លោកជេហ្វ បេសូស (Jeff Bezos) ដែលជានាយកប្រតិបត្តិរបស់ Amazon និងជាបុរសដែលមានជាងគេលើលោកទទួលបានការគោរពពីមនុស្សជាច្រើនព្រោះតែភាពជោគជ័យរបស់លោកក្នុងការគ្រប់គ្រងអាជីវកម្ម។ ជាក់ស្តែង គំនិតពីក្រោយអាជីវកម្មរបស់លោកមិនមានលក្ខណៈខុសពីអ្នកដទៃប៉ុន្មានទេក្នុងពេលដែលលោកចាប់ផ្តើមដំបូង។ ប៉ុន្តែចក្ខុវិស័យ និងយុទ្ធសាស្ត្រច្នៃប្រឌិតរបស់លោកជាកត្តាដែលធ្វើឲ្យលោកឈានមុខអ្នកដទៃដាច់ក្នុងវិស័យនេះ។
ភាពជោគជ័យ និងអាជីវកម្មរបស់លោកមិនកើតឡើងដោយចៃដន្យទេ។ ផ្ទុយមកវិញ វាកើតចេញពីការឆ្លងកាត់វដ្តចំនួនបួនដែលត្រូវបានសង្ខេបក្នុងសៀវភៅ The Bezos Letters។
១. វដ្តទី១៖ ការសាកល្បង
នរណាៗក៏អាចមានគំនិតល្អដែរ តែមុនពេលអ្នកសម្រេចចិត្តលាឈប់ពីការងារ និងលក់ផ្ទះលក់រថយន្តដើម្បីចាប់ផ្តើមអាជីវកម្ម អ្នកត្រូវតែធ្វើការសាកល្បងផលិតផលឬសេវាកម្ម និងទីផ្សារជាមុនសិន។ ក្នុងដំណាក់កាលនេះ អ្នកនឹងបរាជ័យជាច្រើនដង ប៉ុន្តែអ្នកមិនត្រូវចុះចាញ់ទេ។ តែសម្រាប់អ្វីដែលជោគជ័យ អ្នកគួរតែមានភាពក្លាហានក្នុងការជឿទុកចិត្តវា។ មិនថាអាជីវកម្មអ្នកមានហាងផ្ទាល់ ឬគ្រាន់តែមានវត្តមានលើប្រព័ន្ធឌីជីថលទេ អ្នកត្រូវតែមានប្រព័ន្ធអាជីវកម្មដែលអនុញ្ញាតឲ្យអ្នកទទួលបានព័ត៌មានងាយៗ។
២. វដ្តទីពីរ៖ ការកសាងស្ថាបនា
ពេលដែលអ្នកបញ្ជាក់ថាគំនិតរបស់អ្នកអាចក្លាយជាអាជីវកម្មមួយពិតប្រាកដហើយ អ្នកត្រូវចាប់ផ្តើមសាងសង់មូលដ្ឋានអាចីវកម្មរបស់អ្នក។ អ្នកត្រូវកសាងប្រព័ន្ធដែលអនុញ្ញាតឲ្យអ្នកឆ្លើយតបទៅនឹងតម្រូវការបច្ចុប្បន្ន មើលឃើញតម្រូវការនៅថ្ងៃអនាគត និងមានកន្លែងដែលអនុញ្ញាតឲ្យអ្នកបង្កើតអ្វីដែលថ្មីៗ។
ក្នុងដំណាក់កាលនេះ អ្នកត្រូវតែផ្តោតស្មារតីលើអតិថិជនរបស់អ្នក។ មិនថាផលិតផលរបស់អ្នកល្អប៉ុនណាទេ ប្រសិនបើអតិថិជនមិនចង់ទិញពីអ្នកទេ អ្នកនឹងបរាជ័យ។ បន្ទាប់មកទៀតអ្នកត្រូវគិតឲ្យបានវែងឆ្ងាយ។ តើអ្នកចង់មើលឃើញអ្វីក្នុងរយៈពេល ៥ ឬ ១០ឆ្នាំខាងមុខ?
៣. វដ្ឋទី៣៖ ការពន្លឿន
សូមអបអរសារទរប្រសិនបើអ្នកទទួលបានគំរូអាជីវកម្ម និងក្រុមអតិថិជនដែលអនុញ្ញាតឲ្យអ្នកដំណើរការអាជីវកម្មបាននឹងនរហើយ។ ដំណាក់កាលមួយនេះផ្តោតលើការពន្លឿនការលូតលាស់របស់អាជីវកម្ម។ វាជាពេលល្អក្នុងការវាយតម្លៃលើអ្នកដឹកនាំឡើងវិញ។ ស្ថាបនិកទាំងអស់មិនប្រាកដថាជាអ្នកដឹកនាំល្អទេ។ ជឫមួយគ្នានេះដែរ អ្នកត្រូវដោះស្រាយបញ្ហាដែលស្មុគស្មាញនិងធ្វើឲ្យវាងាយស្រួលវិញ។ បើមានសមត្ថភាព ចាប់ផ្តើមវិនិយោគលើបច្ចេកវិទ្យាដើម្បីបង្កើនប្រសិទ្ធភាពការងារ។
៤. វដ្តទី៤៖ ពង្រីក
មិនចាំបាច់ត្រូវបង្កើត Amazon ទីពីរដើម្បីជោគជ័យទេ ប៉ុន្តែអ្នកអាចពង្រីកអាជីវកម្មរបស់អ្នកឲ្យកាន់តែធំ និងអាចផ្គត់ផ្គង់កាន់តែច្រើនដល់អតិថិជនរបស់អ្នក។ ដើម្បីពង្រីកអាជីវកម្មអ្នកបាន អ្នកត្រូវតែពង្រឹងស្តង់ដារការងារ។ ចម្ងាយ និងល្បឿនអាចប៉ះពាល់ដល់លទ្ធផលការងារបាន ហើយប្រព័ន្ធបែងចែកការងារមិនល្អក៏ប៉ះពាល់ដល់ក្រុមហ៊ុនដែរ។
ជាចុងក្រោយ អ្នកគួរតែចាត់ទុករាល់ថ្ងៃជាថ្ងៃដំបូងរបស់អាជីវកម្មអ្នក។ ក្រុមហ៊ុនដែលអាចមើលឃើញអនាគតជាក្រុមហ៊ុនដែលតែងតែកែសម្រួលខ្លួនឯង និងជំរុញដល់ការផ្លាស់ប្តូរ និងបង្កើតថ្មី ៕
ចែករំលែកព័តមាននេះ