រាជធានីភ្នំពេញ ៖ បុរសម្នាក់ត្រូវនារីវ័យក្មេងម្នាក់ប្តឹងនគរបាលប៉ុស្តិ៍ ទួលសង្កែទី១ អោយឃាត់ខ្លួន ដោយចោទប្រកាន់ថា បានបបោសអង្អែល និងចាប់ស្រាតខោនាងប៉ុនប៉ងចាប់បង្ខំសេពសន្ថវៈចំនួន២ដងមិនសម្រេច ខណៈដែលពួកគេទៅដេកផ្ទះជួលរបស់មិត្តភក្តិរួមគ្នា ចំនួន៤នាក់។…
រាជធានីភ្នំពេញ ៖ បុរសម្នាក់ត្រូវនារីវ័យក្មេងម្នាក់ប្តឹងនគរបាលប៉ុស្តិ៍ ទួលសង្កែទី១ អោយឃាត់ខ្លួន ដោយចោទប្រកាន់ថា បានបបោសអង្អែល និងចាប់ស្រាតខោនាងប៉ុនប៉ងចាប់បង្ខំសេពសន្ថវៈចំនួន២ដងមិនសម្រេច ខណៈដែលពួកគេទៅដេកផ្ទះជួលរបស់មិត្តភក្តិរួមគ្នា ចំនួន៤នាក់។
ការឃាត់ខ្លួនជនសង្ស័យម្នាក់ខាងលើនេះបានធ្វើឡើងកាលពីវេលាម៉ោងប្រមាណ៩និង១៥នាទីព្រឹកថ្ងៃទី២០ ខែតុលា ឆ្នាំ២០២០ នៅចំណុចហាងកាហ្វេមួយកន្លែងតាមបណ្ដោយផ្លូវបេតុង ក្នុងខណ្ឌឬស្សីកែវ រាជធានីភ្នំពេញ។
បុរសជាប់ចោទឈ្មោះឈុន ភេទប្រុស អាយុ២៣ឆ្នាំ មានទីលំនៅឃុំអរិយក្សត្រ ស្រុកខ្សាច់កណ្តាល ខេត្តកណ្ដាល ។ ចំណែកឯនារីរងគ្រោះដែលដាក់ពាក្យប្តឹង មានអាយុ១៨ឆ្នាំ។
តាមនគរបាលបានអោយដឹងថា បុរសរូបនោះត្រូវបានសមត្ថកិច្ចឃាត់ខ្លួនបន្ទាប់ ពីនារីម្នាក់បានដាក់ពាក្យបណ្តឹង ដោយចោទ ប្រកាន់ថា បានប៉ុនប៉ុងចាប់បង្ខំសេពសន្ថវៈនាងចំនួន២ដងមិនបានសម្រេច ។
តាមប្រភពព័ត៌មានដដែលអោយដឹងទៀតថា នៅវេលាយប់ថ្ងៃទី១៩ ខែតុលា ឆ្នាំ ២០២០នារីរងគ្រោះនិងបុរសជនសង្ស័យរូបនោះ ព្រមទាំងមិត្តភក្តិបាននាំគ្នាទៅដេកផ្ទះមិត្តភក្តិមួយកន្លែងនៅក្នុងខណ្ឌឬស្សីកែវ ដោយមានគ្នា៦នាក់ ហើយ២នាក់ដេកនៅបន្ទប់ឡៅតឿ និង៤នាក់ទៀត (ស្រី៣នាក់ប្រុស១) ដេកនៅផ្ទះខាងក្រោម ។
តាមព័ត៌មានអោយដឹងទៀតថា នៅពេលនារីរងគ្រោះរូបនោះ រួមទាំងមិត្តភក្កិកំពុងតែដេកលង់លក់ នៅវេលាម៉ោងប្រមាណ៥ទៀបភ្លឺ ស្រាប់តែបុរសជាជនសង្ស័យរូបនោះ ប្រះខ្លួនទៅក្បែរនាង ដេកនៅកៀនជញ្ជាំង ហើយបបោសអង្អែលនិងចាប់ស្រាតខោនាងប៉ុនប៉ុងចាប់បង្ខំសេពសន្ថវៈ តែមិនបានសម្រេច ដោយនាងដឹងខ្លួន និងងើបទៅដេកកណ្តាលមិត្តភក្តិ ។ លុះក្រោយមក ស្រាប់តែបុរសជាជនសង្ស័យរូបនោះបានព្យាយាមធ្វើបែបនេះម្តងទៀត តែនាងបានរត់ឡើងទៅប្រាប់មិត្តភក្តិស្រី ដែលកំពុងតែដេកនៅបន្ទប់ឡៅតឿ ហើយបុរសជនសង្ស័យរូបនោះក៍បានគេចខ្លួនបាត់។
តាមប្រភពព័ត៌មានដដែលបានអោយដឹងទៀតថា នៅវេលាព្រឹកនោះដែរ នារីរងគ្រោះរូបនោះ ព្រមទាំងមិត្តភក្តិក៏បានទៅដាក់ពាក្យបណ្តឹង ហើយឈានទៅឃាត់ខ្លួនបានតែម្តង ។ ទោះបីជាយ៉ាងណា ទាក់ទិននឹងករណីខាងលើនេះ សមត្ថកិច្ចពុំបានផ្តល់ព័ត៌មានលំអិតឡើយ៕ (កែសម្រួលដោយ ៖ ធីតា)
ចែករំលែកព័តមាននេះ