ខេត្តព្រៃវែង ៖ កំលាំងកងរាជអាវុធហត្ថខេត្តព្រៃវែង បានបើកប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀនទ្រង់ទ្រាយធំ ដោយប្រើរយៈពេលតែ២ថ្ងៃប៉ុណ្ណោះ ចាប់ឃាត់ខ្លួនជនសង្ស័យពាក់ពន្ធ័និងគ្រឿងញៀន បានរហូតដល់ទៅ៩នាក់ និងដកហូតបានវត្ថុតាងថ្នាំញៀនចំនួន១២កញ្ចប់ នៅឃុំព្រែកខ្សាយ(ខ)…
ខេត្តព្រៃវែង ៖ កំលាំងកងរាជអាវុធហត្ថខេត្តព្រៃវែង បានបើកប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀនទ្រង់ទ្រាយធំ ដោយប្រើរយៈពេលតែ២ថ្ងៃប៉ុណ្ណោះ ចាប់ឃាត់ខ្លួនជនសង្ស័យពាក់ពន្ធ័និងគ្រឿងញៀន បានរហូតដល់ទៅ៩នាក់ និងដកហូតបានវត្ថុតាងថ្នាំញៀនចំនួន១២កញ្ចប់ នៅឃុំព្រែកខ្សាយ(ខ) ស្រុកពាមរក៌។ ប៉ុន្តែអ្វីដែលធ្វើអោយគេគ្រប់គ្នាមានការងឿងឆ្ងល់នោះ គឺជនសង្ស័យចំនួន៣នាក់ បែរជាត្រូវបានតុលាការខេត្តព្រៃវែងដោះលែងមកវិញ ក្រោយពីកំលាំងកងរាជអាវុធហត្ថខេត្តបញ្ជូនជនសង្ស័យដល់តុលាការភ្លាម នៅព្រឹកថ្ងៃទី១៨ តុលា ដោយលោក ចាន់ វណ្ណៈ ព្រះរាជអាជ្ញារងតំណាងអយ្យការ បានបញ្ជាក់ប្រាប់ក្រុមអ្នកសារពត៌មាននៅរសៀលថ្ងៃទី១៨តុលាថា ការដោះលែងនេះ គឺស្ថិតនៅក្រោមហេតុផល ដាក់អោយនៅក្រោមការត្រួតពិនិត្យរបស់តុលាការ តើហេតុអ្វីទៅ…?
ករណីបង្ក្រាបគ្រឿងញៀននៅថ្ងៃទី១ គឺបានធ្វើឡើងកាលពីថ្ងៃទី១៦ តុលា វេលាម៉ោង១១និង៣០នាទីព្រឹក កំលាំងកងរាជអាវុធហត្ថខេត្តព្រៃវែងចំនួន៨នាក់ ដែលដឹកនាំដោយលោកវរៈសេនីយទោ ផាត់ សុជោត ប្រធានមន្ទីរយុត្តិធម៌ បានចុះទៅបង្ក្រាបនៅចំណុចភូមិ០៦ ឃុំព្រែកខ្សាយ(ខ) ស្រុកពាមរក៏ ដោយឃាត់ខ្លួនជនសង្ស័យបានចំនួន៥នាក់ ក្នុងនោះទី១ឈ្មោះ ជុង តាំងអ៊ុក ភេទប្រុស អាយុ២១ឆ្នាំ ទី២ឈ្មោះ ង្វៀង វាំងហេវ ភេទប្រុស អាយុ២១ឆ្នាំ ទី៣ឈ្មោះ អ៊ាង ហុង ភេទប្រុស អាយុ៤១ឆ្នាំ ទី៤ឈ្មោះ អ៊ាង ហុកកាង ភេទប្រុស អាយុ៣៣ឆ្នាំ និងទី៥ឈ្មោះ អ៊ាង ហុកលី ភេទប្រុស អាយុ២៨ឆ្នាំ ព្រមទាំងដកហូតបានថ្នាំញៀនប្រភេទម្សៅក្រាមពណ៌សចំនួន៥កញ្ចប់ ឧបករណ៏ជក់ថ្នាំញៀន០១សម្រាប់ និងឧបករណ៏ចែកចាយថ្នាំមួយចំនួន។
ប៉ុន្តែជនសង្ស័យទាំង៥នាក់នេះ ក្រោយពីត្រូវកំលាំងកងរាជអាវុធហត្ថខេត្តចាប់ខ្លួនបាន និងបញ្ជូនទៅដល់សាលាដំបូងខេត្តព្រៃវែង មិនដល់១ថ្ងៃផង គឺនៅព្រឹកថ្ងៃទី១៨ តុលា ស្រាប់តែជនសង្ស័យចំនួន៣នាក់ ក្នុងចំណោម៥នាក់ ដែលជាបងប្អូនបង្កើតនិងគ្នា ត្រូវបានតុលាការដោះលែងមកវិញ ក្រោមហេតុផលដាក់អោយនៅក្រោមការត្រួតពិនិត្យរបស់តុលការ ក្នុងនោះទី១-មានឈ្មោះ អ៊ាង ហុង ទី២ អ៊ាង ហុកកាង និងទី៣ អ៊ាង ហុកលី។
ទោះជាយ៉ាងណាក៏ដោយ មកដល់វេលាម៉ោង១០និង៣០នាទីព្រឹក ថ្ងៃទី១៨ តុលា កំលាំងកងរាជអាវុធហត្ថខេត្តព្រៃវែង បានបើកប្រតិបត្តិការលើកទី២ម្តងទៀត នៅចំណុចភូមិ០២ ឃុំព្រែកខ្សាយ (ខ) ស្រុកពាមរក៏ ដដែល ដោយបានចាប់ឃាត់ខ្លួនជនសង្ស័យបានចំនួន០៤នាក់ទៀត នៅកន្លែងផ្សេងៗគ្នាជាបន្តបន្ទាប់ ដែលជនសង្ស័យទី១ឈ្មោះ ហាំ គា ភេទប្រុស អាយុ២១ឆ្នាំ ទី២ឈ្មោះ ឌឹម ភឿន ភេទប្រុស អាយុ២០ឆ្នាំ ទី៣ឈ្មោះ វ៉ន កាណាន់ ភេទប្រុស អាយុ២៨ឆ្នាំ និងទី៤ឈ្មោះ សាន់ ធូរិន ភេទប្រុស អាយុ៣៥ឆ្នាំ។
ក្នុងប្រតិបត្តិការលើកនេះ កំលាំងអាវុធហត្ថខេត្តដកហូតវត្ថុតាងថ្នាំញៀន ប្រភេទម្សៅក្រាមពណ៌សបានចំនួន៧កញ្ចប់ រួមជាមួយឧបករណ៍ជក់ថ្នាំ០១សម្រាប់ និងថង់សម្រាប់ចែកថ្នាំមួយចំនួន។
នៅព្រឹកថ្ងៃទី២០តុលានេះ កំលាំងកងរាជអាវុធហត្ថខេត្តព្រៃវែងបានអោយដឹងថា ជនសង្ស័យទាំង៤នាក់រួមជាមួយវត្ថុតាង កំពុងត្រូវបានឃុំខ្លួន នៅបញ្ជាការដ្ឋានកងរាជអាវុធហត្ថខេត្ត ដោយកំលាំងអាវុធហត្ថខេត្ត កំពុងកសាងសំណុំរឿង ដើម្បីត្រៀមបញ្ជូនជនសង្ស័យទៅជូនលោកតុលាការ ចាត់ការបន្តទៅតាមនិតិវិធី ប៉ុន្តែដោយគេនៅចាំថា ក្រុមជនសង្ស័យក្នុងករណីទី១ គ្រាន់តែបញ្ជូនទៅដល់តុលាការភ្លាម ស្រាប់តែត្រូវបានដោះលែងវិញភ្លាមនោះ ទើបធ្វើអោយគេមានសំណួរបែបកំប្លែងមួយថា តើករណីក្រោយនេះ អាចនឹងមានជនសង្ស័យត្រូវបានដោះលែងទៀតទេ…..?
ចែករំលែកព័តមាននេះ