ខេត្តកំពត ៖ យុវនារីវយ័ក្មេងម្នាក់បានជួបហេតុការណ៍គ្រោះចរាចរណ៍បង្កដោយរថយន្តយីឌុបម៉ាកហ៊ីណូទ្រុងវែង ដឹកស៊ីប្រូស៊ីម៉ង់ត៍បុកចំពីក្រោយពេញទំហ៊ឹង ខណៈនាងកំពុងជិះម៉ូតូស្របទិសគ្នាក្នុងទិសដៅពីត្បូងទៅជើងលើផ្លូវជាតិលេខ៣ (កំពត-ភ្នំពេញ) ត្រង់ចំណុចខាងត្បូងស្ពានស្រះប៉ោង ចម្ងាយប្រមាណជា៤០ម៉ែត្រ ស្ថិតក្នុងភូមិបឹងតារោង ឃុំព្រៃឃ្មុំ ស្រុកទឹកឈូ កាលពីវេលាម៉ោង៩ និង១០នាទីព្រឹក ថ្ងៃទី១៦ ខែឧសភា ឆ្នាំ២០១៥ បណ្តាលឲ្យខ្ទាតចូលកង់រថយន្តខាងក្រោយ ហើយត្រូវរថយន្តកិនខ្ទេចក្បាលស្លាប់យ៉ាងអណោចអធម័នៅកន្លែងកើតហេតុ ។
សមត្ថកិច្ចនគរបាលចរាចរណ៍ខេត្តបានឲ្យដឹងថា រថយន្តបង្កយីឌុប ម៉ាកហ៊ីណូ ទ្រុងវែង ពណ៌ខៀវទឹកប៊ិច ដឹកស៊ីប្រូស៊ីម៉ងត៍ ពាក់ស្លាកលេខភ្នំពេញ 3B-1080 ។ អ្នកបើកបរក្រោយពីកើតហេតុក៏ចុះរត់គេចខ្លួនបាត់ បន្សល់ទុកចោលរថយន្តនៅកន្លែងកើតហេតុ ។ ចំណែកនារីរងគ្រោះឈ្មោះជាង ទី អាយុ២០ឆ្នាំ មានទីលំនៅភូមិវត្តអង្គ ឃុំព្រៃឃ្មុំ ស្រុកទឹកឈូ ជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខកំពត 1C-0944 ផលិតឆ្នាំ២០០៩ ។
ក្រោយពេលសមត្ថកិច្ចពិនិត្យហេតុការណ៍វាស់វែងរួច បានប្រគល់សពនារីរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តបង្ក និងម៉ូតូជនរងគ្រោះសមត្ថកិច្ចបាននាំទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត រង់ចាំការដោះស្រាយតាមផ្លូវច្បាប់ ៕
ចែករំលែកព័តមាននេះ