រាជធានីភ្នំពេញ ៖ ក្រុមហ៊ុន LIMHONG Fashion បាននាំយកអំណោយនិងថវិកាសរុបជាទឹកប្រាក់ចំនួន១.០០០ដុល្លារ ឧបត្ថម្ភដល់កុមារកំព្រារបស់អង្គការ មណ្ឌលកុមារដើម្បីសុភមង្គលនៅផ្តុំគំនរសម្រាមស្ទឹងមានជ័យ កាលពីពេលថ្មីៗកន្លងទៅនេះ ។
លោក លឹម ហុង ជាម្ចាស់ក្រុមហ៊ុន LIM HONG Fashion បានមានប្រសាសន៏ថា ក្រុមហ៊ុនរបស់លោក ពិតជាមានសេចក្តីសោមនស្សរីករាយ ក្នុងការចែករំលែកសេចក្តីស្រឡាញ់ និងស្នាមញញឹកដល់កុមារ របស់អង្គការ មណ្ឌលកុមារដើម្បីសុភមង្គល។ ក្នុងកម្មវិធីសប្បុរសធម៌ ក្រុមហ៊ុន LIM HONG Fashion និងក្រុមគ្រួសារបស់លោកផ្ទាល់ បានចែករំលែកអាហារដើម្បីអោយកុមារឆ្អែត, សម្ភារៈសិក្សាសៀវភៅប៊ិកខ្មៅដៃ ជ័រលុប, ទឹកលុប ចំនួន ២០០ កញ្ចប់, មី ១០កេស, ទឹកសុទ្ធ១០កេសដល់កុមារ និងទឹកប្រាក់ចំនួន៣០០ដុល្លារដល់អង្គការ។ ក្រៅពីនេះ លោកក៏បានជួយឧបត្ថម្ភដល់គ្រួសារក្រីក្រនៅគំនរសម្រាមចំនួន ១៧គ្រួសារ ជាមួយនឹងមី ៥កេស និងថវិកា ២០.០០០ រៀល ក្នុងមួយគ្រួសារៗ ។
លោកបន្តថាយើងសង្ឃឹម និងជឿជាក់ថាជំនួយរបស់យើងនឹងអាច រួមចំនែក មួយផ្នែកក្នុងការជំរុញអោយ កុមារមានអនាគតភ្លឺស្វាង ។ ហើយក្រុមហ៊ុនយើង នឹងបន្តការឩបត្ថម្ភដល់កុមារ និងប្រជាជនដែលត្រូវការជំនួយជាចំបាច់”។
លោក សុខ ថៃ ជាជំនួយការទូទៅរបស់អង្គការមណ្ឌលកុមារដើម្បីសុភមង្គលបានអោយដឹងថា អង្គការរបស់លោកពិតជាមានសេចក្តីសប្បាយរីករាយជាមួយ នឹងទង្វើសប្បុរសធម៌របស់ក្រុមហ៊ុន LIM HONG Fashion ដែលបានជួយឧបត្ថម្ភដល់កុមារ និងកុមារកំព្រានៅទីនេះ។ លោកក៏សួមជូនពរឲ្យក្រុមហ៊ុន LIM HONG Fashion និងក្រុមគ្រួសារលោកលឹមហុងអោយជួបប្រទះតែនឹងសេចក្តីសុខនិងសេចក្តីចំរើន និង សម្បូរអតិថិជិនគាំទ្រ។ ហើយក៏សូមអំពានាវដល់បណ្តាសប្បុរសជន សូមជួយឩបត្ថម្ភដល់កុមារអង្គការផង ៕
ចែករំលែកព័តមាននេះ