ខេត្តសៀមរាប ៖ គោ-ក្របីនៅតែជាកម្លាំងអូសទាញក្នុងការធ្វើស្រែចម្ការរបស់កសិករនៅខេត្ត សៀមរាបដែលនៅតែបន្តថែរក្សាទំនៀមទម្លាប់នេះតាំងពីដូនតាមក ដោយពួកគាត់មិនទាន់បោះបង់ចោលនៅឡើយ ទោះបីសម័យនេះមានបច្ចេកវិជ្ជាទំនើបក៏ដោយ ។
ជាក់ស្តែងនៅព្រឹកថ្ងៃទី២៧ តុលា ២០២០នេះ ការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប ព្រមទាំងពេទ្យសត្វតាមភូមិ បានបន្តចុះចាក់វ៉ាក់សាំងការពារជំងឺផ្សេងៗដល់គោ-ក្របីរបស់ពលរដ្ឋនៅក្នុងសង្កាត់ក្របីរៀល ក្រុងសៀមរាប បានចំនួនសរុប៣៩៥ក្បាល ។
លោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានមានប្រសាសន៍ថា កម្មវិធីចាក់ថ្នាំវ៉ាក់សាំងលើសត្វគោ-ក្របីគឺជាផ្នែកមួយនៃអគ្គនាយកដ្ឋានសុខភាពសត្វនិងផលិតកម្មសត្វដែលជាគោលនយោបាយរបស់ក្រសួងកសិកម្មរុក្ខាប្រមាញ់ និងនេសាទ តម្រូវឲ្យប្រជាពលរដ្ឋមិនថានៅខេត្តសៀមរាបនោះទេ គឺនៅទូទាំងប្រទេសត្រូវយកគោ-ក្របីមកទទួលការរក្សាសុខភាពតាមរយៈការចាក់ថ្នាំការពារ ។
លោកបន្តថា នៅថ្ងៃនេះក្រុម ការងាររបស់ ការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខា ប្រមាញ់និងនេសាទខេត្តសៀមរាប បានដាក់កម្ម វិធីជាមួយអាជ្ញាធរមូលដ្ឋាន ដើម្បីប្រមូលសត្វគោ ក្របីរបស់ពលរដ្ឋនៅក្នុងសង្កាត់ក្របីរៀល ក្រុងសៀមរាប នេះដើម្បីទទួលវ៉ាក់ការពារជំងឺឆ្លងបានចំនួន៣៩៥ក្បាល ក្នុងនោះក្របី៣០២ក្បាល និងគោ៩២ក្បាល ។ លោកបន្ថែមថា សម្រាប់វ៉ាក់ទាំងនេះគឺទទួលបានពីអគ្គនាយកដ្ឋានសុខភាពសត្វនិងផលិតកម្មសត្វ ក្នុង១ឆ្នាំ២ដង គឺឆមាសទី១ និងឆមាសទី២ ។
សត្វពាហនៈដែលមកទទួលការចាក់ថ្នាំការពារនេះគឺមិនយកប្រាក់កម្រៃទេ ។ ប្រភេទវ៉ាក់សាំងដែលទទួលបាននោះគឺ ១-សាទឹក គោ-ក្របី ។ ២-វ៉ាក់សាំងបូសខ្យល់ និង៣-វ៉ាក់សាំងអ៊ុតក្តាម និងមានសម្ភារបរិក្ខារមួយចំនួនទៀត ហើយសម្ភារទាំងនេះមន្ទីរកសិកម្មរុក្ខាប្រមាញ់និងនេសាទ តែងតែយកមកធ្វើការបែងចែកទៅដល់គ្រប់បណ្តាក្រុង-ស្រុកក្នុងខេត្តសៀមរាប ជាពិសេសជូនដល់ភ្នាក់ការពារសុខភាពសត្វ (ពេទ្យសត្វតាមភូមិ) ក្នុងខេត្តទាំងអស់ប្រមាណជាង៤០០នាក់ ។
លោកបានសំណូមពរដែរថា បន្ទាប់ពីបងប្អូនពលរដ្ឋទទួលបានព័ត៌មាន ពីអាជ្ញាធរភូមិ-ឃុំដែលបានផ្សព្វផ្សាយណាត់កម្មវិធីចាក់វ៉ាក់សាំងនេះ សូមបងប្អូន ប្រញាប់យកគោ-ក្របី មកចាក់វ៉ាក់សាំងឲ្យបានទាន់ពេលគ្រប់ៗគ្នាដើម្បីការពារផលប្រយោជន៍នៃការចិញ្ចឹមសត្វរបស់បងប្អូនប្រជាពលរដ្ឋឲ្យបានគង់វង់និងមានសុខភាពល្អ ៕
ចែករំលែកព័តមាននេះ