ខេត្ដបន្ទាយមានជ័យ ៖ យុវជនម្នាក់ជាប់ចោទពីបទចាប់រំលោភសេពសន្ថវៈត្រូវប៉ូលិសការិយាល័យប្រឆាំងការជួញដូរមនុស្ស និងការពារអនីតិជនសហការជាមួយប៉ូលិសក្រុងប៉ោយប៉ែតឃាត់ខ្លួនកាលពីថ្ងៃទី២ ខែមីនា នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។លោកវរសេនីយ៍ទោ សិទ្ធិ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជនឱ្យដឹងថា កាលពីថ្ងៃទី២ ខែមីនា ឆ្នាំ២០១០ ឈ្មោះម.ណ ភេទស្រី អាយុ១៨ឆ្នាំ នៅឃុំតាំអាន ស្រុកក្រឡាញ់ ខេត្ដសៀមរាប បានប្ដឹងចោទប្រកាន់ឈ្មោះពិន ឈុននី ហៅយួន អាយុ២១ឆ្នាំ រស់នៅភូមិ ក្បាលស្ពាន សង្កាត់ប៉ោយប៉ែតថា កាលពីថ្ងៃ ទី១២ ខែកុម្ភៈ បានចាប់បង្ខំនាងរំលោភរហូតបានសំរេចជាបន្ដបន្ទាប់។ ហេតុការណ៍នោះកើតឡើង ខណៈពេលឈ្មោះពិន ឈុននី ហៅយួននាំនាងទៅលេងផ្ទះឪពុកម្ដាយគេនៅខេត្ដកំពង់ចាម។
ក្រោយពេលទទួលបណ្ដឹងភ្លាមលោក ឧត្ដមសេនីយ៍ត្រី ហ៊ុន ហ៊ាន ស្នងការនគរបាលខេត្ដបានដាក់បទបញ្ជាឱ្យការិយាល័យជំនាញប្រឆាំងការជួញដូរមនុស្ស និងការពារអនីតិជនសហការជាមួយសមត្ថកិច្ចអធិការដ្ឋាននគរបាលក្រុងប៉ោយប៉ែតឃាត់ខ្លួនយុវជនជាប់ចោទនាំទៅសាកសួរ ។ លោកវរសេនីយ៍ទោសិទ្ធិ ឡោះ បន្ដថានៅចំពោះមុខសមត្ថកិច្ចយុវជនជាប់ចោទសារភាពថារូបគេពិតជាបានរួមរ័កជាមួយនាងម.ណ មែនព្រោះតែពួកគេស្រលាញ់គ្នា។ ដំបូងពួកគេទាក់ទងគ្នាតាមទូរស័ព្ទរហូតឈានដល់ការយល់ចិត្ដថ្លើមគ្នា ។លោកឧត្ដមសេនីយ៍ត្រី ហ៊ុន ហ៊ាន មានប្រសាសន៍ថា ផ្អែកតាមបណ្ដឹងរបស់នារីរងគ្រោះ និងចំលើយសារភាពរបស់ជនជាប់ចោទការិយាល័យជំនាញបានកសាងសំណុំរឿងបញ្ជូនជនជាប់ចោទទៅសាលាដំបូងខេត្ដដើម្បីចាត់ការតាមផ្លូវច្បាប់។
ចែករំលែកព័តមាននេះ