រាជធានីភ្នំពេញ ៖ អាជ្ញាធរខណ្ឌដង្កោបានអះអាងថា គិតមកដល់ពេលនេះ ប្រជាពលរដ្ឋដែលរងគ្រោះដោយជំនន់ទឹកភ្លៀងក្នុងភូមិសាស្ត្រសង្កាត់ចំនួន៤ នៅខណ្ឌដង្កោបានកើនដល់៥.២០២គ្រួសារ ខណៈអាជ្ញាធររាជធានីភ្នំពេញនៅតែបន្តជួយជម្លៀសប្រជាពលរដ្ឋរងគ្រោះដោយជំនន់ទឹកស្ទឹងព្រែកត្នោតនៅក្នុងខណ្ឌដង្កោ និងផ្តល់អាហារជាបន្តបន្ទាប់ នៅព្រឹកថ្ងៃទី ១៦ខែតុលានេះ…
រាជធានីភ្នំពេញ ៖ អាជ្ញាធរខណ្ឌដង្កោបានអះអាងថា គិតមកដល់ពេលនេះ ប្រជាពលរដ្ឋដែលរងគ្រោះដោយជំនន់ទឹកភ្លៀងក្នុងភូមិសាស្ត្រសង្កាត់ចំនួន៤ នៅខណ្ឌដង្កោបាន
កើនដល់៥.២០២គ្រួសារ ខណៈអាជ្ញាធររាជធានីភ្នំពេញនៅតែបន្តជួយជម្លៀសប្រជាពលរដ្ឋរងគ្រោះដោយជំនន់ទឹកស្ទឹងព្រែកត្នោតនៅក្នុងខណ្ឌដង្កោ និងផ្តល់អាហារជាបន្តបន្ទាប់ នៅព្រឹកថ្ងៃទី ១៦ខែតុលានេះ ។
អាជ្ញាធររាជធានីភ្នំពេញដឹកនាំដោយលោក ប៉ា សុជាតិវង្ស ប្រធានក្រុមប្រឹក្សា និងលោក ឃួង ស្រេង អភិបាលបាននៅតែបន្តដឹកនាំជួយជួយសង្គ្រោះ និងជម្លៀសប្រជាពលរដ្ឋរាប់ពាន់គ្រួសារ នៅក្នុងសង្កាត់ចំនួន៤ក្នុងខណ្ឌដង្កោ ដែលទទួលរងគ្រោះដោយជំនន់ទឹកស្ទឹងព្រែកត្នោត នាប៉ុន្មានថ្ងៃជាប់គ្នានេះ និងបន្តចែកអាហារ ព្រមទាំងការស្នាក់នៅដោយយកចិត្តទុកដាក់ផងដែរ ។
តាមអាជ្ញាធរខណ្ឌដង្កោបានប្រាប់ឲ្យដឹងថា ប្រជាពលរដ្ឋរួមជាមួយទ្រព្យសម្បត្តិត្រូវបានជម្លៀសចេញពីលំនៅដ្ឋានដែលត្រូវទឹកជន់លិច ហើយអ្នកមួយចំនួនដែលបានស្នាក់នៅតាមទីតាំងគោលដៅសុវត្ថិភាពដែលរៀបចំឡើងដោយអាជ្ញាធរនោះ ទទួលនូវការទំនុកបម្រុងបាយទឹកពីអាជ្ញាធររាជធានីភ្នំពេញ និងអាជ្ញាធរខណ្ឌព្រមទាំងស្ថាប័ននានាមួយចំនួនទៀតដែលបាននាំយកទៅផ្ដល់ជូនដល់ទីកន្លែង និងត្រៀមរថយន្តសង្គ្រោះបន្ទាន់សម្រាប់ដឹកអ្នកដែលមានជម្ងឺទៅកាន់មន្ទីរពេទ្យ។
តាមអាជ្ញាធរខណ្ឌដង្កោបានប្រាប់ឲ្យដឹងថា ប្រជាពលរដ្ឋដែលទទួលរងការលិចលង់និងត្រូវបានជួយសង្គ្រោះនិងជម្លៀសចេញពីទឹកស្ទឹងជាបន្តបន្ទាប់រយៈពេល២ថ្ងៃនេះត្រូវបានដាក់ឲ្យស្នាក់នៅក្នុងទីតាំងចំនួន២ធំៗគឺទី១នៅក្នុងបុរីផ្ទះល្វែងអ៊ុយ ហុង ដែលមានទីតាំងស្ថិតនៅខាងត្បូងស្ពានព្រែកជ្រៃ សង្កាត់ស្ពានថ្ម ខណ្ឌដង្កោ ជាប់និងគោលដៅដែលត្រូវនាំពីក្នុងទឹកឡើងគោកតែម្ដង។ចំណែកទីតាំងទី២ស្ថិតនៅក្នុងបុរីពិភពថ្មីកួរស្រូវ២ ស្ថិតនៅក្នុងសង្កាត់ព្រែកកំពឹស ខណ្ឌដង្កោ ចំណែកប្រជាពលរដ្ឋមួយចំនួនធំទៀតបានទៅស្នាក់នៅតាមទីទួលសុវត្ថិភាព ឬតាមផ្លូវថ្នល់នានាមួយចំនួនផ្សេងទៀត ហើយក៏មានអ្នកខ្លះទៅស្នាក់នៅផ្ទះបងប្អូនសាច់ញាតិរបស់ខ្លួនផងដែរ។
តាមប្រភពដដែលបានបញ្ជាក់ទៀតថា តាមអ្វីដែលទទួលបានពីខាងមន្ត្រីក្រសួងធនធានទឹកនិងឧតុនិយមដែលប្រចាំការនៅឯស្ថានីយ៍ទំនប់ស្ពាន៧មករា គឺរហូតមកដល់ថ្ងៃទី១៦ ខែតុលា ឆ្នាំ២០២០ កម្ពស់ទឹកស្ទឹងព្រែកត្នោតនៅទំនប់ស្ពាន៧មករា បើប្រៀបធៀបទៅនិងថ្ងៃទី១៥ ខែតុលា មានការកើនឡើងគឺនៅទ្វារមុខមានកម្ពស់៦,៦០ម៉ែត្រកើនឡើង១,៨០ម៉ែត្រ និងទ្វារខាងក្រោយមានកម្ពស់៩,៥០ម៉ែត្រកើនលើស០,១០ម៉ែត្រ។ប៉ុន្តែកម្ពស់ទឹកអាចនិងស្រកចុះច្រើនវិញនៅថ្ងៃទី១៧ ខែតុលា ព្រោះតែនៅតាមផ្នែកស្ថានីយ៍នៅផ្នែកខាងលើៗឯក្នុងភូមិសាស្ត្រខេត្តកំពង់ស្ពឺមានការស្រកចុះដែរហើយដូចជានៅស្ថានីយ៍ពាមឃ្លៃ ទឹកមានកម្ពស់៦,៦០ម៉ែត្រធៀបព្រឹកថ្ងៃទី១៥ ខែតុលាស្រកចុះ០,៨៥ម៉ែត្រ។នៅទំនប់រលាំងជ្រៃ ទឹកនៅទ្វារខាងមុខមានកម្ពស់៦,៨៨ម៉ែត្រស្រុកចុះ០,១២ម៉ែត្រគឺ ស្រកក្រោម កម្រិតកម្ពស់ទ្វារបិទ។
ប្រជាពលរដ្ឋដែលកំពុងស្នាក់នៅបណ្ដោះអាសន្នក្នុង បុរីអ៊ុយ ហុង គេចចេញពីជំនន់ទឹកស្ទឹងនោះបាននិយាយថា ផ្ទះសម្បែងពួកគាត់ត្រូវបានទឹកជន់លិចទាំងស្រុងមិនអាចរស់នៅបានឡើយ ទឹកស្ទឹងបានជន់ឡើងលឿនដោយមិនមិននឹកស្មានដល់សោះ ដោយសារតែច្រើឆ្នាំកន្លងមកហើយមិនដែលមានទឹកធំនោះពួកគាត់មិនបានត្រៀមខ្លួនជាមុនឡើយ។
លុះពេលទឹកស្ទឹងឡើងលឿនបែបនេះទើបបង្កឲ្យជួបការលំបាក ហើយពួកគាត់ត្រូវបានអាជ្ញាធរជួយជម្លៀសចេញពីក្នុងទឹកដោយសុវត្ថិភាព ព្រមទាំងបានផ្ដល់បាយទឹកសម្រាប់បរិភោគក្នុង១ថ្ងៃ៣ពេល ជាក់ស្ដែងនៅវេលាព្រឹកថ្ងៃទី១៦ ខែតុលា លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ និងលោក ឃួង ស្រេង អភិបាលរាជធានីភ្នំពេញបានដឹកនាំការជួយជួយសង្គ្រោះ និងជម្លៀសអ្នកជាប់ក្នុងទឹកព្រមទាំងចែកបាយទឹកជូនពួកគាត់ថែមទៀតផង។
ដោយឡែកប្រជាពលរដ្ឋដែលកំពុងស្នាក់នៅក្នុងបុរីពិភពថ្មីកួរស្រូវ២បាននិយាយថា ពួកគាត់ហាក់មានការធ្វេសប្រហែសនិងមើលស្រាលស្ថានការណ៍ ព្រោះមិននឹកស្មានថា ទឹកឡើងលឿនដល់ម្ល៉ឹងនោះទេ ទើបនៅពេលទឹកហូរចូលដល់ក្នុងភូមិនិងផ្ទះសម្បែងពុំអាចយកអ្វីចេញទាន់នោះឡើយ ។ សត្វចិញ្ចឹមមាន់ទា រួមជាមួយទ្រព្យសម្បត្តិនិងរបស់របរប្រើប្រាស់ផ្សេងៗរួមទាំងសៀវភៅគ្រួសារជាដើមត្រូវបានអណ្ដែតតាមកម្លាំងទឹកហូរដ៏ខ្លាំងក្លាបាត់អស់គ្មានសល់ ចំណែកម៉ូតូនិងម៉ូតូកង់៣ឬរថយន្តជាដើមត្រូវលិចបាត់ទៅក្នុងទឹក និយាយរួមពួកគាត់ម្នាក់ៗបានត្រឹមតែធ្វើយ៉ាងណាឲ្យរួចផុតពីសេចក្ដីស្លាប់តែប៉ុណ្ណោះ៕(កែសម្រួលដោយ ៖ ធីតា)
ចែករំលែកព័តមាននេះ