ខេត្តកំពង់ស្ពឺ៖ គ្មាននរណាម្នាក់ដឹងទេថា ជនរងគ្រោះមានរឿងអ្វីជាមួយនឹងជនសង្ស័យទើបធ្វើឱ្យជនសង្ស័យឡើងទៅកាប់ប្រហារជនរងគ្រោះដល់លើផ្ទះបណ្តាលឱ្យបាត់បង់ជិវិតយ៉ាងអាណោចអាធ័ម ។ ក្រោយធ្វើសកម្មភាព ជនសង្ស័យបានរត់គេចខ្លួនបាត់ពេលនេះសមត្ថកិច្ចកំពុងតែស្វែងរកចាប់ខ្លួន ។
ហេតុការណ៍ខាងលើ កើតឡើងកាលវេលាម៉ោង៧ និង៣០នាទីថ្ងៃទី១៧ តុលា នៅចំណុចភូមិថ្មី ឃុំជាំសង្កែ ស្រុកភ្នំស្រួច ខេត្តកំពង់ស្ពឺ ។ ជនរងគ្រោះ អាយុ៥២ ឆ្នាំមុខរបរកសិករមានទីលំនៅភូមិឃុំកើតហេតុខាងលើ។ ប្រភពពីមន្ត្រីកងរាជអាវុធហត្ថខេត្តកំពង់ស្ពឺបានឲ្យដឹងថា ករណីនេះបង្កឡើងដោយជនសង្ស័យមិនស្គាល់អត្តសញ្ញាណមួយរូប បានកាប់ទៅលើជនរងគ្រោះយ៉ាងអាណោចអាធ័ម ។
លោកវរសេនីយ៍ទោទិត្យ វណ្ណៈ មេបញ្ជាការរងកងរាជអាវុធហត្ថខេត្តកំពង់ស្ពឺ បានប្រាប់ថា ជនរងគ្រោះត្រូវជនសង្ស័យកាប់ចំថ្ងាសខាងឆ្វេងនៅលើផ្ទះរបស់ខ្លួន ហើយបន្ទាប់ពីជនសង្ស័យធ្វើសកម្មភាពរួចបានគេចខ្លួនបាត់។ ចំពោះជនសង្ស័យ កម្លាំងកងរាជអាវុធហត្ថនឹងនគរបាលកំពុងស្រាវជ្រាវដើម្បីចាប់ខ្លួនជនយកមកអនុវត្តតាមនីតិវិធីច្បាប់។
លោកវរសេនីយ៍ទោទិត្យ វណ្ណៈ មេបញ្ជាការរងកងរាជអាវុធហត្ថខេត្តបានប្រាប់ថាចំពោះករណីនេះ សមត្ថកិច្ចនៅមិនទាន់ហ៊ានអះអាងនិងបញ្ជាក់ថា ឃាតកម្មនេះបណ្ដាលមកពីមូលហេតុអ្វីនោះទេ ទើបឈានដល់ការកាប់ប្រហារបែបនេះ ។ តែទោះជាយ៉ាងណា សមត្ថកិច្ចនឹងខិតធិខំធ្វើការស្រាវជ្រាវចាប់ជនបង្កយកមកសាកសួរ ។
ចែករំលែកព័តមាននេះ