ADផ្ទាំងផ្សព្វផ្សាយពាណិជ្ជកម្ម

មហាវិថីឈ្នះឈ្នះនិងផ្លូវជាតិលេខ៣ មិនធ្លាប់លិចសោះ តែឥឡូវទឹកជន់លិចហើយ

3 ឆ្នាំ មុន

ភ្នំពេញ
១៥ ខែ តុលា ឆ្នាំ ២០២០ ម៉ោង ១៦:០០

រាជធានីភ្នំពេញ ៖ មហាវិថីឈ្នះឈ្នះហៅផ្លូវអូដឹមកប់ស្រូវដែលកាលពីច្រើនឆ្នាំកន្លងមកហើយមិនដែលជួបបញ្ហាលិចទឹកសោះនោះ ស្រាប់តែចូលមកដល់ក្នុងឆ្នាំ២០២០នេះ ត្រូវបានទឹកជំនន់ទឹកភ្លៀងវាយលុបណ្ដាលឲ្យជន់លិចប្រវែងជិត២គីឡូម៉ែត្រដោយកន្លែងខ្លះលិចជ្រៅត្រឹមភ្លៅនិងកន្លែងខ្លះលិចត្រឹមជង្គង់ ហើយជាហេតុធ្វើឲ្យមាមការប៉ះពាល់ដល់ការធ្វើដំណើររបស់ប្រជាពលរដ្ឋយ៉ាងខ្លាំង។ តាមប្រជាពលរដ្ឋបាននិយាយថា កំណាត់មហាវិថីឈ្នះឈ្នះនេះត្រូវបានទឹកជនលិចរយៈពេលច្រើនថ្ងៃកន្លងមកហើយ គឺចាប់ពីត្រឹមចំណុចជិតរោងចក្រផលិតស្បែកជើង ស្ថិតនៅក្នុងភូមិជង្រុក…

តាមប្រជាពលរដ្ឋបាននិយាយថា កំណាត់មហាវិថីឈ្នះឈ្នះនេះត្រូវបានទឹកជនលិចរយៈពេលច្រើនថ្ងៃកន្លងមកហើយ គឺចាប់ពីត្រឹមចំណុចជិតរោងចក្រផលិតស្បែកជើង ស្ថិតនៅក្នុងភូមិជង្រុក សង្កាត់ត្រពាំងក្រសាំង ដល់ត្រង់ចំណុចអតីតប្លុកក្រសាំងផ្អែម កែផ្លូវជាតិលេខ៤ ក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ផ្លូវនេះមានចរាចរណ៍មមាញឹកខ្លាំងណាស់ ហើយសម្បូរទៅដោយរថយន្តធន់ធ្ងន់បើកឆ្លងកាត់ទៅមកជាប់មិនដាច់ ជាពិសេសរថយន្តដឹកកុងតឺន័រតែម្ដង ជាហេតុនាំឲ្យមានការ លំបាកដល់អ្នកជិះម៉ូតូគ្រប់ៗគ្នា។

ប្រភពដដែលបានបន្តថា ច្រើនឆ្នាំមកហើយកំណាត់មហាវិថីខាងលើមិនដែលទទួលរងនូវការលិចទឹកបែបនេះទេ ដោយកាលណោះនៅសល់ស្រែ ថ្លុកត្រពាំងច្រើនដែលចាត់ទុកថាជាអាងទឹកធម្មជាតិសម្រាប់ស្តុកទឹកនៅរដូវវស្សាបាន ។ ប៉ុន្តែក្រោយមកតំបន់ដែលមានស្រែ ថ្លុក ត្រពាំងទាំងនោះត្រូវបានចាក់ដីលុបក្លាយទៅជាបុរីផ្ទះល្វែង ឬទីតាំងពុះដីឡូត៌អស់បាត់ទៅហើយ សូម្បីតែប្រឡាយមួយចំនួនត្រូវបានជំនួសដោយលូដែរព្រោះនេះគឺជាការអភិវឌ្ឍន៍។

សូមបញ្ជាក់ថា ក្រោយពីភ្លៀងបានធ្លាក់រាល់ថ្ងៃជាពិសេសនៅវេលាល្ងាចថ្ងៃទី១៣ ខែតុលា មិនត្រឹមតែនៅមហាវិថីឈ្នះឈ្នះហៅផ្លូវអូរដឹមកប់ស្រូវនេះប៉ុណ្ណោះទេ ដែលត្រូវទឹកលិចជានោះសូម្បីតែនៅតាមតំបន់ជាច្រើនទៀតនៅក្នុងខណ្ឌពោធិ៍សែនជ័យ កំបូលនិងដង្កោក៏ត្រូវបានទឹកជនលិចដែរ ។កន្លែងខ្លះមិនធ្លាប់លិចឬក៏លិចបន្តិចបន្តួចកាលពីមុននោះស្រាប់តែឥឡូវឆ្នាំ២០២០នេះបានជន់លិចនិងលិចខ្លាំងទៀតផង។

ដោយឡែកកំណាត់ផ្លូវជាតិលេខ៣ត្រង់ចំណុចស្ថានីយប្រេងឥន្ធនៈមួយកន្លែង ក្នុងសង្កាត់ចោមចៅទី២ ខណ្ឌពោធិ៍សែនជ័យ ក៏ត្រូវបានទឹកជន់លិចវែងដែរ ដែលជាហេតុបង្កឲ្យមានការកកស្ទះចរាចរ ហើយមានអ្នកជិះម៉ូតូខ្លះបានដួលនិងម៉ូតូមួយចំនួនបានរលត់ម៉ាស៊ីនថែមទៀតផង ហើយប្រសិនបើមេឃនៅតែបន្តធ្លាក់ភ្លៀងមិនឈប់រាល់ថ្ងៃទៀតនោះទឹកមិនត្រឹមតែអត់ស្រកទៅវិញប៉ុណ្ណោះទេ តែធ្វើឲ្យមានការលិចលង់ក៏កាន់តែកើនឡើងខ្លាំងថែមទៀតមិនខានឡើយ៕ (កែសម្រួលដោយ ៖ ធីតា)