រាជធានីភ្នំពេញ ៖ លោក កឹម សុខា អតីតប្រធានគណសង្គ្រោះជាតិបានចុះយកសម្ភារៈចែកជូនពលរដ្ឋរងគ្រោះដោយទឹកជំនន់ នៅខណ្ឌដង្កោ រាជធានីភ្នំពេញ ។ យោងតាមបណ្តាញសង្គម…
រាជធានីភ្នំពេញ ៖ លោក កឹម សុខា អតីតប្រធានគណសង្គ្រោះជាតិបានចុះយកសម្ភារៈចែកជូនពលរដ្ឋរងគ្រោះដោយទឹកជំនន់ នៅខណ្ឌដង្កោ រាជធានីភ្នំពេញ ។
យោងតាមបណ្តាញសង្គម នៅថ្ងៃទី១៧ តុលា ឆ្នាំ២០២០ លោកកឹម សុខាបានសរសេរថា សូមឲ្យស្មារតីដ៏ថ្លៃថ្លា សាមគ្គីជាតិ ខ្មែរជួយខ្មែរ មានឋិតឋេរបន្តទៀតជានិរន្តរ៍ ។ លោកបញ្ជាក់ថា៖«ថ្ងៃនេះខ្ញុំ និងសហការី បាននាំយកជំនួយមនុស្សធម៌របស់បងប្អូនខ្មែរនៅសហរដ្ឋអាមេរិក កាណាដា និងអូស្ត្រាលី ដែលបានផ្តល់មកតាមរយៈខ្ញុំ បន្តចែកជូនប្រជាពលរដ្ឋខ្មែរដែលរងគ្រោះដោយទឹកជំនន់នៅ ខណ្ឌដង្កោ រាជធានីភ្នំពេញ» ។
សូមជម្រាបថា បើតាមគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា គិតត្រឹមថ្ងៃទី១៦ តុលា ឆ្នាំ២០២០ អ្នកបាត់បង់ជីវិតដោយសារជំនន់ទឹកភ្លៀងមានចំនួន១៨នាក់ ក្មេង៨នាក់ មនុស្សចាស់៩នាក់ ក្នុងខេត្តចំនួន៦មានរួមមាន៖បន្ទាយមានជ័យ ព្រះសីហនុ ពោធិ៍សាត់ ប៉ៃលិន កំពង់ធំ កណ្តាល ។
អ្នកនាំពាក្យបានឲ្យដឹងថាជំនន់ទឹកភ្លៀងបានវាប្រហារខេត្តចំននួ១៩រាជធានី ខេត្ត (គិតពីថ្ងៃទី១ ខែកញ្ញា ដល់ ថ្ងៃទី១៦ ខែតុលា ឆ្នាំ២០២០-ព្រឹក)ប៉ះពាល់ ១៩ រាជធានី -ខេត្ត ស្មើ ៧១ក្រុង/ស្រុក/ខណ្ឌ ២៨២ឃុំ/សង្កាត់ រួមមាន៖ ពោធិ៍សាត់ ប៉ៃលិន បន្ទាយមានជ័យ ភ្នំពេញ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង កំពង់ធំ ។ ប៉ះពាល់ប្រជាជនប្រមាណ ៥៣.១៦៩ គ្រួសារ ស្មើប្រមាណ ២១២,៦៧៦ នាក់ ។
ប្រជាជនជម្លៀសប្រមាណ ៦,២៩៨គ្រួសារ ស្មើប្រមាណ ២៥,១៩២នាក់ ប្រជាជនស្លាប់ ១៨នាក់ (ក្មេង ៨នាក់)។ ផ្ទះប៉ះពាល់ប្រមាណ ៥១,១៣៣ខ្នង ផ្ទះខូចខាត៥២ខ្នង សាលារៀនលិចទឹក ៤៣៩កន្លែង ។ ស្រូវលិចទឹកប្រមាណ ១៣៧,១៦០ហិកតា ក្នុងនេះ ខូចខាតប្រមាណ ៦,២៣១ហិកតា។ ដំណាំរួមផ្សំលិចទឹក ៦៧,៤៩០ហិកតា ក្នុងនេះ ខូចខាតប្រមាណ ២៩,៩៤៧ហិកតា។
ផ្លូវជាតិ ផ្លូវខេត្ត ផ្លូវគ្រួសក្រហមប៉ះពាល់ប្រមាណ ២៨៤ គ.ម។ ផ្លូវលំជនបទលិចទឹកប្រមាណ ១,៤៥៩ គ .ម និង ៣១ខ្សែ។ស្ពានលិចទឹកប្រមាណ ២៤កន្លែង ។ ទំនប់ប៉ះពាល់ប្រមាណ ២២.១ គ .ម ប្រឡាយមេ ប្រឡាយរង ប្រឡាយស្រោចស្រព ប៉ះពាល់ប្រមាណ៧៩.៦គ.មនិងច្រាំងទន្លេរប៉ះពាល់៤១០គ.ម៕
ចែករំលែកព័តមាននេះ