រាជធានីភ្នំពេញ ៖ ចាប់ពីថ្ងៃទី២៦ ដល់ថ្ងៃទី២៩ មេសា គណៈប្រតិភូនៃអគ្គនាយកដ្ឋានគយ និងរដ្ឋាករកម្ពុជាចំនួន៩រូប ដឹកនាំដោយលោកបណ្ឌិត គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានធ្វើដំណើរទស្សនកិច្ចសិក្សានៅសាធារណរដ្ឋប្រជាមានិតចិន ក្នុងគោលបំណងស្វែងយល់ និងដកបទពិសោធន៍ផ្នែកបច្ចេកវិទ្យាទំនើបថ្មីក្នុងការប្រើប្រាស់ម៉ាស៊ីនស្កែនកុងតឺន័រ។
ដំណើរទស្សនកិច្ចសិក្សានេះត្រូវបានធ្វើឡើងតាមការអញ្ជើញរបស់រដ្ឋាភិបាលចិន តាមរយៈក្រុមហ៊ុន NUCTEC ដែលជាក្រុមហ៊ុនផលិត និងផ្គត់ផ្គង់ម៉ាស៊ីនស្កែនកុងតឺន័រដល់រដ្ឋាភិបាលចិន ដែលបានផ្តល់ម៉ាស៊ីនស្កែនកុងតឺន័រប្រភេទ MT1213LT ចំនួន៨គ្រឿងដល់កម្ពុជា ក្នុងក្របខ័ណ្ឌហិរញ្ញប្បទានឥតសំណង ។
នៅពេលធ្វើទស្សនកិច្ចនៅការិយាល័យ និងមូលដ្ឋានផលិតកម្មរបស់ក្រុមហ៊ុន NUCTEC នៅ Myun តំណាងក្រុមហ៊ុនបានបង្ហាញអំពីបច្ចេកវិទ្យាទំនើបថ្មីបំផុតរបស់ម៉ាស៊ីនស្កែន ដែលមានសមត្ថភាពអាចកំណត់បាននូវប្រភេទវត្ថុដែលផ្ទុកក្នុងកុងតឺន័រ សមត្ថភាពនៃការបញ្ជូនរូបភាពភ្លាមៗតាមប្រព័ន្ធអុីនធើរណេតទៅកាន់កុំព្យូទ័រ ទូរស័ព្ទដៃ និងលទ្ធភាពនៃការតភ្ជាប់ជាមួយប្រព័ន្ធស្វ័យប្រវត្តិកម្មគយ ។
លើសពីនេះទៀត ក្រុមហ៊ុនក៏បានបង្ហាញនូវបច្ចេកវិទ្យាថ្មីមួយទៀតនៃប្រព័ន្ធតាមដានចលនាទំនិញ (Cargo Tracking System) ដែលប្រើប្រាស់សៀលអេឡិចត្រូនិច (E-Seals) ដែលអាចបញ្ជូនព័ត៌មានតាមរយៈប្រព័ន្ធផ្កាយរណប (Satellite) ផងដែរ ។
បន្ទាប់មកគណៈប្រតិភូគយកម្ពុជា ក៏ត្រូវបានអញ្ជើញឲ្យទៅពិនិត្យមើលប្រតិបត្តិការគយនៅកំពង់ផែ Tianjin ដែលជាកំពង់ផែដ៏សំខាន់ និងធំជាងគេរបស់ចិន ស្ថិតក្នុងខេត្ត Tianjin ចម្ងាយប្រមាណ១៧០គីឡូម៉ែត្រ ភាគអាគ្នេយ៍នៃទីក្រុងប៉េកាំង ។
តាមរបាយការណ៍ឆ្នាំ២០១៣ បង្ហាញថា សកម្មភាពនាំចេញនាំចូលទំនិញនៅកំពង់ផែនេះ មានរហូតដល់៥០០លានតោន ឬត្រូវជា១៣លានកុងតឺន័រស្ថិតក្នុងចំណាត់ថ្នាក់លេខ៤ ធំជាងគេក្នុងពិភពលោក។ នៅទីនោះ គណៈប្រតិភូគយកម្ពុជាត្រូវបានទទួលស្វាគមន៍យ៉ាងរាក់ទាក់ និងកក់ក្តៅពីសំណាក់មន្ត្រីគយចិន និងបានដកស្រង់យកនូវបទពិសោធន៍ថ្មីៗនៃកិច្ចដំណើរការបញ្ចេញទំនិញពីគយដែលមានភាពមមាញឹកខ្លាំង ព្រមទាំងការប្រើប្រាស់បច្ចេកវិទ្យាទំនើបផ្នែកស្កែនកុងតឺន័រ នៅក្នុងប្រតិបត្តិការគយផងដែរ ។
មុនពេលបញ្ចប់ដំណើរទស្សនកិច្ច គណៈប្រតិភូគយកម្ពុជា បានថ្លែងអំណរគុណដល់រដ្ឋាភិបាលសាធារណរដ្ឋប្រជាមានិតចិន
និងតំណាងក្រុមហ៊ុន NUCTEC ចំពោះបដិសណ្ឋារកិច្ចស្វាគមន៍ដ៏កក់ក្តៅ និងបានវាយតម្លៃថា ដំណើរទស្សនកិច្ចសិក្សាទទួលលទ្ធផលជាផ្លែផ្កា ដោយទទួលបាននូវព័ត៌មានបច្ចេកវិទ្យាថ្មីបំផុតរបស់ម៉ាស៊ីនស្កែន និងបទពិសោធន៍ល្អៗពាក់ព័ន្ធការងារគយ ដែលលទ្ធផលនេះនឹងក្លាយជាទុនដ៏សំខាន់ដើម្បីកំណត់នូវទស្សនវិស័យនៃការអនុវត្តយុទ្ធសាស្ត្រកំណែទម្រង់ និងទំនើបកម្មរដ្ឋបាលគយកម្ពុជានាពេលអនាគត ។
ទស្សនកិច្ចសិក្សាត្រូវបានបញ្ចប់ ហើយគណៈប្រតិភូគយកម្ពុជា បានធ្វើមាតុភូមិនិវត្តន៍ដោយសុវត្ថិភាពមកព្រះរាជាណាចក្រកម្ពុជានៅថ្ងៃទី២៩ មេសា ៕
ចែករំលែកព័តមាននេះ