ការប្រើប្រាស់រថយន្តជាមធ្យោបាយធ្វើដំណើរផ្លូវឆ្ងាយតែឯងដោយពុំមានអ្នករួមដំណើរជួយសម្រួលកិច្ចការខ្លះអាចរាប់បញ្ចូលជាហានិភ័យមួយសម្រាប់លោកអ្នក ព្រោះថាមនុស្សតែម្នាក់កាន់ចង្កូត
ការប្រើប្រាស់រថយន្តជាមធ្យោបាយធ្វើដំណើរផ្លូវឆ្ងាយតែឯងដោយពុំមានអ្នករួមដំណើរជួយសម្រួលកិច្ចការខ្លះអាចរាប់បញ្ចូលជាហានិភ័យមួយសម្រាប់លោកអ្នក ព្រោះថាមនុស្សតែម្នាក់កាន់ចង្កូតរថយន្តនៅលើផ្លូវដ៏វែងឆ្ងាយមិនប្រាកដថា រូបគាត់ផ្ទាល់មានស្មារតីខ្ពស់គ្រប់ពេលវេលានោះឡើយ ខណៈកំពុងបញ្ជារថយន្តឱ្យបំលាស់ទី ។ ដើម្បីរួមចំណែកបទពិសោធខ្លះសូមលើកយកនូវលក្ខខណ្ឌមួយចំនួនមកបង្ហាញ
ដូចតទៅ ៖
១-ពេលចូលដល់ក្នុងរថយន្តត្រូវដឹងថា អ្នកជាម្ចាស់ការលើខ្លួនឯងហើយត្រូវសម្ដែងអារម្មណ៍ល្អអំពីការបើកបរទាំងមូល ។
២-ត្រូវប្រាកដថា អ្នកបានត្រៀមបទចម្រៀងពីរោះៗក៏ដូចជាប្រព័ន្ធគ្រឿងបំពងសំឡេងបានស្រេចបាច់ហើយក្នុងរថយន្តមុនចេញដំណើរ ។
៣-សួរខ្លួនឯងថា មានត្រៀមភេសជ្ជៈឬអាហារសម្រន់សម្រាប់ទំពាញាំុដើម្បីរំដោះអារម្មណ៍ងងុយដេកពេលបើកបរហើយឬនៅ ? ចំណែកអាហារទាំងនោះចៀសវាងរសជាតិប្រៃ ឯផ្លែឈើគឺរបស់ដែលអ្នកចូលចិត្តហើយមិនគ្រាន់តែមានរស់ជាតិប៉ុណ្ណោះទេ ថែមទាំងផ្ដល់កម្លាំងថាមពលទៀតផងទើបជាការប្រសើរ ។
៤-ត្រូវច្បាស់ក្នុងចិត្តថា អ្នកបានពិនិត្យមើលប្រេងម៉ាសីុន, ធុងទឹក និងចំណុចសំខាន់ៗដទៃទៀតបានត្រឹមត្រូវហើយ ។ ក្នុងនោះក៏រាប់បញ្ចូលគ្រឿងសោផ្សេងៗសម្រាប់ដោះដូរបន្ទាន់ដោយខ្លួនឯងក៏មិនត្រូវធ្វេសប្រហែសបានដែរ ។
៥-បើកបរក្នុងកម្រិតសមគួរមិនលឿនពេកហើយក៏មិនយឺតពេកដែរ ។
៦-បើកបរយ៉ាងរលូនទៅតាមបទចម្រៀងដែលចាក់តាមគ្រឿងបំពងសំឡេង ។ ពីព្រោះក្នុងអំឡុងពេលនៃការធ្វើដំណើរផ្លូវឆ្ងាយអ្វីដែលអ្នកគួរតែចាប់យកជាប្រធានបទនោះគឺត្រចៀកស្ដាប់ដូរតន្ត្រីដើម្បីដាស់អារម្មណ៍មួយរំពេចឱ្យភ្លឺស្វាងពីភាពវិលវល់រកកល់ងងុយដេក រីឯភ្នែកសម្លឹងផ្លូវ ។
៧-កុំព្យាយាមញាំុច្រើនពេកពេលបើកបរ ។ ព្រោះអារម្មណ៍ឆ្អែតស្កប់ស្កល់វាអាចជាកត្ដាឈានទៅរកការលង់លក់ពេលបើករថយន្តជាក់ជាមិនខាន ។
៨-ជ្រើសរើសផ្លូវណាមួយដែលមានអ្នកធ្វើដំណើរទៅមកច្រើនហើយមិនត្រូវព្យាយាមបើកផ្លូវថ្មីឬលំបាកដែលនាំរឿងដល់រថយន្តអ្នកឡើយ ។
៩-ប្រសិនបើអាកាសធាតុខាងក្រៅក្ដៅ/ត្រជាក់ចូរបើកបង្អួចម្ដងមួួយកាល ព្រោះខ្យល់បរិសុទ្ធអាចដាស់ស្មារតីអ្នកហើយក៏ធ្វើឱ្យអ្នកប្រុងប្រយ័ត្នទៀតផង ។
១០-សូមរីករាយជាមួយនឹងការធ្វើដំណើរប្រកបដោយផាសុកភាព និងសុវត្ថិភាពនោះហើយត្រូវចងចាំថា ក្នុងចំណោមមធ្យោបាយដ៏ប្រសើរបំផុតក្នុងការបើកបរផ្លូវឆ្ងាយគឺការឈប់សម្រាក ។ ក្រោយពេលអនុវត្តលោកអ្នកនឹងទទួលបានអារម្មណ៍ស្រស់ស្រាយប្រសើរជាងមុននាំដំណើរអ្នកឱ្យដល់គោលដៅដោយសុវត្ថិភាព ៕
ចែករំលែកព័តមាននេះ