រាជធានីភ្នំពេញ ៖ ក្រុមកម្មករសំណង់មានទាំងជនជាតិចិន និង ជនជាតិខ្មែរ រួមទាំងបុគ្គលិកប្រុស ស្រី មួយចំនួនទៀតចំនួនជា១២០នាក់ ដែលធ្វើការងារនៅក្នុងការដ្ឋានសំណង់អគារខុនដូរកំពស់២១ជាន់របស់ក្រុមហ៊ុន PHNOM…
រាជធានីភ្នំពេញ ៖ ក្រុមកម្មករសំណង់មានទាំងជនជាតិចិន និង ជនជាតិខ្មែរ រួមទាំងបុគ្គលិកប្រុស ស្រី មួយចំនួនទៀតចំនួនជា១២០នាក់ ដែលធ្វើការងារនៅក្នុងការដ្ឋានសំណង់អគារខុនដូរកំពស់២១ជាន់របស់ក្រុមហ៊ុន PHNOM PENH STAR បាននាំគ្នាធ្វើការតវ៉ានៅខាងមុខស្នាក់ការក្រុមហ៊ុន ក្រោយពីក្រុមហ៊ុនមួយនេះមិនបានបើកលុយអោយកម្មករ ដោយអ្នកខ្លះអស់រយៈពេល៣ខែ និងខ្លះទៀត៤ខែមកហើយ និងកំពុងតែជួបការលំបាកយ៉ាងខ្លាំងគ្រប់គ្នា ។
ដោយប្រាក់ខែសំរាប់កម្មករជនជាតិចិនក្នុងមួយខែ ម្នាក់ទទួលបានចាប់ពី ១ពាន់ដុល្លារ ទៅជាង១ពាន់ដុល្លារ ហើយកម្មករសំណង់ជាជនជាតិខ្មែរវិញ ក្នុងមួយខែ ម្នាក់ទទួលបានចាប់ពី៣០០ដុល្លារ ទៅដល់៤៥០ដុល្លារ ហើយនាំគ្នាឈប់ធ្វើការ និងទាមទារជាច្រើនលើកច្រើនសារមកហើយនៅមិនទាន់មានដំណោះស្រាយទៀតនោះ។
ការផ្ទុះការតវ៉ាខាងលើនេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៩ ខែ តុលា ឆ្នាំ២០២០ នៅខាងមុខស្នាក់ការក្រុមហ៊ុន PHNOM PENH STAR មានទីតាំងផ្ទះលេខ២៧ ផ្លូវលេខ ៥០៨ ក្នុងសង្កាត់ ផ្សារដើមថ្កូវ ខណ្ឌចំការមន។
តាមប្រភពពីនារីម្នាក់ឈ្មោះ តែម ស្រីលក្ខណ៍អាយុ ២៥ឆ្នាំ ជាអ្នកបកប្រែភាសាចិននៅក្រុមហ៊ុនសំណង់ PHNOM PENH STAR បានប្រាប់ឱ្យដឹងថា ក្នុងពេលនេះដែរ កម្មករសំណង់ជាជនជាតិចិន និងជនជាតិខ្មែរផ្នែកតបំពង់ទឹកភ្លើង ដែកពុម្ព រួមទាំងក្រុមបុគ្គ លិក ប្រុស ស្រី ផ្នែកផ្សេងៗទៀតមានគ្នាសរុបប្រមាណជា១២០នាក់បាននាំគ្នាមកឈរធ្វើការតវ៉ាទាមទារអោយក្រុមហ៊ុនបើកប្រាក់ខែដល់ពួកគាត់។
តាមប្រភពដដែលបានបន្តថា ដោយសារតែខាងក្រុមហ៊ុនមិនបានបើកលុយអោយពួកគាត់ទាំងអស់គ្នាតាំងពីខែមិថុនា មកម៉្លេះ រហូតមកទល់នឹងថ្ងៃទី១៣ ខែកញ្ញា ឆ្នាំ ២០២០ នេះ ជាថ្ងៃដែលពួកគាត់ដល់ថ្ងៃត្រូវបើកលុយទៀត តែខាងក្រុមហ៊ុននៅតែមិនទាន់ឃើញបើកលុយអោយទៀត។
តាមប្រភពដដែលបានប្រាប់បន្តទៀតថា ចាប់ពីពេលដែលខាងក្រុមហ៊ុនអគារខុនដូរ មិនបានបើកប្រាក់ខែអោយចាប់ពីថ្ងៃទី១៣ ខែកញ្ញា នោះមក ពួកយើងទាំងអស់គ្នា ក៏បានឈប់ធ្វើកាងារ ហើយនាំគ្នាធ្វើការនិយាយចរចាជាមួយនឹងក្រុមហ៊ុនរឿងលុយជាច្រើនលើកច្រើនសារមកហើយតែ ខាងក្រុមហ៊ុនមិនមានដំណោះស្រាយអ្វីឡើយ ធ្វើអោយពួកគាត់ជាក្រុមកម្មករជនជាតិចិនជួបការលំបាកយ៉ាងខ្លាំង អត់មានលុយចាយ និង ទិញម្ហូបអាហារហូបចុកស្ទើរតែដាច់ខ្យល់ ចំណែកឯការស្នាក់នៅរបស់ពួកគាត់ គឺជាបន្ទុករបស់ខាងក្រុមហ៊ុនអោយស្នាក់នៅ ដោយសារគ្មានដំណោះស្រាយបែបនេះ ទើបពេលនេះពួកគាត់ទាំងអស់គ្នាចេញមកធ្វើការតវ៉ាបែបនេះតែម្តង។
លោក ឡាយ វិច អាយុ៣១ឆ្នាំ បានប្រាប់ឱ្យដឹងថា គាត់ជាកម្មករសំណង់ផ្នែករៀបឥដ្ឋនៅអគារខុនដូរដែលមានកំពស់២១ជាន់ របស់ក្រុមហ៊ុនខាងលើនេះ ដោយទទួលបានប្រាក់ខែក្នុង ១ខែ ចំនួន៣៥០ដុល្លារ ហើយក្រុមហ៊ុនមិនបានបើកលុយអោយជាង៣ខែមកហើយ។ ការដែលក្រុមហ៊ុនមិនបានបើកលុយអោយនេះ គឺធ្វើអោយក្រុមគ្រួសារ កូនចៅរបស់គាត់កំពុងតែជួបការលំបាកយ៉ាងខ្លាំង ដោយគ្មានលុយចាយសម្រាប់ចំណាយផ្សេងៗក្នុងគ្រួសារជាដើម ព្រោះតែសព្វថ្ងៃរស់រំពឹងទៅលើតែការធ្វើការងារសំណង់របស់គាត់តែមួយនេះប៉ុណ្ណោះ។
ក្នុងការនាំគ្នាធ្វើការតវ៉ាទាមទារប្រាក់ខែរបស់ក្រុមកម្មករសំណង់ទាំង ជនជាតិចិន និង ជនជាតិខ្មែរសរុបប្រមាណជា១២០នាក់ខាងលើនេះនៅខាងមុខស្នាក់ការក្រុមហ៊ុននេះ អស់រយៈពេលជាច្រើនម៉ោង គេមិនបានឃើញមានខាងតំណាងក្រុមហ៊ុនណាម្នាក់ចេញមកធ្វើការដោះស្រាយឡើយ។ រហូតដល់វេលាម៉ោង៣និង៣០នាទីរសៀលថ្ងៃទី១៩ តុលា ឆ្នាំ ២០២០ ដដែលនេះ ទើបមានការសម្របសម្រួលអំពីសំណាក់អាជ្ញាធរមូលដ្ឋានជាមួយនិងតំណាងភាគីខាងក្រុមហ៊ុន និងតំណាងភាគីខាងក្រុមកម្មករ ទៅធ្វើការជួបដោះស្រាយគ្នានៅសាលាខណ្ឌចំការមន តែនៅមិនទាន់បានដឹងថាមានដំណោះស្រាយយ៉ាងណានៅ ឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ