ខេត្តបន្ទាយមានជ័យ ៖ បុរសម្នាក់ដែលត្រូវគេស្គាល់ថាឈ្មោះវាសនា ហៅតយ បានស្រវឹងស្រារួចក៏ធ្វើសកម្មភាពប្រើហិង្សា ដោយទាញយកកាំបិតដេញកាប់ប្រជាពលរដ្ឋក្នុងភូមិតែម្តង បង្កឱ្យមានការភ្ញាក់ផ្អើលកាលពីម៉ោង៤និង៣០នាទីល្ងាច ថ្ងៃទី២៧ ខែតុលា ឆ្នាំ២០២០ ស្ថិតនៅក្នុងភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។
បុរសខាងលើនេះឈ្មោះ សៀង វាសនា ហៅតយ អាយុ៣៦ឆ្នាំ រស់នៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។
តាមប្រភពពីនគរបាលមូលដ្ឋាន បានឲ្យដឹងថា មុនពេលកើតហេតុ ជនបង្កខាងលើ ហៅតយនេះ នៅពេលដែលស្រវឹងស្រា គឺតែងតែយកកាំបិតគំរាមអ្នកជិតខាងរហូត តែពុំដែលមានអ្នកណាហ៊ានប្តឹងសមត្ថកិច្ចនោះទេ ព្រោះក្រែងមានគំនុំ ។ ជាក់ស្តែងនៅវេលាម៉ោង៤និង៣០នាទីល្ងាច ថ្ងៃទី២៧ ខែតុលា ជនបង្ករូបនេះមិនមានរឿងអ្វីជាមួយនរណាសោះ តែបានស្រវឹងស្រាក៏យកកាំបិតខ្វែវប្រវែង១,២០ម៉ែត្រទៅកាប់រថយន្តម៉ាកកាមរី១គ្រឿង ពណ៌ស ពាក់ស្លាកលេខ បាត់ដំបង 2A.1091 ជារបស់ជនរងគ្រោះឈ្មោះអឿ សាវឿន ភេទប្រុស អាយុ៧១ឆ្នាំ រស់នៅភូមិវាលហាត់ ឃុំម៉ាឡៃ ស្រុកម៉ាឡៃ ដែលចតទុកចោល បណ្តាលឲ្យបែកស្តុបខាងក្រោយផ្នែកខាងឆ្វេង។
ប្រភពដដែលបន្តថា មិនតែប៉ុណ្ណោះ ជននេះបានដេញកាប់ឈ្មោះ ជ័យ ជីម ភេទប្រុស អាយុ៦៧ឆ្នាំ រស់នៅភូមិវាលហាត់ ឃុំម៉ាឡៃ ស្រុកម៉ាឡៃ តែត្រូវជនរងគ្រោះរត់គេចខ្លួនផុត បន្ទាប់មកជនបង្ករូបនេះក៏បានដេញកាប់ឈ្មោះ អឿ សាវឿន ជាម្ចាស់រថយន្តបន្ថែមទៀត បណ្តាលឲ្យត្រូវរបួសស្រាលចំនួន២កន្លែង ។
ប្រភពដែលបញ្ជាក់ថា ជនបង្ករូបនេះកន្លងមក នៅពេលស្រវឹងស្រាតែងតែយកកាំបិតខ្វែវនេះដើរគំរាមគេឯងអ្នកជិតខាង តែគ្មានអ្នកណាហ៊ានប្តឹង ព្រោះខ្លាចជនបង្កនេះមានគំនុំ ទើបជននេះឡើងចាល។ លុះនៅថ្ងៃកើតហេតុនគរបាលចាប់ឃាត់ខ្លួនជាក់ស្តែងតែម្តង ខណៈពេលជនបង្កដេញកាប់ដេញគប់គេឯងនោះ។
បច្ចុប្បន្នជនបង្កត្រូវបានបញ្ជូនទៅអធិការដ្ឋាននគរបាលស្រុកម៉ាឡៃ ដើម្បីរៀបចំសំណុំរឿងបញ្ជូនខ្លួនទៅស្នងការដ្ឋាននគរបាលខេត្ត កសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់៕
ចែករំលែកព័តមាននេះ