រាជធានីភ្នំពេញ ៖ រយៈពេល៨ខែ ដើមឆ្នាំ ២០២០នេះ ភ្ញៀវបរទេសមកដល់កម្ពុជាមានចំនួន ១,២២លាននាក់ ខណៈ៨ខែដើមឆ្នាំ២០១៩ ភ្ញៀវបរទេសមកដល់កម្ពុជាមានចំនួនជាង៤,៣៦លាននាក់ មានការថយចុះរហូតដល់៧១,៩ភាគរយ ។ នេះបើយោងតាមរបាយការណ៍របស់ក្រសួងទេសចរណ៍កម្ពុជា ចេញផ្សាយថ្មីៗនេះ ។
របាយការណ៍ដដែលបានបង្ហាញផងដែរថា ភ្ញៀវទេសចរបរទេសដែលបានមកដល់កម្ពុជា តាមជើងហោះហើរមានចំនួនជាង ៧០៥ពាន់នាក់ មានចំណែកប្រមាណ៥៧,៥ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩ មានការថយចុះ ប្រមាណ៧៧,៣ភាគរយ ក្នុងនោះភ្ញៀវអន្តរជាតិចូលមកតាមអាកាសយានដ្ឋានអន្តរជាតិ ភ្នំពេញ មានចំនួនជិត៤០ម៉ឺននាក់ ធ្លាក់ចុះ៧២ភាគរយ តាមអាកាសយានដ្ឋានអន្តរជាតិខេត្តសៀមរាប មានចំនួនជាង២៤ម៉ឺននាក់ ធ្លាក់ចុះ៧៩,៧ភាគរយ និងភ្ញៀវទេសចរមកដល់កម្ពុជាតាមច្រកអាកាសយានដ្ឋានអន្តរជាតិកងកេង ខេត្តព្រះសីហនុ មានចំនួន ៦ម៉ឺន៤ពាន់នាក់ ធ្លាក់ចុះ ៨៦,៨ភាគរយ ។
ចំណែកភ្ញៀវអន្តរជាតិចូលមកកម្ពុជារយៈពេល៨ខែតាមច្រកព្រំដែនគោកនិងទឹក មានចំនួន៥២១ពាន់នាក់ ដោយព្រំដែនគោកទទួលបាន៤៦៩ពាន់នាក់ ធ្លាក់ចុះ៥៩,៥ភាគរយ និងតាមជើងទឹកទទួលបាន៥១ពាន់នាក់ ធ្លាក់ចុះ ៤៥,៩ភាគរយ ។
ក្នុងរបាយការណ៍ក៏បានបង្ហាញពីចំនួនភ្ញៀវទេសចរបរច្រើនជាងគេក្នុងរយៈពេល៨ខែនេះ ដែរ គឺភ្ញៀវជនជាតិនៅតែឈរលំដាប់ថ្នាក់ទី១ដោយមានចំនួន ២៩២ពាន់នាក់ ធ្លាក់ចុះ៨២,៨ភាគរយធៀបនឹងរយៈពេលដូចគ្នាក្នុងឆ្នាំ ២០១៩ ។ បន្ទាប់ពីភ្ញៀវចិន ទេសចរមកពីថៃ ក៏មានចំនួនច្រើនដែរ រហូតដល់១៨២ពាន់នាក់ វៀតណាម ១៨០ពាន់នាក សហរដ្ឋអាមេរិក ៥៤ពាន់នាក់ និងកូរ៉េមានចំនួនជាង៥៣ពាន់នាក់ ។
បើតាមមន្ត្រីជាន់ខ្ពស់នៃក្រសួងទេសចរណ៍លោកប៉ាក់ សុខុម រដ្ឋលេខាធិការបានមានប្រសាសន៍ថាជំងឺកូវីដ១៩ បានធ្វើអោយវិស័យទេសចរណ៍រងផលប៉ះពាល់ធ្ងន់ធ្ងរ ជាក់ស្ដែងដូចឃើញស្រាប់ភ្ញៀវទេសចរបរទេសមកកម្ពុជាបានធ្លាក់ចុះយ៉ាងគំហុក ដោយសារតែវិធានរបស់អង្គការសុខភាពពិភពលោកក៏ដូចជាក្រសួងសុខាភិបាលប្រទេសនីមួយៗ ដែលត្រូវរឹតបន្តឹងចំពោះដំណើរឆ្លងប្រទេសពីមួយទៅមួយ។ការធ្លាក់ចុះភ្ញៀវទេសបរទេសបានធ្វើអោយចំណូលពីវិស័យទេសចរណ៍បានបាត់បង់យ៉ាងច្រើន ធ្វើអោយប្រជាពលរដ្ឋបានបង់ឱកាសការងារនិងប្រាក់ចំណូលសម្រាប់ផ្គត់ផ្គង់ជីវភាពគ្រួសារផងដែរ ។
លោកបន្តថា ទោះបីមានការធ្លាក់ចុះខ្លាំងនៃទេសចរណ៍អន្តរជាតិក្ដី តែកាលពីសីហាកន្លងទៅ នេះរដ្ឋាភិបាលបានផ្ដល់ជូនថ្ងៃឈប់សម្រាកសងថ្ងៃចូលឆ្នាំខ្មែរ ហើយភ្ញៀវទេសចរក្នុងស្រុកបានធ្វើដំណើរទៅតាមតំបន់រមណីយដ្ឋាននានាទូទាំងប្រទេស ធ្វើអោយប្រតិបត្តិករទេស ទទួលបានចំណូលមួយចំនួនត្រលប់មកវិញ ហើយអាចទប់ទប់ទល់ការធ្លាក់ចុះខ្លាំងបានមួយកម្រិត ។
លោករំពឹងថា នៅពេលចប់កូវីដ១៩ កម្ពុជារំពឹងថានឹងទទួលបានភ្ញៀវទេសចរបរទេសមកកម្សាន្តកាន់តែច្រើន ក្នុងនោះកម្ពុជាកំពុងសម្រុកសាងសង់និងអភិវឌ្ឍន៍អាកាសយានដ្ឋានអន្តរជាតិ ថ្មីៗបន្ថែមដើម្បីទទួលភ្ញៀវនៅពេលអនាគត ។ មិនតែប៉ុណ្ណោះកម្ពុជាក៏បានរៀបចំតំបន់ទេសចរណ៍ថ្មីៗទៀតសម្រាប់អោយភ្ញៀវមក ដល់ កម្ពុជាហើយ ស្នាក់នៅកម្ពុជាបានយូរ ។
សូមបញ្ជាក់ថា ដោយសារការធ្លាក់ចុះនៃចំនួនភ្ញៀវទេសបរទេសនៅក្នុងឆ្នាំ ២០២០នេះ កន្លែងទេសចរណ៍បែបវប្បធម៌ល្បីឈ្មោះមួយនៅខេត្តសៀមរាប ភូមិវប្បធម៌ បានប្រកាសបិទអាជីវកម្មទាំងស្រុងចាប់បីថ្ងៃទី០៧ ខែវិច្ឆិកា ២០២០នេះតទៅ ។ក្រៅពីនេះសណ្ឋាគារផ្ទះសំណាក់និងអាជីវកម្មបម្រើអោយវិស័យទេសចរណ៍ជាច្រើនទៀតបានប្រកាសបិទទ្វារនិងផ្អាកអាជីវកម្ម ធ្វើអោយប៉ះពាល់បុគ្គលិករាប់ម៉ឺននាក់ទៀតផង ៕
ចែករំលែកព័តមាននេះ