ខេត្តកំពត ៖ ដូនចាស់ម្នាក់ត្រូវបានស្ត្រីដែលធ្វើដំណើរតាមរថយន្តជាមួយគ្នាឆបោកអស់ខ្សែ.កប្លាទីនទម្ងន់មួយជីកន្លះហើយនាំគាត់មកធ្វើនុយបោកប្រាស់ដល់អ្នកលក់កំណាត់ក្រមា និងលក់ម្ហូបនៅក្នុងផ្សារកំពតថែមទៀត ទីបំផុតដូនចាស់នោះត្រូវបានអ្នកលក់ទាំងនោះប្តឹងសមត្ថកិច្ចប៉ូលិសឱ្យចាប់ខ្លួន ដោយចោទប្រកាន់ពីករណីឆបោក ។ ករណីខាងលើនេះបានកើតឡើងនៅវេលាម៉ោង៥ល្ងាចថ្ងៃទី២២ មីនា ២០១១ ស្ថិតនៅក្នុងផ្សារទីរួមខេត្តកំពត ។
យោងតាមប្រភពព័ត៌មានពីដូនចាស់ដែលជាប់ចោទបានឱ្យដឹងថា រូបគាត់ឈ្មោះនួន ប៉ាត់ អាយុ៧៥ឆ្នាំ មានទីលំនៅភូមិពស់ពង ឃុំនារាយណ៍ ស្រុកឈូក គាត់បានជិះរថយន្តទួរីស (រថយន្តឈ្មួល)ត្រឡប់មកពីលេងកូននៅជិតវត្តកាយរោង ក្នុងស្រុកបាទី ខេត្តតាកែវ មកលំនៅឋានវិញ លុះមកដល់ផ្លូវបំបែកអង្គតាសោម រថយន្តឈប់ដាក់អ្នកដំណើររូបគាត់ក៏បានឃើញស្ត្រីម្នាក់ដែលមានរូបឆោមស្អាតបាតឡើងជិះរថយន្តធ្វើដំណើរជាមួយគ្នា។ លុះមកដល់ស្រុកត្រាំកក់ (ផ្សារត្រាំកក់) ស្ត្រីនោះបានសួរគាត់ថា លោកយាយទៅចុះនៅឯណា ? ពេលនោះគាត់ប្រាប់ទៅស្រីនោះវិញថា គាត់ទៅចុះនៅវត្តនារាយណ៍ ។
ស្ត្រីរូបនោះក៏បានសួរនាំគាត់ពីប្រវត្តិចៅអធិការវត្តនិងអាចារ្យគណៈកម្មការវត្តនារាយណ៍នោះផងដែរ ហើយស្ត្រីនោះក៏បានប្រាប់ពីប្រវត្តិរបស់ខ្លួនគេដល់រូបគាត់ថា ខ្លួនជាគ្រូបង្រៀនសិស្សនៅសាលាឯកជនមួយនៅក្រុងតាខ្មៅ ហើយផ្ទះគេមានបើកហាងធ្វើនំប៉័ងនៅក្រុងតាខ្មៅ និងឪពុកម្តាយរបស់នាងរស់នៅសហរដ្ឋអាមេរិក ឥឡូវនេះនាងគិតមកទំនាក់ទំនងចង់ធ្វើបុណ្យបច្ច័យបួន ព្រមទាំងកសាងចេតិយមួយនៅក្នុងវត្តនារាយណ៍នេះហើយក៏សុំឱ្យរូបលោកយាយនាំស្ត្រីនោះទៅជួបជាមួយព្រះចៅអធិការវត្តព្រមទាំងអាចារ្យនិងគណៈកម្មការវត្តដើម្បីនិយាយពីបញ្ហាធ្វើបុណ្យក្នុងយប់នេះតែម្តង ។
ក្រោយពីជួបព្រះចៅអធិការនិងអាចារ្យគណៈកម្មការវត្តរួច អ្នកទាំងអស់បានឯកភាពគ្នាហើយបានប្រកូកប្រកាសប្រាប់ដល់តាជីដូនជីថា នឹងរៀបចំកន្លែងធ្វើបុណ្យយប់នេះទៅ ។ ពេលបន្ទាប់មក ស្ត្រីរូបនោះបានចាត់ចែងឱ្យកូនចៅគាត់ទិញដូងទុំមួយឡូត៍ សម្រាប់ធ្វើទឹកការីនំប៉័ងពីព្រោះល្ងាចបន្តិចរថយន្តឪពុកម្តាយនាងនឹងដឹកនំប័ុងមកចូលរួមពិធីបុណ្យព្រមទាំងប្រាប់ឱ្យកូនចៅរបស់គាត់ដើរអញ្ជើញប្រជាពលរដ្ឋដែលក្រីក្រឱ្យបានជាង១០គ្រួសារដើម្បីទទួលអំណោយមនុស្សធម៌ពីក្រុមគ្រួសាររបស់ខ្លួនផងដែរ ។ លោកយាយបន្តទៀតថា ពេលហូបបាយនៅផ្ទះគាត់ហើយនឹងងូតទឹករួចត្រឹមត្រូវនៅវេលាម៉ោង១រសៀលស្ត្រីរូបនោះបានបបួលរូបគាត់ទៅទិញ ម្ហូបនិងអីវ៉ាន់ផ្សេងៗសម្រាប់ធ្វើបុណ្យបច្ច័យបួននេះនៅផ្សារកំពត ។ ពេលនោះរូបគាត់បម្រុងនិងជួលរថយន្តគេជិះទៅដឹកសំភារធ្វើបុណ្យទៅហើយ តែស្ត្រីរូបនោះប្រាប់ថា មិនបាច់ទេ បើកូនចៅមានម៉ូតូឱ្យពួកគេជូនទៅក៏បានដែរចាំទិញអីវ៉ាន់បានហើយចាំជួលរថយន្តគេដឹកក៏បានដែរ។ ពេលនោះដូនចាស់ហៅឱ្យចៅប្រុសរបស់គាត់ដឹករូបគាត់និងស្ត្រីនោះមកផ្សារកំពតដើម្បីទិញសំភារផ្សេងៗធ្វើបុណ្យ។ លុះមកដល់ផ្សារកំពតប្រហែលជាម៉ោងពីររសៀលនាថ្ងៃដដែលនោះមុនចូលផ្សារស្ត្រីរូបនេះបានប្រាប់រូបគាត់ថា ដោះខ្សែ.កដាក់ក្នុងកាបូបលុយគេមកពីព្រោះក្នុងផ្សារមនុស្សច្រើនណាស់ ខ្លាចគេឆក់ ។ មុនដំបូងគាត់ពុំព្រមដោះទេគាត់ប្រាប់ស្ត្រីនោះវិញថា គាត់យកក្រមាមករុំកពីក្រៅខ្សែ.កក៏បានដែរ ពេលនោះដោយឃើញស្ត្រីរូបនេះដោះខ្សែដៃដែលខ្លួនពាក់មកដាក់ក្នុងកាបូបលុយ រូបគាត់ក៏យកប្រគល់ឱ្យស្ត្រីរូបនោះយកខ្សែ.កទុកក្នុងកាបូបដែរ រួចហើយស្ត្រីរូបនោះក៏យកកាបូបនោះដាក់ក្នុងវ៉ាលីខោអាវរួចឱ្យគាត់ជាអ្នកស្ពាយ ។ រីឯចៅប្រុសដែលជូនមកជាមួយឱ្យចាំនៅក្រៅផ្សារជាមួយម៉ូតូ ។
ក្រោយមកស្ត្រីរូបនោះក៏បាននាំដូនចាស់ចូលក្នុងផ្សារ ។ ដោយនាំចូលទៅទិញក្រមានិងកំណាត់ស បានឱ្យអ្នកលក់រៀបចំត្រូវចំនួន១៥០ក្រមា និងកំណាត់សចំនួន១៥ដុំ រួចហើយ ស្ត្រីនោះបានប្រាប់ដូនចាស់ថា ឱ្យទៅហៅចៅមករាប់ក្រមានិងកំណាត់សវេចខ្ចប់ឱ្យស្អាតយើងទៅទិញបន្លែនិងម្ហូបទៀត ។ ពេលចៅគាត់មកដល់កន្លែងក្រមាស្ត្រីនោះបាននាំគាត់ទៅទិញបានបន្លែត្រឡាចខ្លះរួចក៏ចូលផ្សារត្រីពេលនោះតថ្លៃមឹក ។ ការតថ្លៃទិញមឹកនេះដូនចាស់ពុំដឹងថា មួយគីឡូតម្លៃប៉ុន្មានទេ ពេលនោះស្ត្រីរូបនោះ ឱ្យប្រាក់មកគាត់មួយម៉ឺនរៀលឱ្យទិញម្លូរនិងស្លា ។ ក្រោយពីគាត់ទិញស្លាម្លូរបានហើយគាត់ត្រឡប់មកជួបស្ត្រីនោះកន្លែងទិញមឹកវិញឃើញអ្នកលក់មឹកវេចខ្ចប់មឹកដាក់ក្នុងកេសក្លាស្សេយ៉ាងស្អាត។ ស្ត្រីរូបនោះ ពេលឃើញដូនចាស់មកដល់ក៏យកវ៉ាលីស្ពាយពីគាត់រួចឱ្យយាយនៅចាំមួយភ្លែតដោយស្ត្រីនោះទៅហៅអ្នកលីអីវ៉ាន់ឱ្យមកជួយយកទៅក្រៅព្រមទាំងទៅទិញទឹកផ្លែឈើឱ្យយាយពិសាផង។ ការរង់ចាំស្ត្រីរូបនោះគឺចាំបាត់យូរពេកយាយក៏មានចម្ងល់ជាមួយអ្នកលក់មឹកនិងអ្នកទិញ រីឯអ្នកលក់មឹកក៏មានចម្ងល់ក៏សួរគ្នាពីរឿងស្គាល់ស្ត្រីរូបនេះច្បាស់ទេទើបដឹងថា ទាំងគាត់ក៏មិនស្គាល់ទាំងអ្នកលក់មឹកក៏មិនស្គាល់ទើបម្ចាស់លក់មឹកប្តឹងសមត្ថកិច្ចឱ្យឃាត់ខ្លួនដូនចាស់មកអធិការដ្ឋានក្រុងដើម្បីសួរនាំតែម្តង ។
ប៉ូលិសនិយាយថា ក្នុងរឿងនេះពុំទាន់សន្និដ្ឋានថា ដូនចាស់ចាញ់បោកគេឬសមគំនិតជាមួយស្ត្រីរូបនេះទេ រង់ចាំការសើបអង្កេតពីសមត្ថកិច្ចបន្ត ៕
ចែករំលែកព័តមាននេះ