ខេត្តបាត់ដំបង៖ របាយការណ៍ស្ដីពីគ្រោះមហន្តរាយដោយជំនន់ទឹកភ្លៀងជិត២សប្ដាហ៍កន្លងទៅនេះ របស់រដ្ឋបាលស្រុកថ្មគោល បានបង្ហាញពីវិនាសកម្មធ្ងន់ធ្ងរស្ទើរគ្រប់បែបយ៉ាង ។ ជាពិសេស «ផ្លូវ ថ្នល់ និងដំណាំកសិកម្ម» ខណៈជិត១ម៉ឺនខ្នង…
ខេត្តបាត់ដំបង៖ របាយការណ៍ស្ដីពីគ្រោះមហន្តរាយដោយជំនន់ទឹកភ្លៀងជិត២សប្ដាហ៍កន្លងទៅនេះ របស់រដ្ឋបាលស្រុកថ្មគោល បានបង្ហាញពីវិនាសកម្មធ្ងន់ធ្ងរស្ទើរគ្រប់បែបយ៉ាង ។ ជាពិសេស «ផ្លូវ ថ្នល់ និងដំណាំកសិកម្ម» ខណៈជិត១ម៉ឺនខ្នង បានរងផលប៉ះពាល់ ហើយរហូតដល់ពេលនេះ ប្រជាពលរដ្ឋដែលសមត្ថកិច្ចជម្លៀសចេញទៅកាន់ទីទួលសុវត្តិភាពមួយចំនួន នៅមិនទាន់វិលត្រឡប់ទៅកាន់លំនៅឋានវិញនៅឡើយទេ ព្រោះទឹកនៅតែលិចលង់លំនៅឋានពួកគាត់នៅឡើយ ។
របាយការណ៍ស្ដីពីភាពមហន្តរាយ ដោយសារគ្រោះទឹកជំនន់របស់រដ្ឋបាលស្រុកថ្មគោល ដែលកោះសន្តិភាពទទួលបាន កាលពីថ្ងៃទី២២ តុលា ពីលោកអធិការស្រុកថ្មគោល បានឲ្យដឹងថា ឃុំទាំង១០នៅក្នុងរដ្ឋបាលស្រុកថ្មគោល គឺគ្មានឃុំមួយណាដែលបានរួចផុតគ្រោះទឹកជំនន់ដែលទើបថមថយកាលពីប៉ុន្មានថ្ងៃមុននេះឡើយ។ របាយការណ៍ការរដ្ឋបាលស្រុកថ្មគោល បានគិតត្រឹមថ្ងៃទី២០ តុលា ដែលជំនន់ទឹកភ្លៀងបានផុតរលត់ទៅ ក្រោយពីជោរជន់អស់រយៈពេលជិត០២សប្ដាហ៍ គឺ បានបន្សល់ទុកនៅស្លាកស្នាមមហន្តរាយយ៉ាងធ្ងន់ធ្ងរ ជាពិសេស«ផ្លូវថ្នល់និងដំណាំកសិកម្ម»តែ
ម្ដង។
បើយោងរបាយការណ៍នេះបានបង្ហាញថា ជំនន់ទឹកភ្លៀងបានធ្វើឲ្យប៉ះពាល់លំនៅឋានរបស់ប្រជាពលរដ្នៅក្នុងស្រុកថ្មគោលទាំងមូលប្រមាណ៩,៣២០ខ្នង តែបានជម្លៀសពលរដ្ឋចំនួន២,២៦៧គ្រួសារទៅកាន់ទីទូលសុវត្ថិភាព ប៉ះពាល់សាលារៀនចំនួន២៦ខ្នង ប៉ះពាល់វត្តអារ៉ាមចំនួន០៧វត្ត ស្ពានចំនួន០២ តែស្ពាន០១កន្លែងបានខូចខាត ប៉ះពាល់ផ្លូវថ្នល់ប្រវែង ៣៤៧,១១៥ម៉ ក្នុងនោះខូចខាតអស់ប្រវែង១៦៤,៦៩៣ម៉ ខូចខាតដំណាំស្រូវអស់ប្រមាណ ៣២,២២១,៣៧ហិចតា និង ដំណាំផ្សេងៗនៅចំការអស់ប្រមាណ ៨៩ហិកតា។
ប៉ុន្តែជាមួយនឹងមហន្តរាយផ្លូវថ្នល់ និងដំណាំកសិកម្មធ្ងន់ធ្ងរនេះ ក៏មានប្រជាពលរដ្ឋលង់ទឹកចំនួន០៧នាក់ ក្នុងនោះ មាន០៣នាក់បានស្លាប់ ខណៈមានពលរដ្ឋចំនួន០២នាក់ទៀតត្រូវសត្វពស់ចឹក តែមិនស្លាប់ដោយសារបញ្ជូនទៅកាន់កាន់មន្ទីរពេទ្យទាល់ពេល។ អធិការនគរបាលស្រុកថ្មគោល លោក ផង់ សុភាព បានប្រាប់កោះសន្តិភាពថា ក្នុងចំណោមឃុំទាំង១០ នៅក្នុងស្រុកថ្មគោល គេឃើញឃុំអូរតាគី ហាក់ទទូលរងគ្រោះដោយជំនន់ទឹកភ្លៀងនេះធ្ងន់ធ្ងរជាងគេ ជាពិសេសដំណាំកសិកម្មតែម្ដង។
លោកផង់ សុភាព បានបញ្ជាក់ថា រហូតមកដល់ពេលនេះទឹកបានស្រកចុះច្រើន ប្រជាពលរដ្ឋមួយចំនួនបានវិលត្រឡប់ទៅកាន់លំនៅឋានវិញជាបណ្ដើរៗ តែពលរដ្ឋមួយចំនួននៅឃុំអូរតាគី បាននិងកំពុងរស់នៅក្នុងជំរុំប្រក់តង់កៅស៊ូយ៉ាងរកេតរកូតនៅលើផ្លូវជាតិលេខ៥នៅឡើយទេ ។ ប៉ុន្តែជាមួយគ្នានេះ អាជ្ញាធរ និង សាខាកាកបាទក្រហម រួមទាំងសប្បុរសជននានាផង បាននិងកំពុងបន្តចុះផ្ដល់អំណោយសង្គ្រោះបន្ទាន់ជូនដល់ពលរដ្ឋរងគ្រោះ ជាបន្តបន្ទាប់ស្ទើររាល់ថ្ងៃផងដែរ៕
ចែករំលែកព័តមាននេះ