ខេត្តព្រះសីហនុ ៖ នៅទីធ្លាអតីតវីរៈនគរបាលព្រំដែនទឹក ឆ្នេរអូរឈើទាល ស្ថិតក្នុងសង្កាត់០៤ ក្រុង-ខេត្តព្រះសីហនុ នាព្រឹកថ្ងៃទី០១ ឧសភា ២០១៥ ក្រុមហ៊ុនរោងចក្រផលិតស្រាបៀរអង្គរ
ខេត្តព្រះសីហនុ ៖ នៅទីធ្លាអតីតវីរៈនគរបាលព្រំដែនទឹក ឆ្នេរអូរឈើទាល ស្ថិតក្នុងសង្កាត់០៤ ក្រុង-ខេត្តព្រះសីហនុ នាព្រឹកថ្ងៃទី០១ ឧសភា ២០១៥ ក្រុមហ៊ុនរោងចក្រផលិតស្រាបៀរអង្គរ ដែលមានទីតាំងស្ថិតនៅសង្កាត់០១ ក្រុង-ខេត្តព្រះសីហនុ បានរៀបចំកម្មវិធីអបអរសាទរខួបអនុស្សាវរីយ៍លើកទី ១២៩ ទិវាពលកម្មអន្តរជាតិ ថ្ងៃទី០១ ឧសភា ២០១៥ ។
ពិធីខាងលើបានប្រព្រឹត្តិទៅក្រោមអធិបតីភាពលោកហេង សំអាន អភិបាលរងខេត្តព្រះសីហនុ, លោកយ៉ូវ ខេមរា ប្រធានមន្ទីរការងារបណ្តុះបណ្តាលវិជ្ជាជីវៈ ខេត្តព្រះសីហនុ, លោកលីម សេងហុង នាយកបច្ចេកទេស និងគ្រប់គ្រងនៃរោងចក្រផលិតស្រាបៀរអង្គរ, លោកឆេង សុភ័ក្ត្រ នាយករដ្ឋបាលជាន់ខ្ពស់គ្រប់គ្រងធនធានមនុស្សនៃរោងចក្រខាងលើ ។ អញ្ជើញចូលរួមជាភ្ញៀវកិត្តិយស នាឱកាសនោះមានលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ, លោកស្នងការរងនគរបាលខេត្ត និងមានការអញ្ជើញចូលរួមពីសំណាក់និយោជក និយោជិត បងប្អូន ជាកម្មករ កម្មការិនី ប្រមាណជាង២០០០នាក់ បានមកចូលរួមយ៉ាងកុះករ ។
ជាកិច្ចស្វាគមន៍ចំពោះគណៈអធិបតី និងភ្ញៀវកិត្តិយសដែលបានអញ្ជើញមកចូលរួម លោកឆេង សុភ័ក្ត្រ នាយកគ្រប់គ្រងធនធានមនុស្ស បានមានប្រសាសន៍ឱ្យដឹងថា ក្រោមកិច្ចដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខរដ្ឋាភិបាល បានធ្វើឱ្យប្រទេសកម្ពុជា មានសុខសន្តិភាព ស្ថេរភាព នយោបាយ និងសេដ្ឋកិច្ចជាតិមានការអភិវឌ្ឍន៍ឥតឈប់ឈរ ។ ហើយសព្វថ្ងៃនេះ បើនិយាយរួមក្រុមហ៊ុនផលិតស្រាបៀរអង្គរបានផ្តល់ការងារដល់ប្រជាពលរដ្ឋកម្ពុជាទូទាំងប្រទេសប្រមាណជាង៨.០០០នាក់ ក្នុងនោះកម្មករនិយោជិតបំរើការងារពេញម៉ោងសរុបចំនួន២.០៨១នាក់ ស្រីមាន៧៧៤នាក់ និងនិយាយដោយឡែករោងចក្រផលិតស្រាបៀរអង្គរខេត្តព្រះសីហនុ មានកម្មករ និយោជិត សរុបចំនួន ១.២២៨នាក់ ស្រី១.២២៤នាក់ ក្នុងនោះអ្នកជំនាញការជនជាតិបរទេសចំនួន១៨នាក់ ស្រី០២នាក់ ។
លោកបានបន្តទៀតថា ក្រុមហ៊ុមបានយកចិត្តទុកដាក់គិតគូរ អំពីសុខទុក្ខ និងជីវភាពរស់នៅរបស់បងប្អូន កម្មករ និងនិយោជិត ដោយបានផ្តល់នូវប្រាក់បៀវត្សសមរម្យ គិតជាមធ្យមក្នុងមួយនាក់២៨៥ដុល្លារសហរដ្ឋអាមេរិកក្នុងមួយខែ និងមានការដំឡើងប្រាក់បៀវត្សជូនកម្មករ កម្មការិនីជារៀងរាល់ឆ្នាំ និង មានរៀបចំកម្មវិធីជប់លៀងផ្សេងៗ ជាក់ស្តែងដូចជាថ្ងៃទី០១ ឧសភា ដែលជាថ្ងៃទិវាពលកម្មអន្តរជាតិខាងលើនេះ និងបានរៀបចំកម្មវិធីឱ្យនិយោជក និយោជិត កម្មករ កម្មការិនី ធ្វើដំណើរទស្សនៈកិច្ចនៅក្រៅប្រទេសថែមទៀតផង ៕
ចែករំលែកព័តមាននេះ