រាជធានីភ្នំពេញ ៖ នាព្រឹកថ្ងៃទី១៩ ខែតុលា ឆ្នាំ២០២០ លោកមេបញ្ជាការអាវុធហត្ថខណ្ឌដង្កោ បានចាត់ក្រុមការងារដឹកនាំដោយលោកវរសេនីយត្រី សៀ ប៊ុនថាត មេបញ្ជាការរងខណ្ឌ ដឹកនាំកម្លាំងចុះសួរសុខទុក្ខលោកអនុសេនីយ៍ត្រី យក់ ពិសិដ្ឋ ដែលបានជួបគ្រោះថ្នាក់ចរាចរណ៍ ក្រោយចេញពីបំពេញបេសកកម្មជួយសង្គ្រោះប្រជាពលរដ្ឋរងគ្រោះដោយជំនន់ទឹកភ្លៀងតាមសណ្តរស្ទឹងព្រែកត្នោត ក្នុងខណ្ឌដង្កោ និងកំពុងសម្រាកព្យាបាលនៅមន្ទីពេទ្យរុស្ស៊ី ។
ក្នុងឱកាសនោះ ក្រុមការងារបាននាំយកថវិកាចំនួន ១,៧០០,០០០រៀល, អង្ករ៥០គីឡូក្រាម, ទឹកសុទ្ធ០២កេស ជាអំណោយសួរសុខទុក្ខ និងទុកជាការចែករំលែកសម្រាលបន្ទុកក្នុងការសម្រាកព្យាបាលផងដែរ ។
សូមជម្រាបថា ហេតុការណ៍គ្រោះថ្នាក់ចរាចរណ៍នេះ បានកើតឡើងនាវេលាម៉ោង០៨និង៤៥នាទីយប់ ថ្ងៃទី១៦ ខែតុលា ឆ្នាំ២០២០នេះ នៅលើផ្លូវជាតិលេខ១ ត្រង់ចំណុចមុខធនាគារ ABA ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ខណៈពេលដែលមន្ត្រីអាវុធហត្ថខណ្ឌដង្កោខាងលើ ទើបចេញពីជួយសង្គ្រោះប្រជាពលរដ្ឋដែលលិចលង់ដោយជំនន់ទឹកភ្លៀង ជិះម៉ូតូត្រលប់មកផ្ទះវិញ ស្របពេលកំពុងស៊ីញ៉ូឆ្វេង បត់ឆ្លងផ្លូវបំណងចូលតាមច្រកច្បារអំពៅស៊ីធី តែឆ្លងបានបន្តិច ស្រាប់តែមានរថយន្តមួយគ្រឿងម៉ាក LEXUS RX300 មិនចាំស្លាកលេខទេ បានបោះពួយយ៉ាងលឿន ទិសដៅពីកើតមកលិច ក៏ជ្រុលទៅបុកប៉ះម៉ូតូរបស់ជនរងគ្រោះ បណ្ដាលឲ្យជនរងគ្រោះដែលជាមន្ត្រីអាវុធហត្ថនោះ ដួលខ្ទាតមកក្បែរចិញ្ចើមផ្លូវ រងរបួសបាក់ជើងខាងស្ដាំ ហើយរថយន្តបន្ថែមល្បឿនរត់បាត់ស្រមោល បន្សល់តែជនរងគ្រោះនៅកន្លែងកើតហេតុ ។ មួយសន្ទុះក្រោយមក ស្ត្រីម្នាក់ជាប្រពន្ធ រួមទាំងសាច់ញាតិរបស់ជនរងគ្រោះបានមកដល់កន្លែងកើតហេតុ ហើយមន្ត្រីអាវុធហត្ថដែលរងរបួសនោះ បានប្រគល់របស់មានតម្លៃ និងសម្ភារៈអោយទៅស្ត្រីជាប្រពន្ធរក្សាទុក ជាក់ស្ដែងគាត់បាក់ជើងខាងស្ដាំត្រឹមកជើង ដេកនឹងថ្នល់រងចាំរថយន្តសង្គ្រោះមកដឹកបញ្ជូនទៅសង្គ្រោះនៅឯមន្ទីរពេទ្យ ព្រះកុសុមៈ(ហៅពេទ្យរុស្សី) ៕
ចែករំលែកព័តមាននេះ