរីកចំរើនលើគ្រប់វិស័យ ធានាបាននូវស្ថិរភាពនយោបាយប្រកបដោយសន្តិសុខ និងសណ្តាប់ធ្នាប់សង្គម ទទួលបានការបង្រួបបង្រួមជាតិ ឯកភាពជាតិទាំងស្រុង ។ សមិទ្ធផលដ៏ច្រើនសន្ធឹកសន្ធាប់ដែលសម្តេចបានផ្តល់ជូនប្រជាពលរដ្ឋ
ដោយ ៖ ស ធារិទ្ធ
ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន បានអភិវឌ្ឍព្រះរាជាណាចក្រកម្ពុជានាសតវត្សទី២១ ដោយកែប្រែមុខមាត់យ៉ាងស្រស់ផូរផង់ចេញពីចំណុចសូន្យនាឆ្នាំ១៩៧៩ រហូតបច្ចុប្បន្នដែលមានការរីកចំរើនលើគ្រប់វិស័យ ធានាបាននូវស្ថិរភាពនយោបាយប្រកបដោយសន្តិសុខ និងសណ្តាប់ធ្នាប់សង្គម ទទួលបានការបង្រួបបង្រួមជាតិ ឯកភាពជាតិទាំងស្រុង ។ សមិទ្ធផលដ៏ច្រើនសន្ធឹកសន្ធាប់ដែលសម្តេចបានផ្តល់ជូនប្រជាពលរដ្ឋមាន ស្ពាន ផ្លូវថ្នល់ ទំនប់ ប្រឡាយ ស្រះទឹក អណ្តូងទឹក សាលារៀន មន្ទីរពេទ្យ វត្តអារាម មជ្ឈមណ្ឌលអភិវឌ្ឍន៍នានា ។ ក្នុងវិស័យអប់រំ រាជរដ្ឋាភិបាលកម្ពុជា បានបង្កើតឱ្យមានសាលារៀនទាំងរដ្ឋ និងឯកជន ស្ទើរគ្រប់ខេត្ត-ក្រុងទូទាំងប្រទេស ដែលផ្តល់ឱកាសឱ្យកូនខ្មែរគ្រប់រូបបានចូលសិក្សា និងក្លាយជាធនធានមនុស្សដ៏សំបូរបែបក្នុងការចូលរួមអភិវឌ្ឍន៍ប្រទេសឱ្យរីកចំរើនគួរជាទីមោទនៈ ។
ការគោរពសិទ្ធិមនុស្ស លទ្ធិប្រជាធិបតេយ្យ ត្រូវបានរាជរដ្ឋាភិបាលអនុវត្តបានយ៉ាងត្រឹមត្រូវស្របតាមរដ្ឋធម្មនុញ្ញ និងបានលើកកំពស់នូវសិទ្ធិបញ្ចេញមតិយ៉ាងទូលំទូលាយសំរាប់ប្រជាពលរដ្ឋ ដូចជា សិទ្ធិចូលរួមនយោបាយ ទៅបោះឆ្នោត និងឈរឈ្មោះឱ្យគេបោះឆ្នោត ។ សិទ្ធិបង្កើតអង្គការ សមាគម សារព័ត៌មាន វិទ្យុ ទូរទស្សន៍ឯកជន ដែលជាអ្នកនាំព័ត៌មានជាតិ និងអន្តរជាតិដ៏មានសារសំខាន់ធ្វើការផ្សព្វផ្សាយជូនដល់ប្រជារាស្ត្រទាំងទីក្រុងរហូតដល់ជនបទ ។
សេដ្ឋកិច្ចកម្ពុជាបានឈានជើងចេញពីចំណុចសូន្យ ពីគ្មានការបោះពុម្ពប្រាក់ចាយរហូតមានការរីកចំរើនយ៉ាងខ្លាំងដូចបច្ចុប្បន្ន ។ សន្តិភាព និងសន្តិសុខផ្ទៃក្នុងបានទាក់ទាញអ្នកវិនិយោគទុនទាំងក្នុង និងក្រៅប្រទេសឱ្យចូលមកវិនិយោគលើគ្រប់វិស័យ ។ រោងចក្រ សហគ្រាស មជ្ឈមណ្ឌលពាណិជ្ជកម្ម កសិដ្ឋាន សំណង់ធំៗ សេវាកម្មទេសចរណ៍ បង្កើនការងារនិងមុខរបរជូនប្រជារាស្ត្រធ្វើឱ្យប្រជារាស្ត្រមានជីវភាពកាន់តែប្រសើរឡើងពីមួយថ្ងៃទៅមួយថ្ងៃ ។ ដោយមានជំនឿលើរដ្ឋាភិបាល ធនាគារឯកជនជាច្រើនបានបើកដំណើរការចរាចរណ៍ សាច់ប្រាក់ និងរូបិយប័ណ្ណ ទទួលបញ្ញើ ផ្តល់ប្រាក់កម្ចី ផ្ទេរសាច់ប្រាក់ ដោយទទួលបាននូវការគាំទ្រ និងទំនុកចិត្តយ៉ាងមុតមាំពីសំណាក់ប្រជារាស្ត្រខ្មែរទាំងក្នុង និងក្រៅប្រទេស និងអ្នកវិនិយោគបរទេសលើសាកលលោក ។
សមិទ្ធផលធំៗផ្នែកហេដ្ឋារចនាសម្ព័ន្ធក្រោមការដឹកនាំដ៏ឈ្លាសវៃដែលសម្តេចអគ្គមហាសេនាបតីតេជោ ហ៊ុន សែន បានផ្តល់ជូនរាស្ត្រនាឆ្នាំកន្លងមក មានស្ពានកាត់ដៃសមុទ្រចំនួន៤ជាគមនាគមន៍ដ៏សំខាន់បំផុតក្នុងការស្តោរសេដ្ឋកិច្ចនៃប្រជាជនខេត្តកោះកុង ។ ស្ពានទន្លេបិទ ខេត្តកំពង់ចាម ស្ពានព្រែកព្នៅ ស្ពានព្រែកតាមាក់ ស្ពានព្រែកក្តាម ខេត្តកណ្តាល បានដោះស្រាយបានទាំងស្រុងនូវការលំបាករបស់ប្រជាជនតាមដងទន្លេមេគង្គដែលមានរយៈពេលដ៏យូរលង់មកហើយ ។ សំរាប់រាជធានីភ្នំពេញ ដែលជាតំបន់ពាណិជ្ជកម្មពិសេសមានស្ពានភ្លោះ ស្ពានអាកាសក្បាលថ្នល់ ។
ក្នុងគំរោងឆ្នាំ២០១១នេះ សមិទ្ធផលធំៗជាបន្តទៀត បាននិងកំពុងចាប់ដំណើរការជាបន្តបន្ទាប់នូវស្ពានអាកាសត្រង់ស្តុបមន្ទីរពេទ្យព្រះកុសុមៈ (ពេទ្យលោកសង្ឃ) ស្ពានឆ្លងទន្លេមេគង្គ ខេត្តស្ទឹងត្រែង និងស្ពានអ្នកលឿងដែលជាស្ពានវែងជាងគេនៅព្រះរាជាណាចក្រកម្ពុជា ហើយស្ពាននេះក៏ជាផ្លូវអាស៊ានមួយផងដែរ សំរាប់ភ្ជាប់ពាណិជ្ជកម្មទៅប្រទេសជិតខាង ។ ក្រៅពីនោះមានស្ពានតាខ្មៅ ស្ពានជ្រោយចង្វាទី២ កំពង់ផែភ្នំពេញ ផ្លូវថ្នល់ និងស្ពានជាច្រើនទៀត ដែលស្ថិតនៅក្នុងគំរោងអភិវឌ្ឍន៍នាឆ្នាំ២០១១ នេះ ។
គំរោងវិនិយោគវារីអគ្គិសនីធំៗជាច្រើននៅខេត្តពោធិ៍សាត់ បាត់ដំបង កោះកុង និងខេត្តកំពង់ឆ្នាំង នឹងអាចផ្គត់ផ្គង់អគ្គិសនីបានគ្រប់គ្រាន់សំរាប់តំរូវការប្រើប្រាស់របស់ប្រជាពលរដ្ឋនៅក្នុងប្រទេសនាពេលអនាគត ។ មិនត្រឹមតែប៉ុណ្ណោះទេ តាមរយៈការបង្កើតនូវវារីអគ្គិសនី នឹងបានបង្កឱកាសផ្តល់ការងារជូនប្រជាពលរដ្ឋ លើកកំពស់ជីវភាពគ្រួសារ បង្កើនប្រាក់ចំណូល ដែលជាការរួមវិភាគទានដ៏សំខាន់នៅក្នុងការអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជារាស្ត្រ ។
លើឆាកអន្តរជាតិ សម្តេចតេជោ បានខិតខំស្តារកិត្តិយស និងកិត្យានុភាពជាតិឱ្យក្លាយជាប្រទេសដែលមានលក្ខណៈស្មើភាព និងស្មើសិទ្ធិជាមួយបណ្តាប្រទេសនៅលើពិភពលោក ។ បង្កើនទំនាក់ទំនងមិត្តភាពអន្តរជាតិ និងសហប្រតិបត្តិការជាមួយគ្រប់ប្រទេស និងដៃគូអន្តរជាតិនានា ។ ជាក់ស្តែង ប្រទេសចិន និងកូរ៉េបានផ្តល់នូវជំនួយយ៉ាងច្រើនមកប្រទេសកម្ពុជាយើង។ ដំណោះស្រាយប្រកបដោយភាពឈ្លាសវៃ និងទាន់ពេលវេលា សម្តេចបានបញ្ចៀសផុតនូវការបង្កសង្គ្រាមបង្ហូរឈាមលើបញ្ហាព្រំដែនពីសំណាក់ប្រទេសជិតខាង ។ ប៉ុន្តែទោះបីជាមានការរីកចំរើន និងការអភិវឌ្ឍប្រទេស ធានាបាននូវសុខសន្តិភាពជូនដល់ប្រជារាស្ត្រយ៉ាងដូច្នេះក្តី ក៏ក្រុមគណបក្សប្រឆាំងមិនទទួលស្គាល់ការពិតដែរ គឺគិតតែប្រឆាំងដោយបង្កជាលេសនេះលេសនោះ រិះគន់ ជេរប្រមាថមកលើរាជរដ្ឋាភិបាល និងថ្នាក់ដឹកនាំរាជរដ្ឋាភិបាលឥតឈប់ឈរ ៕
ចែករំលែកព័តមាននេះ