រាជធានីភ្នំពេញ៖ ក្រុមហ៊ុនសាំស៊ុងបានបញ្ចប់វគ្គបណ្តុះបណ្តាល វិជ្ជាជីវៈ លើកទី2 ទៅលើផ្នែក មេកានិក និង អេឡិចត្រូនិចដល់សាស្ត្រចារ្យ មហាវិទ្យាល័យ អេឡិចត្រូនិក និង មេកានិក នៅវិទ្យាស្ថានពហុបច្ចេកទេសកម្ពុជា (NPIC) ធ្វើឡើងកាលពីថ្ងៃទី 4 ដល់ថ្ងៃទី 8 ឧសភា ដើម្បីពង្រឹងធនធានមនុស្សក្នុងវិស័យបច្ចេកវិទ្យា នៅកម្ពុជា។
លោក ហ្គីហាន់ លី នាយកគ្រប់គ្រងក្រុមហ៊ុនសាមសុង អេឡិកត្រូនិច ប្រចាំកម្ពុជា បាន ឲ្យដឹងថា«យើងប្តេជ្ញាគាំទ្រវិស័យបច្ចេកវិទ្យាក្នុងប្រទេសកម្ពុជាតាមរយៈការបណ្តុះបណ្តាល សមត្ថភាពដល់អ្នកមានជំនាញផ្នែកបច្ចេកវិទ្យា។ ឆ្នាំនេះយើងបាន ធ្វើការវិនិយោគធនធានបន្ថែម ទៀតដើម្បីអាចទទួលសិក្ខាកាមចូលរួមកាន់តែច្រើន។
សាស្ត្រាចារ្យទាំងអស់ ដែលបានទទួលការបណ្តុះបណ្តាលចំនួន 4 ថ្ងៃនេះ ត្រៀមនឹងបង្ហាត់បង្ហាញបន្តទៅដល់សិស្សនិស្សិតចំនួន 60 នាក់ទៀតនៅវិទ្យាស្ថានពហុបច្ចេកទេសនៃកម្ពុជា សម្រាប់វគ្គសិក្សា Samsung Tech Institute ជំនាន់ទី 2 ក្នុងឆ្នាំ 2015 នេះ។ សិក្ខាកាមទាំងអស់បានទទួល ការបណ្តុះបណ្តាល ទៅលើផលិតផល សាំស៊ុង ដែលមានដូចជា ទូរទស្សន៍ ម៉ាស៊ីនត្រជាក់ ទូរទឹកកក ម៉ាស៊ីនបោកសម្លៀកបំពាក់ និងទូរស័ព្ទដៃ ។ វគ្គបណ្តុះបណ្តាលនេះត្រូវបានផ្តោតទៅលើការផ្គុំ ការជួសជុល និងការដោះស្រាយបញ្ហាផ្សេងៗ ។
លោកបន្តថា «ផលិតផល អេឡិចត្រូនិចរបស់សាំស៊ុង ត្រូវបានប្រើប្រាស់នៅជុំវិញ ពិភពលោក ដូច្នេះសិក្ខាកាម ទាំងអស់អាចប្រើប្រាស់ចំណេះដឹង និង ជំនាញដែល បានមកពីវគ្គបណ្តុះបណ្តាលនេះ សម្រាប់ប្រើប្រាស់ក្នុងប្រទេសកម្ពុជាក៏ដូចជាប្រទេស ដទៃទៀតផងដែរ»។
លោកសាស្ត្រចារ្យ ស្រី ភារម្យ ដែលបានចូលរួមក្នុងវគ្គបណ្តុះបណ្តាលនេះបានមានប្រសាសន៍ថា«ខ្ញុំបាទសូមថ្លែងអំណរអរគុណចំពោះក្រុមហ៊ុនសាំស៊ុង ដែលបានបើកវគ្គបណ្តុះបណ្តាលជាលើកទី 2 នេះ ដែលបានអនុញាតឲ្យពួកខ្ញុំ អាចអនុវត្តទ្រឹស្តី ដែលរៀន រួចជាមួយផលិតផលទំនើបៗរបស់សាំស៊ុង។
វគ្គបណ្តុះបណ្តាល Samsung Tech Institute ជំនាន់ទី 1 ត្រូវបានបញ្ចប់ដោយជោគជ័យ ចុងឆ្នាំ 2014 ដែលកាលនោះ ក្រុមហ៊ុន សាំស៊ុងបានបណ្តុះបណ្តាល សិស្សចំនួនត្រឹមតែ 50នាក់ដោយផ្តោតទៅលើបច្ចេកវិទ្យាទូរស័ព្ទដៃប៉ុណ្ណោះ។ ដោយសារតែផលិតផល អេឡិចត្រូនិចមានកាន់តែច្រើននៅលើទីផ្សារកម្ពុជា ក្រុមហ៊ុន សាមស៊ុងបានសម្រេចរៀបចំ កម្មវិធីសិក្សាឲ្យកាន់តែទូលំទូលាយជាងមុនដោយដាក់បញ្ចូលនូវ មេរៀនអំពីផលិតផល អេឡិចត្រូនិចជាច្រើនទៀតឲ្យសិក្ខាកាមបានសិក្សាយល់ដឹង និង ដើម្បីបំពេញតម្រូវការ របស់អតិថិជននៅក្នុងទីផ្សារការងារនៅកម្ពុជា។
ប្អូនប្រុស ណេង បូរ៉ា វ័យ 21 ឆ្នាំ ដែលបានចូលរួមវគ្គបណ្តុះបណ្តាលកាលពីឆ្នាំ 2014 បានទទួលការងារជាបុគ្គលិកជំនាញនៅ Samsung Service Center សាខា រាជធានីភ្នំពេញ បានមានឲ្យដឹងថា ក្រោយពីបញ្ចប់ការចុះកម្មសិក្សានៅ Samsung Service Center រយៈពេល 3 ខែរួចមក ខ្ញុំបានយល់ដឹងពីផលិតផល អេឡិចត្រូនិចដែលទើបនឹងចេញថ្មីៗរបស់សាំស៊ុងក៏ដូចជា បានយកចំណេះវិជ្ជាដែល ខ្ញុំបានរៀនមកធ្វើការអនុវត្តផងដែរ។ នេះគឺជាឱកាសដ៏កម្រមានមួយសម្រាប់សិស្សដូចជា យើងទាំងអស់គ្នា ព្រោះយើងអាចទាក់ទងជាមួយអ្នកជំនាញនិង យល់ដឹងពីបញ្ហាផ្សេងៗ របស់អតិថិជន ហើយ បច្ចុប្បន្នខ្ញុំក៏ត្រូវបានក្រុមហ៊ុន ជ្រើសរើសឲ្យបម្រើការងារនៅទីនេះផងដរ។ក្រៅពីទទួលបាននូវចំណេះដឹងសម្រាប់អភិវឌ្ឍន៍នូវសមត្ថភាពរបស់ខ្លួន គ្រប់សិស្សទាំង អស់ដែលបានសិក្សាក្នុងវគ្គបណ្តុះបណ្តាលនេះ ក៏បានទទួលនូវសំភារៈសម្រាប់សិក្សា ហើយ និងប្រាក់ឧបត្ថម្ភប្រចាំខែ មួយចំនួនពីក្រុមហ៊ុនសាំស៊ុង ជួយសំរួលដល់ការសិក្សារបស់ពួកគាត់ រហូតដល់ចប់វគ្គបណ្តុះបណ្តាល និងសិស្សឆ្នើមក៏ទទួលបានឱកាសការងារពីក្រុមហ៊ុនផងដែរ៕
ចែករំលែកព័តមាននេះ