រដ្ឋាភិបាលជប៉ុនមានគម្រោងស្នើដាក់ប្រភពឧស្សាហកម្មក្នុងសម័យសង្គ្រាមលោកក្នុងបញ្ជី បេតិកភណ្ឌពិភពលោករបស់អង្គការយូណេស្កូ តែមានការតវ៉ាពីប្រទេសជិតខាងដែលពលរដ្ឋខ្លួន
រដ្ឋាភិបាលជប៉ុនមានគម្រោងស្នើដាក់ប្រភពឧស្សាហកម្មក្នុងសម័យសង្គ្រាមលោកក្នុងបញ្ជី បេតិកភណ្ឌពិភពលោករបស់អង្គការយូណេស្កូ តែមានការតវ៉ាពីប្រទេសជិតខាងដែលពលរដ្ឋខ្លួនត្រូវជប៉ុនបង្ខំឱ្យធ្វើជាទាសករក្នុងសម័យសង្គ្រាមនោះ ។
អាជ្ញាធរជប៉ុនបានពិភាក្សាជាមួយ ICOMOS ដែលជាស្ថាប័នពិភាក្សាផ្នែកបុរាណវិទ្យារបស់អង្គការស្រាវជ្រាវវិទ្យាសាស្ត្រនិងវប្បធម៌នៃអង្គការសហប្រជាជាតិ(យូណេស្កូ) ក្នុងទិសដៅឈានឆ្ពោះទៅរកការចុះបញ្ជីចំពោះកន្លែងឧស្សាហកម្មចំនួន២៣ ក្នុងចំណោម៨ខេត្តនៅជប៉ុន ធ្វើជាបេតិកភណ្ឌពិភពលោក។ ទីតាំងឧស្សាហកម្មទាំងនោះសាងសង់ឡើងនៅក្នុងសម័យឧស្សាហកម្មរបស់ជប៉ុនកាលពីចុងសតវត្សទី១៩ ដូចជារោងចក្រផលិតដែក យ៉ាហាតា ឬហៅថា កុងកានជីម៉ា មានលក្ខណៈជាកោះមានរូងរាងជានាវាចម្បាំង និងធ្លាប់ជាប្រភពធ្យូងថ្មនៅខាងក្រោមសមុទ្រដ៏ធំរបស់ជប៉ុន ។
ទោះជាយ៉ាងណាក៏ដោយការស្នើចុះបញ្ជីទីតាំងទាក់ទងនឹងប្រវត្តិសាស្ត្រ ក្នុងអំឡុងពេលមានសង្គ្រាមពិភពលោករបស់ជប៉ុននោះរងការជំទាស់ពីកូរ៉េខាងត្បូង និងចិន ដែលពលរដ្ឋខ្លួនធ្លាប់រងការបង្ខិតបង្ខំឱ្យធ្វើជាទាសករនៅទីតាំងទាំងនោះបណ្តាលឱ្យស្លាប់ជាច្រើននាក់ ។ ជប៉ុនបញ្ជាក់ថា កំពុងស្វែងរកគោលការណ៍អភិរក្សតំបន់ទាំងនោះ និងបានណែនាំដល់កូរ៉េខាងត្បូង និងប្រទេសផ្សេងទៀតដែលជំទាស់លើការចុះបញ្ជីទីតាំងទាំងនោះ ។
គណៈកម្មការបេតិកភណ្ឌពិភពលោកនឹងពិចារណាថា តើគួរចុះបញ្ជីទីតាំងទាំងនោះជាបេតិកភណ្ឌពិភពលោក ឬអត់ នៅក្នុងកិច្ចប្រជុំនៅក្រុងប៊ន ប្រទេសអាល្លឺម៉ង់ នៅដើមខែកក្កដា ២០១៥ ៕
ចែករំលែកព័តមាននេះ