សម្បកកង់របស់រថយន្តត្រូវតែមានតុល្យភាព ដើម្បីធានាបាននូវប្រតិបត្តិការដ៏ត្រឹមត្រូវក្នុងពេលបើកបរនៅលើដងផ្លូវ ។ បើសម្ពាធខ្យល់មិនស្មើគ្នារបស់កង់នីមួយៗអាចធ្វើឱ្យការបើកបររបស់អ្នកមិនប្រកបដោយផាសុកភាពទ្បើយ ។ សញ្ញានៃភាពខុសប្រក្រតីរបស់សម្បកកង់រថយន្តមានដូចជា៖
ភាពរំញ័រ
ដំណើរនៃភាពរំញ័រ គឺជាសញ្ញាដែលគេតែងកត់សម្គាល់ឃើញភាគច្រើននៅពេលសម្បកកង់រថយន្តពុំមានតុល្យភាព ឬក៏មានបញ្ហាជាដើម។ ខណៈពេលតុល្យភាពត្រូវបានរំខានដោយប្រការណាមួយភាពរំញ័រនឹងចាប់ផ្តើមដំណើរការតាមសាក់ស៊ីរបស់រថយន្ត ហើយក៏ឈានទៅដល់ប្លុកកាប៊ីនអ្នកបើកផ្ទាល់តែម្តង ។ ទំហំនៃចលនារំញ័រនេះអាស្រ័យទៅលើកម្រិតនៃតុល្យភាពកង់ដែលទទួលការរំខាន ពីស្ថានភាពផ្លូវនិងល្បឿនរថយន្តជាដើម ។
ភាពរំញ័រកៅអីនិងចង្កូត
ប្រសិនជាកង់មុខរបស់រថយន្តពុំមានតុល្យភាពត្រឹមត្រូវភាគច្រើនចលនាបំលាស់ទីនិងរំញ័រនឹងប្រមូលផ្តុំលើដៃចង្កូតតែម្តង ។ ប៉ុន្តែបញ្ហាបែបនេះ ស្ថិតនៅកង់ក្រោយវិញ ជាទូទៅភាគច្រើនអ្នកប្រាកដជាមានអារម្មណ៍ញ័រៗនៅកៅអីជាមិនខាន ។
ភាពសឹកហួសប្រមាណ
កាលបើសម្បកពុំមានតុល្យភាពចលនារង្វិលជុំរបស់កង់កាន់តែដាក់បន្ទុកលើចំណែកជាក់លាក់របស់សម្បកនោះ ភាពរត់មិនស្មើគ្នា គឺជាមូលហេតុដែលបណ្តាលឱ្យកើតមានចលនារំញ័រដូចបានលើកទ្បើងខាងលើ ហើយកត្តាទាំងនោះក៏នាំឱ្យជួបបញ្ហាសឹកខូចគុណភាពសម្បកកាន់តែលឿន ។ លើសពីនេះទៅទៀត ភាពសឹករបស់វាគឺជាហានិភ័យខ្ពស់មួយនៃការផ្ទុះបែកកង់ក៏មានដែរ ។
អត្រាស៊ីប្រេងឥន្ធនៈកើនទ្បើង
ប្រសិនជាអត្រាសន្សំសំចៃប្រេងឥន្ធនៈរថយន្តអ្នកស្រាប់តែថយចុះភ្លាមៗ គឺវាអាចបណ្តាលមកពីសម្បកកង់បាត់បង់តុល្យភាពយ៉ាងច្បាស់ ។ ទំហំនៃការថយចុះផ្អែកទៅលើភាពធ្ងន់ធ្ងរនៃបញ្ហានេះ ប្រសិនបើអ្នកបើករថយន្តក្នុងកម្រិតល្បឿនលឿននោះប្រាកដជាកត់សម្គាល់ឃើញពីអត្រាធ្លាក់ចុះក្នុងប្រសិទ្ធភាពសន្សំសំចៃប្រេងឥន្ធនៈជាជាងការបើកបរល្បឿនយឺត ៕
ចែករំលែកព័តមាននេះ