ខេត្តកំពង់ឆ្នាំង ៖ ស្ត្រីម្នាក់បានស្លា.ប់ និង៣នាក់ទៀតបានរងរបួសធ្ងន់ និងស្រាលក្នុងហេតការណ៏គ្រោះថ្នាក់ចរាចរណ៍មួយដែលបានកើតឡើងកាលពីវេលាម៉ោង១១ និង៣០នាទីថ្ងៃត្រង់ ថ្ងៃទី០៣ ឧសភា ២០១៥
ខេត្តកំពង់ឆ្នាំង ៖ ស្ត្រីម្នាក់បានស្លាប់ និង៣នាក់ទៀតបានរងរបួសធ្ងន់ និងស្រាលក្នុងហេតការណ៏គ្រោះថ្នាក់ចរាចរណ៍មួយដែលបានកើតឡើងកាលពីវេលាម៉ោង១១ និង៣០នាទីថ្ងៃត្រង់ ថ្ងៃទី០៣ ឧសភា ២០១៥ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៣១ និង១៣២ ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូរណ៌ ខណៈជនរងគ្រោះខាងលើជិះរថយន្តហាយឡិនឌ័រទៅបុកជាមួយរថយន្តក្រុងដឹកអ្នក ដំណើរ ។
នគរបាលស្រុកបរិបូរណ៌បាននិយាយថា ស្រី្តរងគ្រោះខាងលើមានឈ្មោះ ឱ សុង អាយុ៦៩ឆ្នាំ មានទីលំនៅស្រុកថ្មគោល ខេត្តបាត់ដំបង ។ មុនពេលកើតហេតុ ស្ត្រីរូបនោះបានជិះរថយន្តម៉ាកហាយឡិនឌ័រ ពណ៌ស្ករ ពាក់ស្លាកលេខ ភ្នំពេញ 2U. 7974 ជាមួយក្រុមគ្រួសារ ដោយធ្វើដំណើរពីខេត្តបាត់ដំបងទៅភ្នំពេញ លុះមកដល់ចំណុចកើតហេតុជាផ្លូវកោងស្រាប់តែមានរថយន្តក្រុងដឹកអ្នកដំណើររបស់ក្រុមហ៊ុន GSTមួយគ្រឿងពាក់ស្លាកលេខភ្នំពេញ 3A. 8083 បើកក្នុងល្បឿនលឿនក្នុងដំណើរបញ្ច្រាសទិសគ្នាបានជ្រុលទៅបុករថយន្តហាយឡិនឌ័របណ្តាលឱ្យក្រឡាប់ធ្លាក់ស្រែរងការខូចខាតធ្ងន់ធ្ងរ ក្នុងនោះស្ត្រីឈ្មោះ ឱ សុង បានស្លាប់នៅនឹងកន្លែងកើតហេតុ និងអ្នកជិះក្នុងរថយន្តចំនួន៣នាក់ទៀតបានរងរបួសធ្ងន់ និងស្រាលត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យខេត្តជាបន្ទាន់ ។
ក្រោយពេលកើតហេតុអ្នកបើកបររថយន្តក្រុងបានរត់គេចខ្លួនបាត់ ចំណែកសពស្រី្តរងគ្រោះ ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅលំនៅឋានរបស់សពនៅខេត្តបាត់ដំបង ។ រថយន្តទាំងពីរគ្រឿងត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានខេត្តកំពង់ឆ្នាំងរង់ចាំការដោះស្រាយទៅតាមនិតិវិធីច្បាប់៕
ចែករំលែកព័តមាននេះ