លោកកាឡូស ស្លីម ជាមហាសេដ្ឋីផ្នែកទូរគមនាគមន៍ល្បីឈ្មោះម្នាក់នៅតែរក្សាតំណែងជាអ្នកមានបំផុតនៅលើពិភពលោក ដោយទ្រព្យសម្បត្តិរបស់លោកកើនឡើងជាង១ភាគ៣ ។ នេះបើតាមការឱ្យដឹងតាមរយៈបញ្ជីឈ្មោះអ្នកមានបំផុតលើពិភពលោកចងក្រងដោយទស្សនាវដ្តី Forbes ដែលជាទស្សនាវដ្តីល្បីឈ្មោះមួយរបស់សហរដ្ឋអាមេរិក ។
តាមរបាយការណ៍ដែលចងក្រងដោយទស្សនាវដ្តី Forbes បង្ហាញថា ទ្រព្យសម្បត្តិរបស់លោកកាឡូស ស្លីម កើនឡើងដល់៧៤ពាន់លានដុល្លារអាមេរិក យកឈ្នះលើស្ថាបនិកក្រុមហ៊ុន Microsoft លោកប៊ីលហ្គេត ជាអ្នកមានបំផុតនៅលើពិភពលោក ។ លោកប៊ីលហ្គេត មានទ្រព្យសម្បត្តិ៥៦ពាន់លានដុល្លារអាេមរិក ជាប់ចំណាត់ថ្នាក់លេខ២ ។ លោកកាឡូស ស្លីម ជាអ្នកជំនួញជនជាតិម៉ិចស៊ិក ហើយឆ្នាំ២០១១ នេះជាឆ្នាំទី២ ដែលលោកជាប់ចំណាត់ថ្នាក់ជាអ្នកមានបំផុតនៅលើពិភពលោករបស់ទស្សនាវដ្តី Forbes ។
ជាមួយគ្នានេះ តាមរបាយការណ៍ដែលចងក្រងដោយទស្សនាវដ្តី Forbes ដែរថា សហរដ្ឋអាេមរិក ដែលជាប្រទេសសេដ្ឋកិច្ចធំបំផុតលើពិភពលោកនៅតែជាប់ចំណាត់ថ្នាក់ជាប្រទេសមានមហាសេដ្ឋីច្រើនបំផុត ដោយមានមហាសេដ្ឋីដល់ទៅ៤១៣នាក់ឯណោះ ។
ចំពោះលោកកាឡូស ស្លីម បើទោះជាសេដ្ឋកិច្ចសាកលលោកនៅមិនទាន់ងើបឡើងវិញល្អប្រសើរក៏ដោយ ក៏ការធ្វើជំនួញរបស់លោកដំណើរការយ៉ាងរលូនដដែល ។
សម្រាប់លំដាប់ទី៣ នៅតែជាតំណែងដើម គឺលោកវ័ររ៉េន បាហ្វហ្វេត អាយុ៧៩ឆ្នាំ មានទ្រព្យសរុប៥០.០០០លានដុល្លារ ចំណែកលោកប៊ឺណាដ អាណូល បានរំកិលឡើងពីលំដាប់ទី៧ មកនៅលំដាប់ទី៤ មានទ្រព្យសម្បត្តិសរុប៤១.០០០លានដុល្លារ ។
ទោះបីជាយ៉ាងណាក៏ដោយ ក្រៅពីបណ្តាអ្នកមានទ្រព្យសម្បត្តិស្តុកស្តម្ភនៅក្នុងសហរដ្ឋអាេមរិក បណ្តាអ្នកមានទ្រព្យទាំងឡាយនៅអាស៊ីក៏មានការកើនឡើងពីចំនួនសរុបកាលពីឆ្នាំមុន (២០១០) ១.០១១នាក់ ដល់១.២១០នាក់ ក្នុងឆ្នាំ២០១១នេះដែរ។
ទោះបីជាសហរដ្ឋអាមេរិកនៅតែគ្រប់គ្រងលំដាប់ទី១ គិតជាភាគរយមានចំនួន៣៣% នៃមហាសេដ្ឋីនៅទូទាំងពិភពលោកក្តី ប៉ុន្តែមានការថយចុះពីអំឡុងពាក់កណ្តាលទសវត្សកន្លងមក ខុសពីតំបន់អាស៊ី-ប៉ាស៊ីហ្វិក ដែលចំនួនអ្នកមានទ្រព្យសម្បត្តិស្តុកស្តម្ភកើនឡើងយ៉ាងច្រើន ប្រជែងជាមួយតំបន់អឺរ៉ុប ដែលស្ថិតនៅលំដាប់ទី២នៅឡើយ ។
មហាសេដ្ឋីដែលកើនឡើងខ្ពស់យ៉ាងច្បាស់គឺនៅប្រទេសចិនពីចំនួន៦៩នាក់ ឡើងដល់១៥៥នាក់ ចំណែកនៅហុងកុង ពី២៥នាក់ ដល់៣៦នាក់ នៅឥណ្ឌាពីចំនួន៤៩នាក់ ដល់៥៥នាក់ និងនៅទូទាំងអាស៊ី-ប៉ាស៊ីហ្វិក មនុស្សមានទ្រព្យស្តុកស្តម្ភកើនពី២៣៤នាក់ក្នុងឆ្នាំមុនដល់៣៣២
នាក់ ៕
ចែករំលែកព័តមាននេះ