ប្រទេសបារាំង-តួកគី ៖ វិមានប្រធានាធិបតីបារាំងកាលពីថ្ងៃទី២៤តុលា បានបរិហារពាក្យពេចន៍ ដែលចាត់ទុកថាមិនអាចទទួលយកបាន របស់ប្រធានាធិបតីតូកគីលោករីស៊ីបតៃយីបអ័រដូហ្គាន ដែលនិយាយប្រមាថថាប្រធានាធិបតីបារាំងលោកម៉ានុយអែលម៉ាក្រុងជាមនុស្សមានបញ្ហាសុខភាពផ្លូវចិត្ត ក្រោយលោកម៉ាក្រុងលើកពីលទ្ធិបំបែកខ្លួននិយមអ៊ិស្លាម។
ពេលកំពុងមានជម្លោះនេះរវាងមេដឹកនាំទាំង២ ក៏មានការអំពាវនាវកាន់តែច្រើន ដល់បណ្ដាប្រទេសនៅមជ្ឈឹមបូព៌ា ឲ្យធ្វើពហិការចំពោះបណ្ដាផលិតផលបារាំង ក្រោយពីលោកម៉ាក្រុងសន្យាមិនបដិសេធ ការផ្សាយបណ្ដារូបត្លុករបស់ព្រះមហាម៉ាត់ ដែលហាមឃាត់ក្នុងសាសនាអ៊ិស្លាម។ ប្រមុខរដ្ឋបារាំងកាលពីថ្ងៃទី២២តុលា ពេលទៅគោរពវិញ្ញាណក្ខ័ន្ធ សាស្ត្រាចារ្យម្នាក់ត្រូវ ជនម្នាក់កាត់ក្បាលនៅបារាំង ដោយសារតែលោកបង្ហាញដល់សិស្សបណ្ដារូបត្លុករបស់ព្រះមហាម៉ាត់ ក្នុងពេលបង្រៀនពីសេរីភាពក្នុងការសម្ដែងមតិ។
ពាក្យរបស់មេដឹកនាំតួកគីដែលថាលោកម៉ាក្រុងមានបញ្ហាសុខភាពផ្លូវចិត្ត មកពីឥរិយាបថលោកចំពោះអ៊ិស្លាម វិមានប្រធានាធិបតីបារាំងអេលីហ្សេថា មិនអាចទទួលយកបានដោយនិយាយថា យើងទាមទារឲ្យលោកអ័រដូហ្គាន ផ្លាស់ប្ដូរនយោបាយលោក ព្រោះវាមានគ្រោះថ្នាក់ ។ យើងមិនចង់ធ្វើសង្គ្រាមប៉ាកា ដោយឥតប្រយោជន៍ឡើយ ហើយយើងមិនអាចទទួលយកបានចំពោះការប្រមាថ។ វិមានអេលីហ្សេប្រកាសពីការកោះហៅឯកអគ្គរដ្ឋទូតបារាំងប្រចាំតួកគីឲ្យវិលត្រឡប់មកស្រុកវិញ។
លោកអ័រដូហ្គានបានរិះគន់យ៉ាងខ្លាំងចំពោះឥរិបថរបស់លោកម៉ាក្រុង ចំពោះពួកអ៊ិស្លាម។ លោកបានបរិហារថា ជាការបង្កហេតុសេចក្ដីថ្លែងការណ៍របស់ប្រធានាធិបតីបារាំងពីលទ្ធិបំបែកខ្លួននិយមអ៊ិស្លាម៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ