រាជធានីភ្នំពេញ ៖ នៅថ្ងៃអាទិត្យ ទី១៧ ឧសភា ចុងសប្ដាហ៍នេះ កីឡាករជើងខ្លាំងល្បីឈ្មោះគឺ បឺត ខាំ នឹងឡើងបង្ហាញខ្លួនជាសាធារណៈលើកដំបូងក្នុងការប្រកួតប្រដាល់អន្តរជាតិនៅស្ថានីយទូរទស្សន៍អាស៊ីអាគ្នេយ៍ (SEA-TV) បន្ទាប់ពីបានបាត់មុខអស់ច្រើនឆ្នាំ រឿងករណីរបួសជើង និងជាប់សូរទៅបង្ហាត់សិស្សនៅក្នុងប្រទេសជប៉ុន ។ យ៉ាងណាក៏ដោយ មុនការបង្ហាញខ្លួនរបស់ជើងខ្លាំងរូបនេះ សិស្សប្អូនរបស់គេឈ្មោះ បឺត សង្ឃឹម ដែលជាជើងថ្មី ក៏ធ្វើឲ្យមានការកោតសរសើរមិនតិចដែរ ជាមួយនឹងភាពខ្លាំងក្លាក្នុងការបញ្ចេញស្នៀតពិសេសៗនៅលើសង្វៀន ។
ឆ្លងកាត់ការប្រកួតទើបតែបាន៣០ដងប៉ុណ្ណោះ ប៉ុន្តែកីឡាករវ័យក្មេងមកពីខេត្តកំពង់ឆ្នាំង ឈ្មោះ បឺត សង្ឃឹម រូបនេះអាចកន្ត្រាក់បានការចាប់អារម្មណ៍ពីសំណាក់ទស្សនិកជនមិនធម្មតា ។ ក្នុងចំណោមការប្រកួតទាំង៣០ដង គេឈ្នះដល់ទៅ២៤ដង និងចាញ់តែ៦ដងប៉ុណ្ណោះ ។ បើទោះជាការប្រកួតលើកចុងក្រោយបំផុតកាលពីថ្ងៃអាទិត្យមុន គេមិនទទួលបានជោគជ័យ ដោយសារប៉ះជាមួយជើងខ្លាំង និងល្បីឈ្មោះ មាស សារ៉ាក់ ដែលជាកីឡាករល្អ ក៏ភាពខ្លាំងក្លា និងទេពកោសល្យក្នុងការប្រកួតចំនួន៥ទឹកនោះត្រូវបានស្ដែងឡើងធ្វើឲ្យអ្នកទស្សនាជក់ចិត្ត ។
ទាំងដៃ និងជើងរបស់កីឡាកររូបនេះមានភាពរហ័ស និងពោរពេញដោយបច្ចេកទេសក្នុងការវាយចេញទាំងអស់ ដែលធ្វើឲ្យអ្នកណាក៏មើលឃើញថា ប្រសិនបើគូប្រកួតរបស់គេនាថ្ងៃនោះ មិនមែនជាកីឡាករល្បីឈ្មោះ មាស សារ៉ាក់ គឺពិតជាទៅមិនរួច។ នៅលើសង្វៀននោះ មាស សារ៉ាក់ ឈ្នះពិន្ទុដោយត្រដាបត្រដួសបំផុត ហើយក៏ទ្រមខ្លួនណាស់ដែរទើបធ្វើឲ្យភាពលេចធ្លោហាក់ធ្លាក់ទៅលើកីឡាករ វ័យក្មេង បឺត សង្ឃឹម ច្រើនជាង។ ពិសេសនៅពេលអ្នកណាក៏ដឹងថា គេជាអ្នកជំនាន់ក្រោយរបស់ បឺត ខាំ ដែលនឹងបង្ហាញខ្លួននៅសប្ដាហ៍នេះ ។ ការប្រកាសឲ្យឮពីឈ្មោះរបស់ បឺត សង្ឃឹម ធ្វើឲ្យគេនឹកដល់កីឡាករបឺត ខាំ ភ្លាម ហើយក៏រុញឲ្យកីឡាករដែលគេកម្រឮឈ្មោះរូបនេះទទួលបានការចាប់អាម្មណ៍ផងដែរ ។
នាពេលកន្លងមក គេធ្លាប់តែឮឈ្មោះកីឡាករបឺត ខាំ, បឺត សំរេច និងបឺត សំខាន់ ប៉ុណ្ណោះ ដែលអ្នកទាំងនោះសុទ្ធតែបានបង្ហាញនូវភាពខ្លាំងក្លាធ្វើឲ្យមហាជនអត់ទ្រាំមិនគាំទ្រមិនបាន ។ អ៊ីចឹងហើយទើបភាពរឹងមាំក្នុងពេលប្រយុទ្ធរបស់កីឡាករស៊េរីថ្មី បឺត សង្ឃឹម បានជួយឲ្យក្រេឌីតរបស់គេឈានឡើងមិនបាច់ប្រឹង នៅពេលដែលការប្រកួតរបស់កីឡាកររូបនេះក៏ល្អ និងមានចំណុចគួរឱ្យជក់ចិត្ត ។ ធៀបនឹងកីឡាករជើងថ្មីដូចគ្នា បឺត សង្ឃឹម កន្ត្រាក់បានការគាំទ្រខ្ពស់ជាងជាមួយនឹងបច្ចេកទេសល្អ ដែលកីឡាករភាគច្រើនមិនអាចធ្វើបាន ។ ស្នៀតដែលគេផ្ដល់តម្លៃថា បឺត សង្ឃឹម ល្អ អាចស្នងតំណែងរាមច្បង គឺបឺត ខាំ បាន ត្រង់គេចេះប្រើស្នៀតនាគវ័ធកន្ទុយ ទាត់បង្ហោះ និងកែងបកបានរស់រវើក ។
ទោះបីយ៉ាងណា គេក៏នៅមិនទាន់ច្បាស់ពីការវាយលុក និងនៅអន់កណ្ដាប់ដៃបន្តិចដែរ ទើបធ្វើឲ្យភាពខ្លាំងក្លានៅមិនទាន់ដល់កម្រិត ឬអាចហៅថា មិនទាន់ចេះប្រើដើម្បីបំបាក់សិស្សច្បង មាស សារ៉ាក់។ មនុស្សភាគច្រើនមើលឃើញថា មិនយូរមិនឆាប់ កីឡាកររូបនេះនឹងឈានដល់ចំណុចស្មើរៀមច្បងរបស់ខ្លួននៅពេលការប្រកួតកាន់តែផ្ដល់បទពិសោធន៍ឲ្យគេគ្រប់គ្រាន់ ។ ក្នុងនោះឱកាសឡើងប្រកួតគូឯក និងគូអន្តរជាតិ ក៏ត្រូវគេសម្លឹងឃើញថា មិនពិបាកដើម្បីឲ្យកីឡាកររូបនេះឈោងចាប់នោះផង ។ កីឡាករបឺត សង្ឃឹម ត្រូវគេដឹងថា មានស្រុកកំណើតនៅភូមិស្រះកែវ ឃុំមេលំ ស្រុកបរិបូណ៌ ខេត្តកំពង់ឆ្នាំង ដែលជាស្រុកតែមួយនឹងកីឡាករបឺត ខាំ ។
យ៉ាងណាក៏ដោយ គេមិនទាន់ដឹងថា កីឡាកររូបនេះជាសាច់ញាតិនឹងកីឡាករបឺត ខាំ ឬគ្រាន់តែជាសិស្សប្អូនរួមគ្រូ រួមក្លិបជាមួយគ្នានៅឡើយទេ ក្នុងពេលដែលការសុំសម្ភាសនៅមិនអាចធ្វើបានបែបនេះ ។ តែអ្វីដែលមានលក្ខណៈស្រដៀងគ្នា គឺគេមានថ្វីដៃល្អ សម្បូរស្នៀតពិសេសៗក្នុងពេលវាយលុកគូប្រកួត ដែលមើលទៅរស់រវើកមិនអន់ជាងកីឡាករបឺត ខាំ ឬកីឡាករត្រកូលបឺតផ្សេងទៀតដែលជារៀមច្បងទេ ។ បឺត សង្ឃឹម មានអាយុ២០ឆ្នាំ កម្ពស់១,៦៥ម៉ែត្រ និងទម្ងន់៥៧គីឡូក្រាម និងមានកម្លាំងជើងរឹងមាំ ហើយអាចទាត់ខ្ពស់ និងរហ័ស ។ ការប្រឡូកនៅដើមឆ្នាំ២០១៥កន្លងមក គេឈ្នះការប្រកួតជាប់សូរ ដោយទើបតែចាញ់កីឡាករមាស សារ៉ាក់ កាលពីថ្ងៃអាទិត្យមុនប៉ុណ្ណោះទើបធ្វើឲ្យលទ្ធផលដែលបានស្ដែងឡើងទទួលបានការចាប់អារម្មណ៍តែមួយប៉ប្រិចភ្នែក ។
បឺត សង្ឃឹម ត្រូវគេមើលឃើញថា ជាកីឡាករស៊េរីក្រោយក្នុងត្រកូលបឺតតែម្នាក់ដែលអាចស្នងតំណែងអ្នកមុនៗ ជាពិសេសក្នុងដំណាក់កាលដែលបឺត សំខាន់ និង បឺត សំរេច ជាដើម បានសម្រេចធីបចោលនូវការប្រកួត ។ មានការទស្សន៍ទាយថា ការបង្ហាញខ្លួនជាថ្មីរបស់កីឡាករបឺត ខាំ នឹងជួយឲ្យ បឺត សង្ឃឹម ដែលជាជំហានក្រោយ មានក្រេឌីតដោយមិនពិបាក ព្រមជាមួយនឹងទេពកោសល្យល្អប្រសើររបស់កីឡាកររូបនេះគ្រប់ពេលឡើងរេញ ៕
ចែករំលែកព័តមាននេះ