រាជធានីភ្នំពេញ ៖ លោក កឹម សុខា អតីតមេដឹកនាំគណបក្សប្រឆាំងដែលត្រូវបានរំលាយចោលដោយអំណាចតុលាការបានចូលរួមបរិច្ចាគថវិកាចំនួន ៥០០០ ដុល្លារសហរដ្ឋអាមេរិកជូនចំពោះសម្តេចតេជោ ហ៊ុន សែន…
រាជធានីភ្នំពេញ ៖ លោក កឹម សុខា អតីតមេដឹកនាំគណបក្សប្រឆាំងដែលត្រូវបានរំលាយចោលដោយអំណាចតុលាការបានចូលរួមបរិច្ចាគថវិកាចំនួន ៥០០០ ដុល្លារសហរដ្ឋអាមេរិកជូនចំពោះសម្តេចតេជោ ហ៊ុន សែន សម្រាប់ការជួយសង្គ្រោះដល់ពលរដ្ឋរងគ្រោះដោយទឹកជំនន់នៅកម្ពុជា ។ ដែលការចូលរួមរបស់លោកនាពេលនេះត្រូវបានមហាជនមើលឃើញថា ជាបង្ហាញសញ្ញាវិជ្ជមានដែលអតីតមេបក្សប្រឆាំងបានរួមជាមួយរដ្ឋាភិបាលជួយប្រជាពលរដ្ឋនាគ្រាមានគ្រោះអាសន្ន ។
លោក កឹម សុខា ដែលជាអ្នកនយោបាយខ្មែរមួយរូបនៅជាប់បណ្តឹងនៅតុលាការពីបទ «ក្បត់ជាតិ» បានចូលរួមចែកអំណោយដល់ជនរងគ្រោះដោយទឹកជំនន់នៅតាមខេត្តមួយចំនួន ហើយនៅថ្ងៃទី ១៦ ខែតុលានេះផងដែរ លោកបានសម្តែងអំណរគុណយ៉ាងជ្រាលជ្រៅចំពោះប្រជាពលរដ្ឋខ្មែរក្នុង និងក្រៅប្រទេស មានចិត្តសប្បុរសធម៌ អាណិតស្រឡាញ់បងប្អូនរួមជាតិយើងដែលបាន និងកំពុងរងគ្រោះដោយទឹកជំនន់ ដែលបានចូលរួមជាថវិកា សម្ភារៈ តាមរយៈខ្ញុំ ដើម្បីឲ្យខ្ញុំយកទៅចែកជូនផ្ទាល់ដល់ទីកន្លែងរងគ្រោះកន្លងមក និងបន្តទៀត។
លោក កឹម សុខា បានបង្ហោះសារលើបណ្តាញសង្គមផ្លូវការរបស់លោកអំពីការចូលរួមបរិច្ចាគថវិកាជួយពលរដ្ឋរងគ្រោះដោយទឹកជំនន់ដោយមានខ្លឹមសារថា «ថ្ងៃនេះ យើងខ្ញុំក៏បានផ្តល់ជូនតាមរយៈរាជរដ្ឋាភិបាលសម្រាប់ចូលរួម ការងារសង្គ្រោះផលប៉ះពាល់ដោយទឹកជំនន់នេះ នូវទឹកប្រាក់ចំនួន ៥.០០០$ (ប្រាំពាន់ដុល្លាអាមេរិក) ផងដែរ។ យើងខិតខំរួមគ្នា ដើម្បីជួយដល់ប្រជាពលរដ្ឋខ្មែរយើង ដោយគ្មានការរើសអើង មិនគិតពីនិន្នាការនយោបាយ» ។ ក្នុងនោះផងដែរ លោកក៏បានអំពាវនាវឲ្យបងប្អូនប្រុងប្រយត្ន័ខ្ពស់បន្តទៀត ចំពោះមុខគ្រោះមហន្តរាយនេះ និងសូមជូនពរឲ្យខ្មែរបានសុខ ចាកផុតទុក្ខ ។
សូមរម្លឹកថា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ឲ្យដឹងថាគិតត្រឹមរសៀលថ្ងៃទី ១៥ ខែតុលា ឆ្នាំ២០២០ ម្សិលមិញនេះ សប្បុរសជននានា ដែលបានចូលរួមថវិកាក្នុងការសង្គ្រោះប្រជាពលរដ្ឋដែលរងគ្រោះដោយទឹកជំនន់ដែលរហូតមកដល់ពេលនេះ មានប្រមាណជាង ៦លានដុល្លារសហរដ្ឋអាមេរិកហើយ ដែលថវិកានេះរាជរដ្ឋាភិបាលមិនបានអំពាវនាវទេ ប៉ុន្តែសប្បុរសជនបានស្ម័គ្រចិត្តចូលរួមដោយខ្លួនឯង។
យ៉ាងណាមិញ ជុំវិញការចូលរួមបរិច្ចាគថវិការបស់លោក កឹម សុខា ក៏មានពលរដ្ឋខ្មែរបញ្ចេញមតិគាំទ្រថា លោកគឺជាអ្នកនយោយបាយដែលបានចូលរួមដោះស្រាយវិបត្តិជាមួយរដ្ឋាភិបាល ។ ដូច្នេះលោកកឹម សុខា គឺជាអ្នកនយោបាយគំរូតំកល់ប្រយោជន៍ជាតិជាធំ។
ងាកទៅលោក សម រង្ស៊ី ដែលកំពុងរស់នៅក្រៅប្រទេសឯណោះវិញ គិតត្រឹមព្រឹកថ្ងៃទី ១៦ ខែតុលានេះ មិនឃើញលោកបង្ហាញនូវចេតនាណាមួយក្នុងការចូលរួមបរិច្ចាគថវិកាជួយជនរងគ្រោះឡើយ តែផ្ទុយទៅវិញលោកបានបង្ហោះនូវសារជាច្រើនជុំវិញរឿងជំនន់ទឹកភ្លៀងដែលកំពុងវាយលុកយ៉ាងហោចណាស់ ១៩ ខេត្ត-រាជធានី និងមានអ្នកស្លាប់ និងពលរដ្ឋត្រូវជម្លៀសចេញពីផ្ទះសម្បែងទៅទីទួលសុវត្ថិភាព ។
លោក សម រង្ស៊ី បានសរសេរថា «នៅប្រទេសកម្ពុជា ប្រមាណ ២០ ឆ្នាំចុងក្រោយនេះ មានទឹកជំនន់ កាន់តែញឹកញាប់ និងកាន់តែធ្ងន់ធ្ងរ ។ បាតុភូតនេះ មិនមែនជាគ្រោះធម្មជាតិទេ តែគឺជាគ្រោះដែលបណ្តាលមកពីមនុស្ស ដែលកាប់បំផ្លាញព្រៃឈើ កាន់តែច្រើនទៅៗ ។ ការកាប់បំផ្លាញព្រៃឈើ នាំឲ្យទឹកភ្លៀងហូរច្រោះ កាន់តែច្រើន និងកាន់តែលឿន ទៅក្នុងបឹង ស្ទឹង និងទន្លេ ដោយសារតែអស់មានព្រៃឈើ ជួយទប់ស្កាត់ និងពន្យឺតការហូរច្រោះនេះ។ ទឹកភ្លៀង ដែលហូរច្រោះ កាន់តែច្រើន និងកាន់តែលឿន ទៅក្នុង បឹង ស្ទឹង និងទន្លេនេះហើយ ដែលបណ្តាលឲ្យមានទឹកជំនន់» ៕
ចែករំលែកព័តមាននេះ