ក្រុមប្រឹក្សាជាន់ខ្ពស់នៃកងកម្លាំងប្រដាប់អាវុធអេហ្ស៊ីបរាយការណ៍ថា អតីតប្រធានាធិបតីអេហ្ស៊ីប ដែលត្រូវទម្លាក់ចេញពីតំណែងលោកហូស្នី មូបារ៉ាក់ និងសមាជិកគ្រួសាររបស់លោកត្រូវឃុំខ្លួនក្នុងផ្ទះ ហើយបានបដិសេធរបាយការណ៍នានាដែលថា លោកមូបារ៉ាក់ បានចាកចេញពីប្រទេសទៅរស់នៅភៀសខ្លួនក្នុងប្រទេសអារ៉ាប៊ី សាអូឌីត ។ ប្រមុខយោធាអេហ្ស៊ីបនិយាយក្នុងសេចក្តីថ្លែងការណ៍មួយថា វាមិនពិតចំពោះរបាយការណ៍ដែលថា អតីតប្រធានាធិបតី លោកហូស្នី មូបារ៉ាក់ បានចាកចេញពីប្រទេសអេហ្ស៊ីប ទៅកាន់ទីក្រុង Tabuk ប្រទេសអារ៉ាប៊ី សាអូឌីតនោះ។
ក្រុមប្រឹក្សាជាន់ខ្ពស់នៃកងកម្លាំងប្រដាប់អាវុធនោះបានគ្រប់គ្រងប្រទេសអេហ្ស៊ីបចាប់តាំងពីលោកហូស្នី មូបារ៉ាក់ ត្រូវបានទម្លាក់ពីតំណែង កាលពីថ្ងៃទី១១ កុម្ភៈ កន្លងមក ក្រោយពីមានការធ្វើបាតុកម្មរយៈពេល១៨ថ្ងៃ ប្រឆាំងការកាន់អំណាចរបស់លោក ។ កាលពីថ្ងៃទី៣ មីនា កន្លងមក អគ្គរដ្ឋអាជ្ញាអេហ្ស៊ីបបានបដិសេធរបាយការណ៍ព័ត៌មាននានាដែលថា លោកមូបារ៉ាក់ កំពុងរស់នៅនីរទេសក្នុងប្រទេសអារ៉ាប៊ី សាអូឌីត ហើយបានអះអាងថា លោកមូបារ៉ាក់ និងគ្រួសាររបស់លោកកំពុងស្នាក់នៅនិវេសនដ្ឋានក្នុងតំបន់រមណីយដ្ឋានសមុទ្រក្រហម Sharm el-Sheikh ។ ក្រុមប្រឹក្សានេះប្រកាសឱ្យដឹងថា នឹងរៀបចំការបោះឆ្នោតសភានៅខែវិច្ឆិកាខាងមុខនេះ ហើយច្បាប់គ្រាអាសន្ននឹងត្រូវលុបចោលមុនការបោះឆ្នោតនេះ ៕
ចែករំលែកព័តមាននេះ