រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអុីស្ទេតលើកទី៤ ប្រចាំឆ្នាំ២០១៥ ដែលបានធ្វើឡើងនៅលើទីលាន Myteam និងទីលានដំរីស កាលពីថ្ងៃអាទិត្យ ទី១០ ឧសភា កន្លងមកនេះ
រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអុីស្ទេតលើកទី៤ ប្រចាំឆ្នាំ២០១៥ ដែលបានធ្វើឡើងនៅលើទីលាន Myteam និងទីលានដំរីស កាលពីថ្ងៃអាទិត្យ ទី១០ ឧសភា កន្លងមកនេះ ឈានចូលដល់សប្តាហ៍ទី៥ ហើយ ។
ចំពោះលទ្ធផលប្រកួតជម្រុះនៅក្នុងពូលA លើទីលាន Myteam ក្រុម Christinair FC បានយកឈ្នះលើក្រុម TyGi FC នៅក្នុងលទ្ធផល២-១ ។ ក្រុម Christinair FC ប្រកួតបាន៥លើក ឈ្នះ៣លើក ចាញ់២លើក មាន៩ពិន្ទុ ចំណែកក្រុម TyGi FC ប្រកួតបាន៥លើកដូចគ្នា ឈ្នះ២លើក ចាញ់៣លើក ទើបតែរកបាន៦ពិន្ទុបុ៉ណ្ណោះ ។ មួយគូទៀតក្រុមខ័ណ្ឌពោធិសែនជ័យបានយកឈ្នះលើក្រុម Cateen FC ក្នុងលទ្ធផល៩-១។ ក្រុមនេះលេងបាន៥លើក ឈ្នះ៤លើក និងចាញ់១លើក មាន១២ពិន្ទុ ឯក្រុម Cateen FC លេងបាន៥ប្រកួត ស្គាល់ឈ្នះតែ១ប្រកួតបុ៉ណ្ណោះ ប្រឈមនឹងការជ្រុះចេញពីវគ្គជម្រុះនេះដោយចៀសមិនរួច ។
ក្រុមបាសាក់ បើទោះជាប្រកួតលើកនេះឈ្នះក្រុមសិលា៤-០ មែន បុ៉ន្តែមិនប្រាកដថា អាចឆ្លងផុតពីវគ្គជម្រុះនេះបានឬអត់នោះទេ ដោយសារប្រកួត៤លើក ឈ្នះ៣លើក ចាញ់១លើក មាន៩ពិន្ទុ ។ ចំណែកក្រុមសិលាប្រឈមនឹងការជ្រុះចេញពីវគ្គនេះច្រើនជាងដោយសារតែប្រកួតបាន៥លើក ឈ្នះ២លើក និងចាញ់៣លើក ។ នៅថ្ងៃនោះ ក្រុម Amru FC លត់ក្រុម Union FC នៅក្នុងលទ្ធផល៣-០ ។ ពេលនេះទោះបីជាក្រុម Amru FC ប្រឈមនឹងការធ្លាក់ចេញពីវគ្គជម្រុះយ៉ាងណាក្តី ក៏ក្រុមនេះធ្វើឱ្យក្រុម Union FC មិនអាចងើបរួចពីបាតតារាងនោះដែរ។ ក្រុម Union FC ប្រកួតបាន៥លើក អត់ទាន់ស្គាល់ឈ្នះម្តងណាឡើយ ។
ក្រុមខ្មែរយូណាយធីតពេលនេះកំពុងតែប្រជែងយកតំណែងជួរមុខក្នុងតារាងជាមួយក្រុម HPL FC បើទោះជាលើកនេះបានយកឈ្នះក្រុម HPL FC ក្នុងលទ្ធផល១-០ ក្តី ។ ក្រុមទាំងពីរនេះប្រកួតបាន៥លើក ឈ្នះ៤លើក ចាញ់១លើក មាន១២ពិន្ទុនៅក្នុងដៃដូចគ្នា ។
ដោយឡែកការប្រកួតជម្រុះនៅក្នុងពូលB ដែលមានធ្វើឡើងនៅលើទីលានដំរីសវិញនោះ ក្រុម Heng Asia លេងចាញ់ក្រុម V Train FC ក្នុងលទ្ធផល១-៣ ។ ក្រុម Heng Asia លេងបាន៥លើក ចាញ់ទាំង៥លើក ឯក្រុម V Train FC លេងបាន៥លើក ឈ្នះ៣លើក ស្មើ១លើក ចាញ់១លើក មាន១០ពិន្ទុ ។ ក្រុម Anvaya Kaila FC បានលត់ក្រុម Multi Media ឱ្យចាញ់នៅក្នុងលទ្ធផល៩-០ ។ រីឯក្រុម Narita FC ពេលនេះកំពុងតែឈរនៅជួរមុខគេក្នុងតារាងជាបណ្តោះអាសន្ន មាន១៣ពិន្ទុ បន្ទាប់ពីបានប្រកួតស្មើ៣-៣ ជាមួយក្រុមនិស្ស័យដែលមាន១០ពិន្ទុ ។
ក្រុម Goodhill FC បានយកឈ្នះលើក្រុមខ្លាស៥-១ ។ ទោះបីជាយ៉ាងនេះក្តី ក្រុមទាំង២នេះទើបតែរកបាន៤ពិន្ទុស្មើគ្នា ។ ចំណែកក្រុម RFL FC វិញនោះ ក្រោយពីប្រកួតឈ្នះក្រុម Y FC ៣-១ រួចមកនោះ ពេលនេះកើនបាន១២ពិន្ទុ ខណៈក្រុម Y FC ទើបតែរកបាន៤ពិន្ទុបុ៉ណ្ណោះ ៕
ចែករំលែកព័តមាននេះ