ការយល់ច្រឡំគ្នាអាចកើតមានឡើងយ៉ាងងាយព្រោះតែការមិនយកចិត្តទុកដាក់លើពាក្យសម្តីមួយចំនួនដែលអាចបង្កការប៉ះពាល់ដល់អ្នកដទៃបាន។ មនុស្សដែលពូកែផ្នែកទំនាក់ទំនងជាមនុស្សដែលមានសមត្ថភាពក្នុងការយល់ពីអារម្មណ៍របស់អ្នកដទៃ ដែលអនុញ្ញាតឲ្យពួកគេជៀសវាងការប្រើប្រាស់ពាក្យសម្តីដែលបង្កការប៉ះពាល់ផងដែរ។
សម្រាប់មនុស្សដែលមិនមានសមត្ថភាពនេះ វាអាចមកពីពួកគេផ្តោតស្មារតីខ្លាំងពេកលើអ្វីដែលពួកគេនឹងនិយាយបន្ទាប់ និងឥទ្ធិពលនៃពាក្យសម្តីរបស់អ្នកដទៃលើខ្លួនឯង ដែលធ្វើឲ្យខ្លួនមើលរំលងអ្នកដទៃ។ ដើម្បីជៀសវាងការយល់ច្រឡំដែលប៉ះពាល់ដល់ឱកាសជោគជ័យរបស់អ្នក អ្នកគួរតែជៀសវាងឃ្លាខាងក្រោមនេះពេលដែលសន្ទនាជាមួយអ្នកដទៃ៖
១. អ្នកដូចជាហត់នឿយណាស់
មនុស្សដែលហត់នឿយបង្ហាញភាពហត់នឿយរបស់ពួកគេនៅរូបរាងខាងក្រៅច្បាស់ណាស់។ ប៉ុន្តែពួកគេមិនចង់បង្ហាញថាខ្លួនហត់នឿយទេ។ ប្រសិនបើអ្នកចង់សួរសុខទុក្ខ និងព្រួយបារម្ភអ្នកទាំងនេះ អ្នកអាចសួរពួកគេថា តើពួកគេសុខសប្បាយឬទេ វិញ។ ការធ្វើដូច្នេះអនុញ្ញាតឲ្យពួកគេមើលឃើញទឹកចិត្តរបស់អ្នកបានច្រើនជាង។
២. «អ្នកតែងតែ…»
មិនមាននរណាដែលតែងតែធ្វើ ឬមិនធ្វើអ្វីមួយទេ។ ហើយមិនមាននរណាដែលចង់ឲ្យអ្នកដទៃប្រាប់ពួកគេថាពួកគេជាមនុស្សដូច្នេះដែរ។ វាអាចធ្វើឲ្យអ្នកដទៃគិតថាអ្នកវាយតម្លៃលើពួកគេច្រើន។ ផ្ទុយមកវិញ អ្នកអាចជំនួសពាក្យតែងតែជាមួយនឹងពាក្យឧស្សាហ៍វិញ។
៣. «ដូចដែលខ្ញុំធ្លាប់បាននិយាយ…»
មនុស្សតែងតែភ្លេចភ្លាំងម្តងម្កាល។ ប្រយោគខាងលើអាចធ្វើឲ្យអ្នកស្តាប់គិតថាអ្នកខឹងព្រោះអ្នកត្រូវនិយាយឡើងវិញ។ លើសពីនេះទៅទៀត វាអាចបង្ហាញថាអ្នកគិតថាខ្លួនឯងល្អជាងអ្នកដទៃថែមទៀតផង។ ប្រសិនបើមនុស្សណាម្នាក់សួរពីអ្វីដែលអ្នកធ្លាប់បាននិយាយម្តងហើយ អ្នកអាចព្យាយាមបកស្រាយឲ្យកាន់តែច្បាស់ និងស្រួលយល់ជាងមុនវិញ។
៤. «តាមចិត្ត»
ទោះជាអ្នកប្រើពាក្យនេះដើម្បីបង្ហាញថាអ្នកមិនខ្វល់ច្រើនពិតមែនក្តី វាអាចប៉ះពាល់ដល់អ្នកសួរ ព្រោះពួកគេអាចនឹងចង់ស្តាប់លឺទស្សនៈរបស់អ្នកទាក់ទិននឹងប្រធានបទ ឬបញ្ហាណាមួយជាដើម។ ផ្ទុយមកវិញ អ្នកអាចបកស្រាយថា អ្នកមិនមានបញ្ហានឹងជម្រើសណាមួយទេ ប៉ុន្តែអ្វីដែលពួកគេអាចគិតបន្ថែមរួមមានប៉ុន្មានចំណុចជាដើម។
ក្នុងការសន្ទនាប្រចាំថ្ងៃ អ្នកត្រូវតែយកចិត្តទុកដាក់លើចំណុចតូចៗទាំងនេះព្រោះវាអាចជះឥទ្ធិពលយ៉ាងខ្លាំង។ អ្នកអាចសាកល្បងជៀសវាងប្រើប្រយោគខាងលើបាន និងមើលថាវាមានឥទ្ធិពលល្អយ៉ាងណាលើទំនាក់ទំនងរបស់អ្នកជាមួយអ្នកដទៃ ៕
ចែករំលែកព័តមាននេះ