ខេត្តកំពង់ឆ្នាំង ៖ នៅរសៀលថ្ងៃទី១៣ វិច្ឆិកា ភ្នាក់ងារកោះសន្តិភាពបាននាំយកទឹកប្រាក់ចំនួន១០ម៉ឺនរៀលដែលជាអំណោយរបស់សប្បុរសជន ទៅផ្តល់ជូនអតីតគ្រូបង្រៀនដែលរងគ្រោះដាច់ពោះវៀនដល់លំនៅឋានរបស់គាត់ស្ថិតក្នុងភូមិអណ្តូងស្នាយ ឃុំអណ្តូងស្នាយ ស្រុករលាប្អៀរ ។ អំណោយជាថ្មីទៀតនេះគឺបានទទួលការឧបត្ថម្ភពីអ្នកនាងជា ដាលី ទឹកប្រាក់ចំនួន៥០.០០០រៀល និងសប្បុរសជនម្នាក់នៅផ្សារដេប៉ូចំនួន៥០.០០០រៀល ។
អតីតគ្រូបង្រៀនលោកប៉ុន ធឿន អាយុ៧២ឆ្នាំ បានថ្លែងអំណរគុណចំពោះសប្បុរសជនទាំងអស់ដែលបានយកចិត្តទុកដាក់អាណិតអាសូរដល់រូបគាត់តាមរយៈការអានសារព័ត៌មានកោះសន្តិភាពដែលបានចុះផ្សាយពីជីវិតអភ័ព្វត្រូវ បុគ្គលមួយរូបប្តឹងប្តល់គាត់យ៉ាងអយុត្តិធម៌រហូតអស់លុយកាក់យ៉ាងច្រើន ។ មិនត្រឹមតែប៉ុណ្ណោះ រូបគាត់វិះតែនឹងជាប់គុកច្រវាក់ទៀតផង ប៉ុន្តែអាជ្ញាធរមូលដ្ឋានក៏ដូចជាប្រជាពលរដ្ឋ ពិសេសសារព័ត៌មានកោះសន្តិភាពបានបកស្រាយនូវ ភាពអយុតិ្តធម៌នោះ ទើបរឿងក្តីរបស់គាត់បានធូរស្រាលតែបានអូសបន្លាយជិត៣ឆ្នាំទើបចប់ ។
ថ្មីៗនេះគ្រោះអកុសល គាត់បានរងគ្រោះដោយ ដងពូថៅបុកបណ្តាលឱ្យដាច់ពោះវៀន និងបានវះកាត់ក្នុងមន្ទីរពេទ្យ ហើយបានជាធូរស្រាល និងចេញពីមន្ទីរពេទ្យកាលពីថ្ងៃទី១១ វិច្ឆិកា ។ លោកសូមលើកដៃប្រណមដល់វត្ថុស័ក្តិសិទ្ធក្នុងលោក សូមជួយបីបាច់ថែរក្សាដល់សប្បុរសជនទាំងអស់ ជួបតែសេចក្តីសុខ និងពុទ្ធពរទាំង៤ប្រការកុំបីឃ្លៀងឃ្លាតឡើយ ៕
ចែករំលែកព័តមាននេះ