ប្រធាន Serie A ព្រមានរដ្ឋាភិបាលអ៊ីតាលីថា បាល់ទាត់ក្នុងស្រុកជិតដួលរលំហើយ
អ៊ីតាលី ៖ ប្រធានក្របខណ្ឌ Serie A លោក Paolo Dal Pino បានព្រមានដល់រដ្ឋាភិបាលអ៊ីតាលីថា…
អ៊ីតាលី ៖ ប្រធានក្របខណ្ឌ Serie A លោក Paolo Dal Pino បានព្រមានដល់រដ្ឋាភិបាលអ៊ីតាលីថា បាល់ទាត់ក្នុងស្រុកជិតនឹងដួលរលំហើយ បន្ទាប់ពីច្បាប់នៃការរឹតត្បិតការឆ្លងវីរុស Covid-19 ថ្មីដាក់ចេញ ដែលបានហាមឃាត់អ្នកគាំទ្រមិនឱ្យចូលកីឡដ្ឋានសារជាថ្មីម្តងទៀត។
សូមរំលឹកថាអ្នកគាំទ្ររហូតដល់ ១,០០០នាក់ត្រូវបានអនុញ្ញាតឱ្យចូលទស្សនាក្នុងកីឡដ្ឋាន នៅក្របខណ្ឌកំពូល Serie A ក្នុងរយៈពេលប៉ុន្មានសប្តាហ៍ថ្មីៗនេះ ចាប់តាំងពីការរឹតត្បិតត្រូវបានបន្ធូរបន្ថយកាលពីខែកញ្ញា។ ប៉ុន្តែដោយសារតែការកើនឡើងករណីឆ្លងក្នុងប្រទេស នាយករដ្ឋមន្ត្រីអ៊ីតាលីលោក Giuseppe Conte បានដាក់ចេញច្បាប់ដ៏តឹងរឹងសារជាថ្មីម្តងទៀត ដើម្បីទប់ស្កាត់ការរាលដាលនៃវីរុសនេះ។
លោក Paolo Dal Pino យល់ពីភាពចាំបាច់ក្នុងការការពារសុខភាពសាធារណៈ ប៉ុន្តែលោកបានចោទសួរអំពីការខូចខាតយ៉ាងធ្ងន់ធ្ងរលើឧស្សាហកម្មបាល់ទាត់។ លោកក៏បានអំពាវនាវដល់រដ្ឋាភិបាលឱ្យផ្តល់ការគាំទ្រផ្នែកសេដ្ឋកិច្ច ដើម្បីជួយកាត់បន្ថយការខាតបង់មួយចំនួន ដែលបណ្តាលមកពីកង្វះអ្នកគាំទ្រចូលរួមទស្សនាការប្រកួតផ្ទាល់ក្នុងកីឡដ្ឋាន។
សូមបញ្ជាក់ថាគិត្រឹមថ្ងៃទី២៧ ខែតុលានេះ ប្រទេសអ៊ីតាលីមានករណីឆ្លងកើនឡើងដល់ ៥៤ម៉ឺនករណី និងមានអ្នកស្លាប់សរុបចំនួន ៣៧,៤៧៩នាក់៕ (ដកស្រង់ចេញពី Goal.com)
ចែករំលែកព័តមាននេះ