ខេត្តកំពង់ឆ្នាំង ៖ យ៉ាងហោចណាស់មានមនុស្ស២នាក់ស្លាប់ និង១០នាក់ផ្សេងទៀតបានរងរបួសធ្ងន់ និងស្រាលក្នុងហេតុការណ៍គ្រោះថ្នាក់ចរាចរណ៍មួយដែលបានកើតឡើងនៅវេលាម៉ោង២និង២០នាទីរសៀល ថ្ងៃទី២ មីនា នៅតាមបណ្ដោយផ្លូវជាតិលេខ៥ត្រង់ចំណុចភូមិថ្មី ឃុំផ្សារ ស្រុកបរិបូរណ៍។
មន្ត្រីប៉ូលិសបាននិយាយថា ជនរងគ្រោះគឺជាជនក្រីក្រដែលទៅធ្វើការជាកម្មករដាំដំឡូងមី ឱ្យថៅកែចិននៅចំណុចកាច់កង់ និងភ្នំគុក ដែលស្ថិតនៅព្រំប្រទល់ជាប់គ្នា២ខេត្ដ គឺខេត្ដកំពង់ឆ្នាំង និងខេត្ដពោធិ៍សាត់។ ពួកគាត់ត្រូវបានថៅកែចិនឈប់ឱ្យធ្វើការដោយប្រាប់ថា អស់ការងារធ្វើ ហើយនៅពេលពួកគាត់ត្រឡប់ទៅផ្ទះវិញតាមរថយន្ដកូរ៉េ ក៏ជួបគ្រោះថ្នាក់រថយន្ដក្រឡាប់ធ្លាក់ចេញពីផ្លូវ៣ទៅ៤ត្រឡប់។
ប្រភពដដែលបានបន្ដថា ជនរងគ្រោះដែលស្លាប់ គឺសុទ្ធសឹងជាក្មេងប្រុសជំទង់ដែលមានឈ្មោះផូ ភឿន អាយុ១៥ឆ្នាំ រស់នៅភូមិតាប្រាប ឃុំម្កាក់ ស្រុកអង្គស្នួល ខេត្តកណា្ដល និងម្នាក់ទៀតឈ្មោះឈុន រុំ អាយុ៩ឆ្នាំ រស់នៅស្រុកបាត់ដឹង ខេត្ដកំពង់ស្ពឺ។ ក្រៅពីក្មេងប្រុសដែលស្លាប់២នាក់នេះ នៅមានមនុស្ស៤នាក់ទៀតបានរងរបួសធ្ងន់ធ្ងរ និង៦នាក់ទៀតបានរងរបួសស្រាលដែលពួកគាត់ខ្លះនៅខេត្ដកំពង់ស្ពឺ ខ្លះនៅខេត្តកណា្ដល និងខ្លះទៀតនៅខេត្តកំពង់ឆ្នាំង ហើយត្រូវបានដឹកទៅសង្គ្រាះនៅមន្ទីរពេទ្យខេត្ដ។
យោងតាមមន្ដ្រីប៉ូលិសចរាចរស្រុកបរិបូរណ៍ បានបញ្ជាក់ថា រថយន្ដដែលដឹកកម្មករហើយជួបគ្រោះថ្នាក់នោះជារថយន្តកូរ៉េពណ៌ខៀវ ពាក់ស្លាកលេខកំពង់ស្ពឺ 2A-2027 ពេលបើកមកដល់ចំណុចកើតហេតុបានដាច់ «រ៉ូទីល» ហើយបាត់ម្ចាស់ការក៏ក្រឡាប់ធ្លាក់ចេញពីផ្លូវជាតិដែលមានកំពស់ជាង៣ម៉ែត្រ ៣-៤ត្រឡប់រួចងើបឈរវិញនៅបាតប្រឡាយ។ ចំណែកអ្នកបើកបរក្រោយកើតហេតុឃើញមនុស្សស្លាប់ និងរបួសបែបនេះបានរត់គេចខ្លួនបាត់។ សពជនរងគ្រោះត្រូវបានដឹកយកទៅតម្កល់នៅវត្ដខ្សាម ដើម្បីរង់ចាំបងប្អូនមកដឹកយកទៅធ្វើបុណ្យតាមប្រពៃណី ។ចំណែករថយន្ដត្រូវបានយកទៅរក្សាទុកនៅអធិការដ្ឋាននគរបាលស្រុករង់ចាំការដោះស្រាយ ៕
ចែករំលែកព័តមាននេះ