រាជធានីភ្នំពេញ ៖ បុរសម្នាក់ជិះរថយន្តស៊េរីទំនើបក្នុងស្ថានភាពស្រវឹងបើកឆ្លងស្ពានទៅកៀរម៉ូតូម្តងហើយម្តងទៀតធ្វើឲ្យម្ចាស់ម៉ូតូខឹងដេញតាមកាក់សួរនាំ និងចង់ឲ្យអ្នកបើករថយន្តសុំទោស បែរជាអ្នកបើករថយន្តហៅមិត្តភក្កិដែលជា
រាជធានីភ្នំពេញ ៖ បុរសម្នាក់ជិះរថយន្តស៊េរីទំនើបក្នុងស្ថានភាពស្រវឹងបើកឆ្លងស្ពានទៅកៀរម៉ូតូម្តងហើយម្តងទៀតធ្វើឲ្យម្ចាស់ម៉ូតូខឹងដេញតាមកាក់សួរនាំ និងចង់ឲ្យអ្នកបើករថយន្តសុំទោស បែរជាអ្នកបើករថយន្តហៅមិត្តភក្កិដែលជានគរបាលខណ្ឌច្បារអំពៅមកជួយអន្តរាគមន៍ និងរុញម៉ាស៊ីនថតរបស់អ្នកយកព័ត៌មានហាមមិនឲ្យថតរថយន្តរបស់គាត់ទៀត។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩ និង៣០នាទីយប់ ថ្ងៃទី២៩ មេសា នៅគល់ស្ពានព្រះមុនីវង្សថ្មី តាមផ្លូវជាតិលេខ១ សង្កាត់ច្បារអំពៅទី១ ខណ្ឌច្បារអំពៅ ។ ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុរថយន្តបង្កម៉ាកឡង់គ្រីស្ស័រ ពណ៌សំបកឪឡឹក ពាក់ស្លាកលេខ ភ្នំពេញ 2M 3899 បើកបរដោយបុរសម្នាក់វ័យជាង៤០ឆ្នាំក្នុងស្ថានភាពស្រវឹងបើកឆ្លងស្ពានព្រះមុនីវង្សថ្មីពីលិចទៅកើត ពេលដល់លើស្ពានបានបើកទៅកៀរម៉ូតូ២គ្រឿង តែមិនបណ្តាលឲ្យដួលម៉ូតូទេ គ្រាន់តែបើកប៉ះម៉ូតូម៉ាកហុងដាឌ្រីម ពណ៌ខ្មៅ មួយគ្រឿង ហើយបានបើកទៅកៀរម៉ូតូយាម៉ាហាស៊ីរ៉ូស ពណ៌ខ្មៅលាយក្រហម អត់ស្លាកលេខ ជិះ២នាក់ ប្តីប្រពន្ធ ។
បន្ទាប់ពីកៀរម៉ូតូ២គ្រឿងហើយ រថយន្តមិនបានឈប់ទេបានបើកទៅមុខទៀតជិតដល់គល់ស្ពានស្រាប់តែរថយន្តបានបើកកៀរម៉ូតូយាម៉ាហាស៊ីរ៉ូសម្តងទៀតធ្វើឲ្យម្ចាស់ម៉ូតូខឹងបានជិះម៉ូតូទៅកាក់ពីមុខដើម្បីសួរនាំហេតុអីបានជាបើកកៀរ
ម៉ូតូរបស់គាត់ ហើយម្ចាស់ម៉ូតូមិនចង់បានអ្វីទេ គ្រាន់តែចង់ឲ្យអ្នកបើករថយន្តសុំទោសមួយម៉ាត់ បែរជាអ្នកបើករថយន្តមិនព្រមសុំទោសទេ បានទូរស័ព្ទហៅមិត្តភក្កិដែលជានគរបាលខណ្ឌច្បារអំពៅមកជួយអន្តរាគមន៍និងប្រើពាក្យសម្តីមិនសមរម្យដាក់ទៅលើម្ចាស់ម៉ូតូទៀត។
ក្រោយពេលកើតហេតុម្ចាស់ម៉ូតូហុងដាឌ្រីមមិនបានឈប់ទេបានជិះចេញទៅបាត់ហើយ នៅសល់តែ២នាក់ប្តីប្រពន្ធជិះម៉ូតូយាម៉ាហាស៊ីរ៉ូស និងរថយន្តបង្កនៅជជែកគ្នាធ្វើឲ្យកកស្ទះចរាចរណ៍នៅគល់ស្ពានព្រះមុនីវង្សថ្មីទម្រាំតែភាគីខាងរថយន្តយល់ព្រមសុំទោសម្ចាស់ម៉ូតូដើម្បីបញ្ចប់រឿង ។ លុះពេលឃើញអ្នកយកព័ត៌មានទៅថត អ្នកបើករថយន្តបានហាមមិនឲ្យថតរថយន្តរបស់គាត់ទេ ព្រោះដោះស្រាយចប់ហើយ ព្រមទាំងបានរុញម៉ាស៊ីនថតរបស់អ្នកយកព័ត៌មានទៀត ចំណែកអ្នកដែលមកជួយអន្តរាគមន៍ក៏បានរារាំងមិនឲ្យអ្នកយកព័ត៌មានថតរូបភាពយកទៅផ្សព្វផ្សាយដែរ ៕
ចែករំលែកព័តមាននេះ