ខេត្តកំពង់ធំ ៖ មានការភ្ញាក់ផ្អើលមួយបានកើតឡើង ដោយសារតែប្រជាពលរដ្ឋអ្នករកស៊ីដឹកអុសតាមគោយន្តចំនួន៤នាក់ បានប្រវាយប្រតប់ដណ្តើមយកកាំភ្លើងចំនួន៣ដើម ពីមន្ត្រីរដ្ឋបាលព្រៃឈើ និងយោធាការពារសង្កាត់រដ្ឋបាលព្រៃឈើក្រយា ស្រុកសន្ទុក កាលពីវេលាម៉ោងប្រមាណ៤រសៀលថ្ងៃទី២៤ មីនា នៅចំណុចត្រពាំងព្រៃ ក្នុងភូមិសាស្ត្រឃុំក្រយា ស្រុកសន្ទុក ។
ទាក់ទិននឹងហេតុការណ៍នេះ តាមប្រភពព័ត៌មានពីកន្លែងកើតហេតុបានឱ្យដឹងថា នៅវេលារសៀលនោះ មានប្រជាពលរដ្ឋចំនួន៤នាក់រកស៊ីដឹកអុសតាមគោយន្តចំនួន៤គ្រឿងគឺ១-ឈ្មោះទ្រៀង ភាព អាយុ៣១ឆ្នាំ ២-ឈ្មោះទ្រៀង ភ័ស អាយុ២៨ឆ្នាំ ៣-ឈ្មោះខាត់ អុល អាយុ២៦ឆ្នាំ និង៤-ឈ្មោះទ្រី គ្រៀន អាយុ៥៥ឆ្នាំ ទាំងអស់គ្នា មានទីលំនៅភូមិចំបក់ជ្រំ ឃុំប្រាសាទ ស្រុកសន្ទុក ធ្វើដំណើរមកដល់ចំណុចខាងលើ ក៏មានមន្ត្រីសង្កាត់រដ្ឋបាលព្រៃឈើក្រយា២នាក់ និងមន្ត្រីយោធា៤នាក់មានឈ្មោះណាត ចាន់, ប៉ា ជីវន្ត, ណុល ងឿន , យីម នួន, មីង សំណាង, និងចែត ផល ប្រដាប់ដោយអាវុធចំនួន៣ដើម បានឃាត់គោយន្តទាំងនោះឱ្យឈប់ គឺដើម្បីសួរនាំ។ ប៉ុន្តែម្ចាស់គោយន្តទាំង៤មិនព្រមឈប់ទេ គឺនៅតែចចេសបើកគោយន្តទៅមុខ ហើយត្រូវសមត្ថកិច្ចដកកាំភ្លើងគំរាម ។ ចំណែកម្ចាស់គោយន្តទាំងនោះក៏ទាញដែកម៉ារ៉ាវេនព្រួតគ្នាវាយទៅវិញទៅមក រហូតសមត្ថកិច្ចម្ចាស់កាំភ្លើង៣នាក់ដួលសន្លប់នៅនឹងកន្លែង ហើយក្រុមអ្នកដឹកអុសដែលវាយដណ្តើមយកកាំភ្លើងបាន៣ដើមក៏រត់គេចខ្លួន ។
ប្រភពព័ត៌មានដដែលបានបន្តថា ក្រោយពេលពួកគេដណ្តើមកាំភ្លើងរត់គេចខ្លួន ក៏ត្រូវសមត្ថកិច្ចនគរបាលស្រុកសន្ទុកស្ទាក់ឃាត់ពួក គេបាននៅចំណុចភូមិបន្ទាយយមរាជ ឃុំប្រាសាទ និងកំពុងធ្វើការសាកសួរ ដើម្បីចងក្រងសំណុំរឿងបញ្ជូនទៅតុលាការ ។ ពាក់ព័ន្ធនឹងជម្លោះខាងលើនេះ ប្រភពព័ត៌មានដដែលបានបញ្ជាក់ថា ជាធម្មតាសកម្មភាពដឹកឈើតាមរថយន្ត គោយន្ត រទេះគោ ម៉ូតូ កង់ ចេញពីព្រៃក្នុងភូមិសាស្ត្រស្រុកសណ្តាន់ និងស្រុកសន្ទុកតែងតែកើតមានជារៀងរាល់ថ្ងៃហាក់ដូចជាគ្មានញញើតសមត្ថកិច្ចឡើយ ។ ប្រការនេះ ដោយសារតែធាតុអសកម្មបានញាំញីក្រុមមន្ត្រីជំនាញ និងក្រុមសមត្ថកិច្ចឱ្យភ្លេចតួនាទីរបស់ខ្លួនហើយបែរជាមកប្រព្រឹត្តល្មើសទៅវិញ ។
ដោយឡែកព័ត៌មានពីនគរបាលស្រុកសន្ទុកបានឱ្យដឹងថា ម្ចាស់គោយន្តដែលវាយសមត្ថកិច្ចដណ្តើមកាំភ្លើងទាំង៤នាក់ហើយត្រូវឃាត់ខ្លួននោះត្រូវបានធ្វើការសាកសួរនៅអធិការដ្ឋាននៅឡើយ និងត្រូវបញ្ជូនខ្លួនទៅសាលាដំបូងតាមបញ្ជាលោកព្រះរាជអាជ្ញានៅរសៀលថ្ងៃទី២៥ មីនា ៕
ចែករំលែកព័តមាននេះ