ខេត្តកំពង់ឆ្នាំង ៖ លោក សោម វឺន អភិបាលស្រុករលាប្អៀរ កាលពីព្រឹកថ្ងៃទី១៥ ឧសភា ២០១៥ បាននាំយកអំណោយរបស់សប្បុរសជនទៅផ្តល់ជូនលោកយាយទុរគតចិញ្ចឹមចៅពីរនាក់ ដែលរងគ្រោះថ្នាក់ចរាចរណ៍កាលពីសប្តាហ៍កន្លងទៅនោះ។
ការផ្តល់ជូនអំណោយរបស់សប្បុរសជនខាងលើ គឺនៅខ្ទមលោកយាយ ស្ថិតក្នុងភូមិគោកបន្ទាយ ឃុំគោកបន្ទាយ ស្រុករលាប្អៀរ ដោយមានការអញ្ជើញចូលរួមពីលោកមេឃុំមេភូមិផងដែរ។ លោកអភិបាលស្រុក បានបញ្ជាក់ប្រាប់ថា ក្រោយពីមានសារព័ត៌មានផ្សាយពីជីវិតលោកយាយ តូច សារ៉ន អាយុ៧៨ឆ្នាំ ដែលកំពុងចញ្ចឹមចៅ២នាក់ ហើយបានជួបគ្រោះថ្នាក់ចរាចរណ៍ទៀតផងនោះ លោកឧកញ៉ា ស្រី ងួន និងលោកជំទាវ ឧញ៉ា ស្រី វុឌ្ឍី បានជួយឧបត្ថមកលោកយាយតាមរយៈរូបលោកចំនួន១០០ដុលា្លរ ចំណែកលោក សូ សាម៉ន ក៏បានជួយឧបត្ថមមកលោកយាយ ចំនួន១០ម៉ឺនរៀល និងអង្ករមួយការុងស្មើ២៥គឺឡូក្រាមផងដែរ ។
លោក យឹម យ៉ុន មេឃុំគោកបន្ទាយ បានឱ្យដឹងថា លោកយាយរូបនោះពិតជាក្រីក្រពិតប្រាកដមែន កំពុងរស់នៅជាមួយចៅ២នាក់ ម្នាក់កូនបងធ្វើជាសំណង់ និងម្នាក់ទៀតនៅផ្ទះជាមួយជីដូន ។ ក្រោយពីបានទទួលអំណោយខាងលើ លោកយាយដែលមិនទាន់ជាពីរបួសគ្រោះថ្នាក់ចរាចរណ៍បានប្រឹងលើកដៃសំពះ ថ្លែងអំណរគុណដល់សប្បុរសជនទាំងអស់ សូមជួបតែពុទ្ឋពរទាំង៤ប្រការកុំបីឃ្លាងឃ្លាតឡើយ ៕
ចែករំលែកព័តមាននេះ